martes, 29 de enero de 2008

El Bodegon de Teatinos (Uvieu)

Por poneme un martes a escribir, voi comentavos d'esti chigrin que me presta un monton n'Uvieu. Chigre prestosu, como son la mayoria de los que pongo equi, que pa eso ye esta paxina, nun pa poner el primeru que se m'antoxe. Ta bien decorau, con mera de color prieto y cristales, a mi recuerdame munchu al estilu aleman, porque tien como reservaos pa xintar ente les meses. Amas, tien una parte de vinateria que ta mui prestosa y ambientes pa fumadores y pa los que non, colo cual tampoco hai escusa pa non dir. La cocina ye tradicional, ensin complicaciones pero con un toque propiu. A mi gustame munchu el tucu guisao con pataquines que tienen, dan-y'l puntu y tamien el pitu caleya. Les especialidaes de la casa, visto lo que vos acabo dicir, nun son otres que los guisos. Equi podeis xintar unos bonos callos, una bona fabada, pote...vamos, tolo que xintamos cola güela, que si nun ties el tupper a mano pa llevatelo pa casa o pasa de ti (esto ye ciencia ficion, ya sabemos que les güeles nunca pasen de ti!) y tas per Uvieu, esti chigre ta perbien pa ponese fartuquin. Por ciertu, como tien vinateria tien una gama de vinos amplia. El casu, una zinta decente, pitu y tucu con un entrante y un vinin de Toro (Elias Mora) crianza, saldreis alredor de los 30 € persona. Hala, un mas pa apuntar.

domingo, 27 de enero de 2008

La Rula de Santolaya (Santolaya-Cabranes)



Bones tardes, vamos charrar güei d'un sitin n'un pueblin mui afayaizu, Santolaya de Cabranes. Pues bien, nesti publu alcontramos un restaurante diferente, pa entamar un chigre de pueblu que ye de non fumadores nel comedor, cosa rara, pa siguir, una casona d'indianos pintada por fuera de colores que y-quden bien pero que de mano nun peguen munchu(azul y naranxa) y un comedor decorau, polo menos, al gustu personal de la cocinera que tamien ye la decoradora (maera amestao con metal, puertes de castañu, biombos...) ente moderno y vieyo pero que-y da un aire guapu y afayaizu. Nesti contestu alcontramosnos con que güei nun hai carta, bono, hai menu, Pote y fabada (la fabada nun yera la de mio güela pero facia tiempu que nun xintaba fuera de casa una fabada tan rico, madre mio), de segundu escalopinos al cabrales (ensin rebozu y con una salsina de cabrales que taba pa moyar con tool pan, mui ricos, la carne yera de calidad perbona) y llenguau a la meniere (taba esquisito). Raciones abundantes casi nun quedo sitiu pa les llambiotaes pero entraron (curioso que yo xinte llambiotaes) pero nun pude resistime a un frixuelu enlleno de compota de mazana de la zona y pola otra banda una tarta d'indianos con bizcochu de fariña maiz y chocolate. Francamente taba too perbono (con la falla, piquiñina y despreciable, de los escalopinos). Cambiamos el vino del menu por un Ramon Bilbao crianza (la carte de vino nun da munchu de si, pero tienen esti que ta bien rico), cafes, chupitos 24€ cabeza. Bon sitiu por si tais perhi.

