martes, 23 de septiembre de 2014

Ad Astra - Café Inglés (Silves - Algarve - Portugal)




 Ad Astra / Café Inglés, dos nomes pal mesmu llocal, o casi. Ad Astra ye la pizzería del Café Inglés y sitúase perriba del mesmu, n'una terracina que domina Silves cola Sé (Catedral) a un lláu y'l castiellu detrás. En resumen, les vistes y la pizza son el so atractivu, la pena ye que nun pues pidir otra cosa, si quies comer aquí, el menú ye pizza. El Café inglés, pola so parte abre una terraza nel descansillu de unes escaleres, unos metros per baxu de la terraza alta del Ad Astra y tien la ventaxa de que pues comer de too y la pizza tamién ye la mesma que la del Ad Astra.

Los fines de selmana tienen música'n vivu y cualisquier del sitiu qu'escoyáis ye prestosu, a nosotros prestamos despedinos del Algarve con bona temperatura y al aire llibre esfrutando colos peques de una cena "de mayores" ensin prieses. Aviso, lo que tien (foi la pimer vegada que me dí cuenta) apaecer en "Le Routard" (como odio les guíes de viaxe qu'etiqueten los sitios con cartelos) ye que los precios nun son mui portuguesos, ye lo qu'hai, tamién pagues el sitiu.

Falando de comida, lo que merez la pena ye la pizza, mases fines, fornu de piedra, puntu xugosín, vamos, que tan bones, nel casu de los peques (d'esta cenaron poco) una de xamón y quesu pa compartir (na semeya ta una metá, más o menos d'una de gambes del añu pasáu :-) ).



La comida de los mayores, pues bono, pasable, ensin muncha imaxinación al componer los platos (los dos teníen lo mesmo), cocina normal. Un llombu d'atún normalucu pa mí y unes gambes al curry que nun taben mal pero a les que yos-sobraba curry per tolos llaos.



En resumen, pagues más el sitiu que la comida, pero como relax y fin de fiesta presta, la prósima a pizzes y santes pascues. La nuesa recomendación, pizzes na terraza del Café Inglés :-).

Vinu blanco algarveñu de la casa, 1 de agua grande y un café con xelu por 68€, lo que sal (ente 3) a 22,7 € / persona que ye, con diferencia, un de los sitios de peor RCP de Portugal a nivel de comida, que si posteo, ye por otres razones, magar que la pizza tea bona.













viernes, 19 de septiembre de 2014

A Gaivota (Ferragudo - Algarve -Portugal)

Ferragudo ye'l pueblín que vese dende Portimao al otru lláu del Riu Arade, menos turísticu que Portimao (lo que nun quier dicir que nun lo seya) tien una plaza peranimada de nuechi con un montón de chigres y bares n'ella y alrodios, onde poder tomase una caipiriña munchu más barata qu'en otros pueblos de la zona (en Carvoeiro, por exemplu, que ye un pueblu fechu pa guiris, los precios nun son nada portuguesos).

A mi prestame baxar hasta la plaza pela mañana a mercar dellos pescadinos para cenar,  magar que n'esti casu tabemos tan agustu que decidimos cenar los 4 na terracina del A Gaivota, ensin munches espectatives  previes, solo aparovechar la nuechi y la bona temperatura en un "sobre la marcha" de los que tantu presten en vacaciones.

Sorpresa agradable dende'l puntu de vista gastronómicu, too percenciello, nun busquéis complicaciones que nun ye'l sitiu. Los mayores xintemos dos dorades de ración, pero xabaces, a la plancha; Perbien feches, col pelleyu turriadín y la sal xusta, el puntu un poou más pasáu del que la ponemos perquí lo que ye normal ellí al pedir un "grelhado",  4 ayos pa decorar per riba y cuatro verdures perfeutes de puntu. Ensin más, perprestoso.


Los neños tuvieron diferencia de pareceres na eleición y anque dengunu de los dos son grandes comedores (de cantidá) hai vegaes, como esta, que cuenten como mayores a la hora de pidir, que la playa y l'agua dan una fame de la virxen.

