Casa Gerardo (Priendes-Carreño)

Apurando los caberos dies de fartures enantes de tener de pesllar el blogue por un timepu, decidimos dir a prebar una de les mas reconocies Estrelles Michelin d'Asturies, eso si, un dia primero de que'l Madri acabare cola comida (creo que diben güei a xintar, garraron fuercies y llantaron 4 nel Molinon). Como yera la primer vegada que dibemos quiximos parar nel bar a tomar un vinin pa dempues pasar a xintar. El bar ta mui guapu, modernin y lo que mas me presto foi la bodega esa de cristal y metal nel que tienen tolos vinos a la vista, pena de "Euromillones" pa poder poner una asina en casa. Pasamos al comerdor de non fumadores, nel primer pisu con una decoracion ente moderna y tradicional, perafayaiza. Tomonos nota Marcos Moran avisando de que mio gorrin diba tardar unos 35 minutos, asina que casi nos fartamos a entamos de la casa. Como detalle pa entamar punxieronnos una mantega casera (mas bien como una mouse de mantega) con mazana que taba perbona, tan bona que colo rico que taben los panes (de maiz, de cereal, de trigu...) casi entumbo. Como siguien engarraos col tiempu del gorrin traxeronnos dempues una cremina de verduras con un poco de pasta brick, mui rica. Ya casi fartos de tantu pan vinieron los oricios (semeya un), platu cenciellu, simplemente güeves de varios oricios presentaes dientro d'un, paciencia pa sacar les güeves y presentales asina. Los oricios casi crudos, solo un golpin de calor, vamos, como a mi me gusten. Una perla de llimon dientro que facia bona compaña anque yo prefierolos solos. Por fin fizose'l gorrin y llegaron los segundos. Tienru, con un gran tastu, mui tradicional y col pelleyu tostadin, de 9 (semeya tres). Punxieron una confitura de naranxa a la vera por si m'apetecia amestalo col gorrin, prebela, pero mazcaraba munchu'l tastu y elli quedo. Pero, ay amigu! si'l gorrin taba bono, el pitu yera de 10, impresionante, nun hai mas pallabres, prietu y tienru, xugosu, preparau como tola vida (una salsina d'aceitin y cebollines per baxo), mui, mui rico (semeya dos). Que mano hai na cocina porque un cachu yera pata, pero l'otru cacahu yera pechuga que ye mas dificil de dexar xugosa. Bones raciones, bona fartura que finamos con unos cafetinos y una copina de Sidre de Xelu canadiense (Neige), ya sabeis que yo nun llego a los postres nunca (pena porque tenia ganes de prebar l'arroz con llechi, pero yera imposible, el mio butiellu nun daba pa mas). De compaña un Abadia Retuerta 2006 y la sorpresa llego col preciu, 57€/persona, la verda que mui bien. De les Estrelles Michelin d'Asturies prebaes quedome col Corral y esti. La verda que pasamoslo bien, atedieronnos xenial y xintamos como campeones. La cocina mas tradicional de les Estrelles Michelin que conozco, pa mi ye'l que mas guarda esi puntu. De momentu El Corral y Casa Gerardo son los mios preferidos. Si teneis que entamar por dalguna Estrella, esti ye un gran sitiu.

Casa Monchi-Bar Antuña (Valdesoto-Siero)

