lunes, 25 de abril de 2011

Puerta del Carmen (Granada - Andalucia)





Salir per Granada ye como facelo per Lleon o per Xixon. Vamos, que tomes tres cañes y tas fartu pinchos. Dau l'estau "cañeru" dempues de pasar pela plaza de Santu Domingu y otros llugares de Granada en plan cerveceru solitariu, al final de la tarde solo me quedaben fuercies pa dir picar dalgo. Un gran sitiu pa facer esto, o xintar mas en seriu, ye'l Puerta del Carmen, en plenu centru de la ciuda. Esti sitiu, que ya tenia controlau de visites anteriores gracies a los anfitriones, llamome de pasu al hotel con unes mesines fuera y una temperatura estupenda pa tar en meta de marzu.

Per dientru, una barra grande y un decorau mas asemeyau a una cervercia del sieglu XIX pero coles cañes de Cruzcampu a la temperatura perfeuta de serviciu. Paradina obligada, ensin dulda pa finar la tarde-nueche tranquilu. Xinte fuera, onde tienen unes meses cuidaes de maera y unes sombrilles qu'a les 22:00 ya nun facien falta. Serviciu impecable y profesional qu'entruga primeru si quies cenar o solo "cañear". sin contestes "la uno" (como nos tests) van traete unos entamos d'aceitunes y pataquines de bolsa con una varieda de panes que diba dende'l pan normal a los picos con tastos diversos y la obligada caña (pa nun camudar el palu, nun fuera que nun garrase el avion del dia siguiente).

Media cañuca dempues de pedir llega'l primeru. Media racion de mojama d'atun (por eso del sur) que vien acompañau d'unes almendrines y moyau n'un plizcu d'aceite d'oliva virxen (semeya un). Estupenda "media racion" de tamañu con una mojama abondo rico de tastu y lo xusto de salada (hai vegaes que paez que tomes sal con atun). Prestome, asina que a la otra cañina y a pol segundu.

Calor y sur, toca ensalada d'atun colorao (semeya dos). Bona racion con abundantes cachos d'atun semi-crudu que deben tener en dalgun tipu de conserva, pero que taba realmente bono. Llechuga y demas verdes salteaos con piñones y grandina (nun podia ser menos, digo yo) y un aliñu perbono que tiraba a dulce (nun se que yera).

Un pica-pica tirando a cena que salio por 38€ y que merecio la pena. Un bon sitiu en meta de Granada pa facer una paradina.

miércoles, 13 de abril de 2011

Hotel Altamira ( Santiyana del Mar - Cantabria)







A vueltes col repasu del viaxe pela Meredia Santiyanera teo de volver a deteneme n'otru sitiu abondo interesante. Como ya vos comente, nun ye que Santiyana tea nel top 10 de la gastronomia española, pero pue xintase bien en dellos sitios. N'esti casu falamos del Hotel Altamira que debe ser un clasicu del pueblin. Ye clasicu tamien polos platos qu'ofrez y la manera de preparalos, eso si, xintemos estupendamente.

De primeru pa compartir alcontreme cola alcordanza de la xuventu (eh, eh, que nun soi tan mayor!!) unos cascoxinos que taben pa llamber el platu. Alcuerdome de nenu cuando diba con una vecina del pueblu a por cascoxos a los praos dempues de que lloviere y volviemos a la so casa con unes cacaes d'esos cascoxinos tan tipicos de rayes marrones escures, metelos en serrin y entrugar varies vegaes que cuando podiemos xintalos, "en unos dies" yera la respuesta de siempre. Pues eso, alcontreme sinon cola mesma receta, una per paecia, mesmos cascoxos (y nun paecien de caseria porque la vegada que los prebe tenien un tastu munchu mas sele qu'estos) y un tastu estupendu. Salsina con cebollina, tomate y pimientos, guisadinos y uhmmm, esi tastu fuerte entrando pela boca. Una bona racion que prestome munchu (semeya un) y reconozco que casi los xinte toos yo :-)

De segundu siguimos con dos platinos clasicos pela mio parte un gochin abondo bien preaprau con unes pataquines a la panadera fritines. El gochin tostadin per fuera, sele de tastu y tienru, mui castellanu, por definilu d'alguna manera. Solo sal y agua, nun tenia mas na preparacion y bon productu. Otra racion considerable y bien prestosa (semeya 2).