La esfamiada pidió un "cachorro" (perrín caliente) que nun taba fechu como tais pensando, yera una pedazo de salchicha metida dientro de una fogaza de pan de verdá que nun l'asaltaba yo y de la que sólo dexó un mínimu de pan cuando finó cola carne.

Don sibarita decidió llantase una docena de gambes a la plancha que taben pa rellambese y de la que la madre y yo sólo pudimos dar cuenta de una cada un, grrr :-). Prestoses, mui riques y de bon tamañu.



De compaña un vinho verde, de verdá que equí entren solos con esti calor, creo que un Gazela pero andaben toos al mesmu preciu, una botella d'agua grande, 2 xelaos de Frigo (Olá) y dos cafés con xelu. Siento insistir, 23% de IVA y menos de 13€ por cabeza, la cuenta nun llegó a los 52€.

Si tais pela zona recomiendovos dar una vueltina per Ferragudo un día, que por ciertu nel Carmen n'agostu tienen una prestosa procesión mariñana de barcos.





lunes, 15 de septiembre de 2014

Bacalhoada (Portimao - Algarve - Portugal)




El Bacalhoada ye un chigre nuevu (tien como un añu), situau na zona del puertu de tola vida (non el deportivu, l'otru) a la vera del ríu Arade. Una zona na que se mecen los chigres más turísiticos (como la del paséu ente pontes, onde hai milenta d'ellos seguidos que basense nes sardines) y los de tola vida. Gracies a la razón nomada "coincidencia colos güelos cerca de vacaciones, que quieren quedase colos ñetos na piscina del so hotel un nuechi") escapemosnos hasta Portimao a prebar el Donna Barca, recomendación en Portimao que nos fain tolos años, pero ¿qué quereis que vos diga? foi ver la cola que se monta pa pidir mesa y la pinta guiri del chigre que quitaronsenos les ganes asina que decidimos dir a la gueta dellos más, a ver.

Dionos perbona pinta esti, llocal afayaízu (na parte de baxo, nun acuteis na de riba) coles meses abondo separades (pa lo que suel ser Portugal) y tou enllenu de portuguesos, lo que motivonos lo suficiente pa quedanos y prebar.

Que diben tener bacalláu taba claro solo col nome del chigre, agora, resulta que'l 99% (menos dos platinos de mariscu) de la carta son bacalláu, ¡incluso los entamos!! asina que al que nun-y guste'l bacalláu que de por lleida la entrada :-). Na carta había hasta una pizza...de bacalláu, claro.

Decidimos prebar la "punheta" d'entamu y un bacalláu al fornu, que na carta ya alvertía que yera pa dos persones.

La punheta de bacalláu nun ye que te faiga l'idem, ye una "ensalada" de bacalláu crudu con cebolla y aceitunes negres con un poco sal y aceite d'oliva. La verdá, interesante de prebar y rica.

De segundu, llegó el bacalláu al fornu pa dos, opción que mos paeció más interesante que'l restu porque tienen muncha manía de preparalu amestáu con boroña (broa), mantega, etc..,variantes que nun prefiero a un cenciellu "al fornu".

N'esti casu, perbien preparáu, dos llombos de tamañu considerable, bien preparaos y xugosinos coles pataques alrodiu y una salsina de pimientos, tomate y aceitín. Ensin más, prestonos y esfrutamoslu abondo xunto con un vinho verde (Varadas de Monçao) que, como la mayoría d'ellos, son vinos frescos, con dalgo d'aguya y que palos 30º a la solombra que fain perquí sienten estupendamente.




Panes, aceitunes, un café con xelu, un vinín d'oporto de postre, 23% d'IVA, na zona más turística de Portugal (l'Algarve costa) y cenemos por menos de 16€/persona. Sigamos el camín que seguimos n'España a ver cuantos foriatos camuden de raya a dexar les perres en Portugal, nosotros na hostelería a lo nuestro.

Sitiu prestosu pa los que yos-vaiga'l bacalláu :-)