Nota 2009
Vamos munchu, pero l'otru dia que volvimos punxieronnos dalgo que nunca xintara equi, tortu con picadiellu de gochu xabaz y güevu de casa. El tortu taba impresionante, ensin pingar aceite, con fariña de bon maiz que-y daba un toque dulce y ricu en contrapuntu al picadiellu (de los pocos que nun me manquen porque casi nun tenia grasa)y un güevu caseru de los de verda que taba perricu. La semeya de baxo ye'l platu, primer platu del menu, dempues habia lo mesmo que postee. Por ciertu, que los precios siguin siendo los mesmos, con vinu la casa (un Rioja cosecheru decente) salis a 19€/persona. Un gran sitiu pa una fartura.

sábado, 26 de enero de 2008

Mere Nature (Luxemburgo-Luxemburgo)

El segundu chigre d'esti prestosu pais enllenu de vecinos portuguesos. Nesti chigre fue nel que cenamos en nuechivieya, asina, que cenina especial y nun m'alcuerdo de lo que nos costo, pero nun fue caro. per estos llares lo de les uves como que non, pero pa eso llevamos de bote. Hala!! a lo que vamos, restaurante perafyaizu con maderina y bien puestu, mui amables y una bona cocina, la verda ye que lu alcontramos de casualida y acertamos. Pa entamar tiramos de pates de la casa, mui ricos y bien presentaos. Dempues salmoni, esquisitu, la verda y una macroensala de gambes, cigales y mas mariscu con salmon afumau que yera una delicia. Riesling pa beber y como yera nuechiviya convidaronnos a champan hasta les tantes. Gran recuerdu y ya vos digo, Ryanair al poder y a ver sitios nuevos collacios!!

EMS (Luxemburgo-Luxemburgo)


Pue mira per onde aptezme falar de dos foriatos del mesmu sitiu, Luxemburgo. Pa los amantes de los vuelos baratos la manera de llegar ye Santander-Francfor Hahn (vaya chollu esto vuelos). Bono, a lo que vamos, l'añu que nos dio por dir de nuechivieya equi llevamos dos grates sorpreses a la hora de xintar. Esta ye un d'elles. l'EMS ye un chigre, si, un chigre, pertipicu de Luxemburgo que ta xusto delantre la estacion de autobuses. Popular, va muncha xente y xintase mui bien a precios mui razonables (pa los del Wagner :-), Luxemburgo ye mas caro qu'Alemaña). Bono, que ye lo que se pue xintar equi, pues unos bonos mexillones a la luxemburguesa. Digo yo que'l tar tan cerca de Belxica ye lo que tien, pero a mi prestaronme mas estos que tolos que xinte onde los belgas que quereis que vos diga. Ponenvos un perolu mexillones que ye la bomba, cocinaos con una salsina que, nun ye mariñana, pero ye asemeyao, anque tien mas verdures (alcuerdme que llevaba un poco apio). Acompañais la cena con unes xarres de Riesling luxemburgues (si pedis vino pediilo simpre en xarres, que les botelles tan peles ñubes). La pota ponenla enriba d'una plaquina metal pa que siga calentando con una vela, nun te vayan qudar frios los mexillones (detallistes que son, oye). Buf, vaya fartura que pillamos equi, hala!!! a por otru que ye fin de selmana

viernes, 25 de enero de 2008

Os Teixois (Os Teixois-Taramunde)


Güei aptezme falar d'esti chigre. Paez ser que la cabera vegada que tuvieron equi parte'lgrupu, el chigre perdio'n calida. Ensin embargu, vamos da-y un votu de confianza, que son munchos años parando dempues de venir de folixa de A Coruña. Perdonaime los astures del occidente (escaecioseme dicilo al falar del Alamu) pero yo, a pesar de que la mio ma ye de Navia, nun m'atrevo a escribayar en fala que ye lo que toca per estes llindes. Asina Os Teixois ye'l chigre que ta nesti pueblu-museu cultural perguapu de Taramunde. Como nun viven equi mas que los que vos enseñen los mazos de la ferreria, el chigre tien varies partes con varies entraes. Per un llau alcontrais el bar y per otru, el comedor. Podeis xintar nel comedor, tipica casa de "pedra" afayaizu y perencontradizu o si ta bono, debaxo la panera a la vera'l riu. Lo tipico del sitiu ye xintar pataquines frites, con chorizu y güevos (na semeya, el platu ya taba nes ultimes) y corderin gisao que lu preparen tamien mui rico. Basicamente ye pa dir tando na zona y pa reponer fuercies si fixisteis delles rutes perhi. Tienen sidra Solleiro (nel chigre nel que la fain de Taramunde tamien se xinta perbien) y anque la carta vinos ye curtia, tienen delles entraes riques. Si nun vos pasais col vino raro sedra que llegueis a 20€ persona.