Pela otra parte de la mesa l'escoyiu foi un xargu, recomendau pela camarera fuera de carta como un "h.argo" recien pescadin (pa que dempues digan de la llingua). Mediu xargu preparau al llombu con aceite y un plizcu d'ayu (ensin pasase) con un par d'amasueles y gambes pa presentar. Ricu y frequin, de nuevo bon prodcutu y prestosu. Una racion mas piquiñina que les anteriores, pero mas que suficiente (semeya 3).

La compaña fiximosla con un Sierra Cantabria cr 2006 (nun vos espereis una carta de vinos amplia y innovadora) que ye un vinin que me presta munchu y amas, anque nun seya la "tierruca" eso de "Cantabria" paez que s'imponia :-)

Un par de cafes con xelu y 37€ per cabeza que mas nos presto pagar colos tickets restaurant (si, si sorpresa, almitenlos).

Bon sitiu pa cenar si tais hospedaos en Santiyana.

sábado, 2 de abril de 2011

Parador Gil Blas (Santiyana del Mar - Cantabria)









N'esi fin de selmana d'esfrute gastronomicu n'esta zona tan, podiemos llamala con tou'l cariñu del mundiu Astur-Cantabra, y enantes de finar nel Annua, recibionos colos brazos abiertos la so capital, Santiyana del Mar. Escontra del "saber" popular nun ye la de les tres mentires. Solo una, que nun tien mar, porque Santa tien - Iyana- que dexa la otra mentira pa prau, ya que "Llana" ye'l tipicu estrozu toponimicu al que los asturianos tamos tan avezaos (y ya valio d'entamu cutural).

Magnifica Villa na que presta pasear en epoques como febreru, ensin turistes y qu'anque nun destaque nel top 10 culinariu español, si que tien dos sitios de los que merez la pena falar, polo menos pa mi, el Parador y'l Hotel Altamira (pa otru post).

Voi diciendo de manu que nel Parador nun puedo falar de precios, ta claro que nun foi la fama de bloguer, pero convidaronnos a la cena, asina que nun pueo falar de RCPs nin na que se paezca, solo de la xinta y eso ye lo meyor.

Dempues de pedir, sorprendennos nel Parador con un entamu de la casa (pa ca un!) que pudiere ser un primeru tranquilamente, dempues d'esto ya nos sobraba la ensalada (semaya un). Esta costume de los paradores gustame, dempues de la cigala de Monforte de Lemos llega esti platu con un caldin de cocidu, un par de llangostinos rebozaos mui ricos, quesu de la zona, un par de pimientos con brick (o como s'escriba) d'eso y un plizcu de verde. Todo rico, na espectacular, pero un bon comienzu.

Pasemos dempues al platu de compartir, ensalada de bonitu (semaya dos). Una ensaladina na que destacaben les conserves, tanto la ventrisca de bonitu como les anchoes de Santoña que y-daben un gran toque al restu, que yera lo esperable, una bona "Florette" con aceitunes verdes y prietes. Fresco pa entamar y camudar el tastu del entamu y una bona racion. Prestosa.

De segundos vinieron les difierencies de peticion, la muyer dio-y al Rodaballu por conseyu del Direutor y yo di-y al "Jarrete" de xatu. El rodaballu taba perbonu (semeya tres) preparadin a la espalda solo con un plizcu d'aceite y un poco de cebollino y perrexil. Estupenda racion bien prestosa y bien preparao.

La preparacion del "jarrete" yera guisao (semeya 4). Perbonu, unes pataquines cocies, unos pimientinos de Padron y una carne estupendo bien guisao. Buf, pa fartase. Perdonai el mio desconocimientu tanto del castellan como del asturianu porque tuve qu'entrugar que parte del bichu yera'l jarrete (la parte alta de la pata) y creo que lo mas aprosimao ye llamalo corveyon, pero nun exacto, que'l corveyon ye'l xuegu de la pata y esto ye de la pata pa riba.

De compaña un Matarromera 2007 Cr. La carta de vinos resultome clasica (normal pa un Parador) pero nun tenie munches entrades. Quedemos con esti vinin que perdio abondo dende que lu conoci, pero qu'entovia da munchu xuegu en nueches como esta. Un par de cafes con xelu y pala camina.

Si pasais per Santiyana ye una bona opcion parar equi, eso si, mirai el preciu, nun vaya ser.