miércoles, 23 de enero de 2008

L'Alamu (Rapalcuartu-Tapia)

Güei vamos dir un pucuñin mas pal occidente a ver si vos falo d'algun sitiu mas perlli estos dies. Entamo, por entamar, con esti sorprendente restaurante de carretera. Digo sorprendente porque paez, munches vegades, que los chigres de carretera nun tienen porque ser mui alla, mas bien pensaos pa profesionales del tresporte que pa otra cosa. Pues non, nun too polo menos. Esti ta mas bien pensau pa too'l mundiu. A la vera la nacional esa qu'entovia nos xune, tercermundistamente, a les Galicies, podeis alcontrar esti chigre. Nun ye mui encontradizu, con eso me refiero a que la decoracion y estes coses ye mas bien frio, eso nun quita pa que podais xintar perbien, la especialida ye'l pescao, sobre too fain mui bien el rei al llombu y tienen una cartina de vinos abondo bona. Si tasi pela zona ya teneis un sitiu mas. El dia que fui, fui convidau, asina que nun teo precios pa decivos, eso si, parezme que nun vais pasar de 30 € por cabeza si tomais una ensaladina y un par de reis con un albariñin. Hala!!! mañana mas!

domingo, 20 de enero de 2008

La Posada d'Antrialgu (Antrialgu-Piloña)


Creieis que güei finara col blog?. Yo si, la verda, pero dempues de pasar un domingu xintando perhi, crei que yera obligao poner el sitiu. La Posada ye un hotelin a la vera'l riu Piloña, amas de resturante. Pueo dicivos que se xinta mui bien, que'l dueñu ye mui amable y que'l sitiu ta mui prestosu, que mas se pue pedir?. Cocina asturiana con toques mas moderninos en dellos platos. La verda qu'un llugarin perencontradizu. Portaronse mui bien dexandonos una mesina pa nosotros solos de non fumadores pa tar cola neña (nel comedor fumase). Y a la hora de pidir, por que non que'l preciu seya bono?, pues, pola calida que tien y'l tamañu les raciones, el preciu ye mas que bono. Voi ponevos el exemplu, pa compartir Ensaladina de cogornices cola vinagre d'arandanos (la semeya), Mollejes de corderu con pataquines y ayin y pitu caleya(guisao con cebollina y de tal forma que de xuru que vos alcordais de la vuesa güela), Izadi crianza y una llambiota perbona (chocolate con mus de chocolate con bizcochu..de chocolate? :-) ), cafetinos...30 € por ca un. Por güei ya ta bien, que vais acostumavos a que te tou'l dia colgau d'equi :-)

El Tataguyo (Aviles)

Hola, como taba tirando pa Cuideiru al escibir sobre'l Mariño, alcordeme de Aviles y del Tataguyo, mira tu, nun se porque, pero ya que se me vino a la mente pongolu.
El Tataguyo ye un chigre de tola vida n'Aviles que paso a ser un resturante de postin. Ta perguapo puestu y teneis dende la parte de chigre pa los vinos y estes coses, enlleno xente, hasta la parte de resturante detras con comedores diferentes, dende'l mas clasicu al del altillo. En cualisquier casu, ta mui guapu puesto. La comida ye perbona, nun dexeis de prebar la llonganiza d'Aviles polo menos pal entamu, nun como xinta principal, que la preparen perbien. Dempues, si tirais pol pescau, pola mio parte vos recomiendo dir pol rei al fornu, impresionante. El exemplu, con un bon tintu (apetecionos oye) Muga de Rioja, andareis polos 50-60 persona, dependiendo de si sois llambiones, los cafes, los chupinos y delles coses. Francamente, pa mi, la relacion calida/preciu ta un poco pasada, menos mal que me convidaron :-). Vamos, que'l chigre ta bien, xintase bien, pero, ye mui caro. Hala!!! otru dia mas, nun seya que vos acostumeis a lleeme los domingos.

El Mariño (La Concha d'Arteu-Cuideiru)

Nel publin de Cuideiru too sabemos que nun hai Dios quien xinte, la hosteleria la verda que ye un desastre, el turismu ye lo que tien, pero hai un par de sitios que m'apetez poner porque xintase per bien, ca un nel so estilu. Por entamar por un, entamo con esti, que ta no alto mirando pa la playina. Ye un hotel restaurante y xintase perbien, caro, pero con bona calida de pexes que ye lo que se pide. A mi, nun me da mas pol sitiu, nun falo de la comida, porque paezme frio y poco encontradizu, nun se como esplicalo, pero eso de que les silles ten como de boda (endolcaes nuna funda blanca y con un llazu) nun me presta munchu. Aconseyaronmelu hai tiempu y cuando se pue hai delles coses que nun se puen dexar. Pues bien, nel sitiu xintase bien y hai unes vistes a la Concha perguapes, pero eso, frio. En cualisquier casu, bon producto y bona cocina.
Nesti casu, ensaldina y un par de furagañes al llombu (esquisites y bien fresquines) cola compaña d'un Gran Bazar Ambar, tareis polos 40€ persona. Lo dicho, si tais per Cuideiru y nun teneis ganes de que vos claven comiendo de pena nel puertu que a toos nos paso, tranquilos ;-) , nun teneis mas qu'arimaros perqui, al menos, anque caro, vais salir a gustu. Ah!! anque no les comi, diseronme que tienen unes bones amasueles. Güei toi pola mano asina que voi escribayar un poco mas.

viernes, 18 de enero de 2008

El Cogollu (Uvieu)

Diba dicir, grandisimu restaurante pero, bono, cualisquiera de vosotros que lu conozca, yo polo menos se d'un, riiriase un ratin llargu. Fuera de coñes, el sitiu ye un de a los que merez la pena dir y prebar. El restaurante ye piquiñin y nun doblen meses, vamos, que acutes sitiu y pues cenar tranquilamente que nun te van dar la brasa pa que marches, que nun va venir naide a ocupate la mesa. El casu, comida casera trata con mimo polos responsables. Sitiu perencontradizu y prestosu nel que pue xintase de forma mui afayaiza. Bones cebolles rellenes, el rau de toro nun ta mal y si me dexais siguir, los sollombos tan de muerte, nesti chigre descubri lo que yera un sollombu pertienro, vamos podies cortalu cola otra parte del cuchiellu. La carta vinos nun ta mal, curtina pero con bones entraes. Exemplu de cena, verdures a la parrilla, sollombu con pataquines, cebolles rellenes y'l amigu Mauro de compaña (que foi'l que xubio'l preciu) rondareis los 40 € persona (casi que lu podia meter en ocasines especiale pol preciu, pero nun se, meyor asina). Si tais pela parte vieya d'Uvieu teneis que prebalo, bono, meyor si pensais tar, porque o acutais sitiu o ye imposible que xinteis sobre la marcha.
Una fartura mas detallada!! otru dia mas.

jueves, 17 de enero de 2008

El Saleru (Xixon)

Otru que tranco. Agora llamase el Cicero y xintense bones pizzes y comida italiana. Ye de los mesmos dueños, pero¡l Saleru finose!!

Bones nueches, güei toca dime pelos xixones pa falar d'un chigre, dempues nun entamemos con eso de si hai mas d'Uvieu que de Xixon y este mariconaes, eh?, qu'abondu se mueve un pa poner sitios nel blog de toa Asturies :-)
Esti restaurantin ta pela parte de la Plaza'l Carmen y pertenez a una cadena de dueños qu'ente otres coses tienen el Gepetto. Dientro de la varieda de sitios que tienen, esti ye'l de mas clase y, francamente, xintase bien, amas de tarse agustu, lo cual ye importante. Nun vayais a la gueta d'una comida "fascinante", que nun lo tienen, pero si que tamien s'escapa de los tipicos chigres y dan-yos un toque a los platos. D'entamu fuimos por unos chipirones a la plancha, que nun taben mal, anque tampoco yeren na del otru mundiu, podien comese vamos, pero eso, na especial. De segundos tiramonos pol pixin y pola pluma gochu (non, el chogu nun yera de los arimaos al sucu, la pluma ye una parte'l llombu). Nun se como taba el pixin, pero'l gochu taba rico, cocinau con un poco de mazana (tou Dios y-pon mazana al gochu porque y-da un toque) y una salsina acarameliza, agua (si ya se, pero güei nun yera plan) y una copina de Duron (ribera'l Duero) crianza (coño que nun seya plan pedir una botella nun tien que ver pa tomar un plizcu vinu), un xeladin, un cafetin y unos 25 per capita. Conozco sitios meyores, pero, de verda, nun ta nada mal el chigre. Mañana, mas :-)

miércoles, 16 de enero de 2008

El H.ornu (Pancar-Llanes)

Bon descubrimientu el d'esti chigre. El pueblu de Pancar ta pegadin a Llanes capital, casi casi que podrieis dir a pie si tais per elli. El chigre da bona pinta anque tampoco ye que te de un gran impresion, pero, xintase mui bien y na caro. Podeis xintar lo que querais, pero ta claro que lo d'equi son los pexes. D'entamu xamon, esparragos y ensala mista, raciones grandes y'l xamon, anque nun yera ibericu, taba rico. De segundo toos nos tiramos pol pescau, ente otres coses porque'l que yera d'elli y nos llevo fue lo que nos dixo, amas, na carta veiase que solo tenien pescadin fresco (tolos precios escribayaos a llapiz y namas que nel pesacu que tenien, el restu borrau). Los pexes fainlos toos de la mesma manera, a la parrilla con un poco d'ayu, una poca guindilla y un plizcu d'aceite. Mui rico y na caro, vos digo que tanto los xargos, como la furagaña que nos metimos pol llombu, taben mas o menos polos 14 € la racion y, na de que te pongan namas que una cachu del pexe, non, tou'l pexe nel platu por esi preciu y frescu...buscailo perhi y diciimelo. Gran bazan Ambar pa la compaña, alreor de los 25€ por persona. Si tais pela zona, ya teneis un apunte mas pala llista.

martes, 15 de enero de 2008

La Marina (Xixon)

Un sitiu mas que pesllo. El post yera'l de abaxu, pero ya nun hai chigre :-)

Un sitiu bien conociu por toos nel que se sigue xintando perbien. Tipica sidreria a la que yo y-pongo un pero, que ye que los sitios son tan piquiñinos que tas mas afogau que un chipiron (pero como soi ñarrucu tampoco pasa na). La cabera vega que fiu yeremos un monton y toconos costera de bonitu, asina qu'entamamos por esi palu, bonitu con pisto y hala!! amestamos tolos palos porque habia foriatos na mesa, vamos, que les tapes mas variades salieron d'elli, a parte del bonitu, tamien chorizos a la sidre, chipirones fritos, afogaos, en fin, toa la varianza de platos que se puen xintar nel tipicu chigre, eso si, xintase bien y nun vos defraudara. Too ello dando-y a la sidre a mazu (sedran foriatos pero n'entrando por ella son igual que nosotros!!). Sales alreor de los 20 € por cabeza, asina que too bien. Bono, güei toi poco inspirau, asina que esti sitiu val pa aconseyar y se tais per Xixon podeis prebalu. Hala!!! mañana mas

domingo, 13 de enero de 2008

Pin de la Quinta (El Monti Canales-Uvieu)



Hola, esti chigre de toa la vida, al pie de la caleya nacional 634 ente Uvieu y Grau, merez una entra nel blog, por que? pues porque lu tornaron de chigre a restaurante. Los que teis fartos de ver una ca pinta'n blanco con un lletreru de Coca-cola, pues na, eso acabose. Agora ye una parrilla, bien puesta y pa xintar perbien con toques de güei'n dia, ya se, tareis pensando que que ye eso de "güei'n dia"?. Pues eso ye una bona presentacion de platos y toques distintos a los de les parrilles cotidianes. Vamos entamar col chigre, la parte de riba ta perguapa, colos techos altos y'l toque de la maera nes vigues. Amas, raro, la parrilla ta nesta parte. Dempues na parte baxo tien el bar, un comedorin pa xintaes en grupu y una terracina pa que los guah.es espardan lo que quieran y mas (pena que'l chigre seya de fumaores, pero...). A la hora de xintar, too perbono, cecina endolcando fua con salsina nel platu de vinagre modena Semeya 2), na primera visita taba amesta con dalgo llambion, pero na segunda solo cola vinagre de modena, secretos de gochu ibericu (meyor n'esta primera vegada que na segunda, pero abondo rico), parrilla verdures, chistorra y ensala de pulpu con gambes y pataquines a la panadera (semeya un)y too cola compaña del amigu Elias Mora xoven. Dellos postres que pidieron, cafes, delles copes...alreor de 33€/persona. Un preciu guapu pa una xinta perbona.

jueves, 10 de enero de 2008

La Casa Mexicu (Xixon)

Yo creo que casi toos conocemos esti sitiu, pero por si acasu hai despistaos, habra que ponelu. A mi prestabame mas cuando taba nel primer sitiu elli, na cai de la playa, piquiñin, perafayaizu, vamos, que'l problema yera mas alcontar sitiu y el calor que pasabes, pero tenia mas encantu qu'agora que ta n'un sitiu mas grandon y menos afayaizu. Eso si, agora tienen al mariachi dando vueltes perlli tou'l ratu, que-y da un aire (nel otru llocal como nun lu xubieren a la barra, nun se yo onde diba cantar el campeon). Lo dicho, como restaurante mexicanu sigo pensando que ye lo meyor qu'hai n'Asturies y parte l'estranxeru. Lo tipico ye entamar con unos nachos con quesu y carne que tan perbonos, siguir coles cazueles de barro de pitu y carne que vienen coles tortielles o coles quesadielles o les enchilaes, la verda ye que ta too rico, si vos gusta la comida mexicana. Prebai les margarites y xintai colo que querais claro, pero la sangria de tequila ta bona, diferente a otros chigres mexicanos, polo menos. Pa finar les llambiotaes parecenme demasiao dulces, pero al que-y presten, pues a ello. Pa finar, tequila reposao pal cuerpu. Nun ye caro, rondareis los 25€ persona. Güei toi semau nel blog. Lo dicho, afayizu nun ye, pero xintase bien

miércoles, 9 de enero de 2008

El Fromestanu (Uvieu)

El restaurante ya lu conocia, pero facia tiempu que nun diba. L'otru dia fui con unos veceros, qu'amas yeren foriatos, ente otres coses porque quedabanos mui a mano. El sitiu ta bien puestu, sobre too la partre de la entra que ta acristalao y'l segundu de los salones. Un sitiu de tratu amable, bien decorao y con una cocina rico, ensin ser mui rompedora, tampoco podemos llamala tradicional, pero too lo que xintamos taba perbono. Lo dicho, la cabera vegada que fui xintamos d'entamu tortiella de pataquines (ya vos digo que yeren foriatos) y xamon. Les dos coses taben pa prebar otra vegada, ya sabemos que'l xamon nun lu fain ellos, pero escoyenlu. De segundu tabemos en costera y pidimos Ventrisca bonitu pa toos, a la parrilla, tabens impresionante, claro ta que fue un esitu colos veceros. ¡Mira que dicime que nunca yos-dio por prebar bonitu que nun fuera'l de llata! y claro, del bonitu y vamos y pidimos ventrisca, si, soi un perru :-).
De tintu pidimos un bon Rioja crianza 2004 y, como casi siempre, yo nun prebe les llambiotaes. Como nun pague yo, nun lo teo claro, pero calculo qu'unos 40€ persona.
Otra vegada mas una bona entra pa que tengais apuntada na llista. Mañana mas, si teo tiempu

lunes, 7 de enero de 2008

La Venta'l Xamon (Pruvia-Llanera)

Esti añu hai qu'entamalu enllenu de bonos propositos, asina que vamos charrar un poco d'esti restaurante. Al mio paecer ye un de los meyores d'Asturies na so categoria, que ye la de cocina asturiana de güei'n dia. El llugarin ye perafayaizu, bien decorao y atendio y tien sitiu tanto pa bodes y delles coses como pa lo que ye dir en parexa o con amigos. El comedorin en piedra ye perguapu y vamos al xintar, que ye lo nueso.
D'entamu teneis un xamonin que presta asgaya, asina como, dependiendo de la tempora, varies ensalaes y crocretes y delles cosiquines prestoses. De segundu, bono, equi nun hai comparanza n'una cosa, en seronda suelen tener una perdiz con castañes que, amas de tar rico, baxa'l preciu de la xinta a nivel de restaurante, curioso, pero ye asina. Impresionante la perdiz, que quereis que vos diga, y mui asequible. El restu la carta, yo tiraria de carnes nesti sitiu, faceisla con sollombu de xata con tocin y foa o'l de güe, que tamien tien del de Kobe, nunca lu prebe, digovoslo, por si vos apetez, anque ya vos digo que'l preciu'l platu d'esti güe nun ye pa toos, agora, que tal comu lu ceben los xaponeses, debe ser la hostia. Resumiendo, un dia quereis quedar bien cola mocina y...como marqueses vamos..Ye que los de Llanera nel fondu, ya sabeis como somos jeje. Bona carta vinos y si xintais el xamon, la perdiz y faceis compaña con un Muga, saldreis alredor de 30€persona, si vais pol carne o otres coses, xubireis el preciu, de toes formes, el sitiu merezlo. Hala, mañana mas!!

viernes, 4 de enero de 2008

Los Panchos (Muñera-Llaviana)

Güei ye un dia como cualisquier otru pa falar d'un sitiu pa xintar (anque nestes feches temos toos ya como gochinos dempues de tanta folixa). Nesti tour fartonicu voi falabos d'una parrilla n'un pueblin de Llaviana. Si lo pienses bien, nun tendria na de diferente con otres parrilles, incluso la decoracion nun ye na del otru mundiu, pero tien una cosa, que la verda, pa mi fue una sorpresa total. Entamamos la cena con ensalaes perqui y perlli, tables d'embutios y delles coses normalisimes (riques eso tamien), pero'l platu fuerte fue'l gochu a la estaca. Francamente, corderu si, pero, gochu?. Llevaronnos unos amigos de la zona y hai qu'encargalu'l mesmu dia pola mañana. La verda ye que nun prebara'l gochu asina y dai un toque. Ta perxugosu, perbono, con un tastiu diferente polo menos. Aconseyovos prebalu. El sitiu, como vos dicia, nun ye na del otru mundiu na presencia que tien, pero, mira pa dir unos cuantos dempues de dir de monte y prebar un gochu rico, tampoco vamos ponei falles. Por ciertu nun m'alcuerdu'l preciu, pero nun yera caro. Ah! y cenamos con un vinin normalin de Rioja