Otru sitiu en Valdesoto nel que xintar estupendamente. N'esti casu tamos falando d'un chigre de siempre, de tratu amable y comida rico, que ye de lo que se trata, amas de tar llimpiu y cuidadin. Bar pa char la partidina (la que podeis char dempues de la xinta) y comeor afayaizu. Comida contundente, raciones grandes y precios piquiñinos. Tenemos la costume de dir cuando ñeva y visto de nuevo los cm de ñeve'n casa, ¿onde meyor que dir?, pues a Casa Monchi. Por ciertu qu'en La Pola, Valdesoto y alreores, güei nun quedaba nin una gota ñeve, en fin, paez que vivimos n'alta montaña porque'n casa quedaba abondo. Como vos contaba, chigre de comida contundente, caserina y prestosa. De primeru una ensalada mista de les de siempre, bien presentada y munches cosiquines, bonitu, esparragos, aceitunes...normalina pero rica (semeya un con mano de trasguina de 17 meses intentado garrar el bonitu). De los platos contundentes un bacallau de la casa, que preparen mui rico con les sos amasueles y gambes y sobre too la salsina allangostadina cola que va (semeya dos). Carne guisao con pataquinos y arbeyos, enorme racion pa un solu y carne mui rico (semeya tres, y paez que güei naide queria esperar a la semeya y venga meter les manes!). Bono, eso los demas, yo a lo mio, si vengo equi ye polos callos (semeya 4), tastu fuerte, con un plizcu de xamon, pero trocinos seles y tienros, piquen lo xusto (anque yo siempre yos-echo un plizcu mas de guindilla'n polvu). En resumen, unos callos coyonudos. Pa beber, sidre Muñiz y una botellina de Rueda blanco Vega de Zarzales. Equi lo de los vinos ye cuestion d'entruga-y al dueñu, porque na carta nun vais ver na que vos llame, eso si, nosotros vimos un "albariñu cosecheru" por 6,60 € y, como nun quedaba, traxeronnos el Rueda esti, que mira, nun taba mal. Dos postres non caseros (caseros hailos, pero paez qu'apetecio mas unos tipo xelau pa baxar la xinta)...22,4 € por cabeza, meyor RCP imposible.

Casa Alvarin (Aviles)

El domingu pasau siguimos col dia raru de Ribedeo volviendo per Aviles. Cutu, vientu y poca xente na cai pa tomar el vermutin. Tando equi apetecionos tomar pexe, asina que cualiquiera que conozca Aviles (yo conozcolo poco) va dicite que'l Tataguyo, el Moises o'l Alvarin. Como nun ta'l fornu economicu pal Tataguyo, col cutu que facia y lo poco que conocemos Aviles (error, gran error nun conocelo bien) nun habia manera d'atopar el Moises y decidimos quedar nel Alvarin (a la vera la Casa'l Conceyu). Pa un d'Aviles nun hai munchu que contar, chigre de tola vida con bon productu (como pudimos comprobar) y cocina tradicional. La sidreria ye un plizcu "fria", pero tien un par de comedores, un de fumadores y otru que non, abondo afayaizos y bien separaos por una porta de cristal automatica. Mantelinos de verda, servilletes de tela y ambiente ensin fumu, raro pa una sidreria, solo quedaba ver si la xinta taba bien. Decidimonos pol menu de fin de selmana, cazuelina de gules con setes, racion grande y bien rica, sobre too por unes setes que taben especialmente carnoses y sabroses y unes gules nel so puntu (avisu pa los sensibles a la comida caliente, ¡¡soplai bien que quema!!. Semeya un). De segundu decidime pol bacallau a lo Alvarin (semeya tres) y pel otru llau de la mesa merlucina a la cazuela ensin cazuela (debieronse-yos acabar con tanta gula. Semeya dos). El bacallau, nun llego al puntu d'entusiasmame, quiciabes porque la salsa tenia munchu pimientu, nun taba mal, rico pero non mas. Eso si, la merluza (mira qu'a mi nun me da mas por ella) taba que se salia, fresquina, con tolos ingredientes de compaña bien ricos y con gran tastu (a mi paezme dificil que la merluza sepa a dalgo). Dende llue nel Alvarin tienen bon productu y abonda bona mano coles coses. Pa beber dos botelles de Sidre Peñon, que meyoro munchu dende la cabera vegada que la tomara y dos cafetinos. Bona relacion calida preciu ya que salimos a 23,5 €/persona. Si conoceis Aviles nun hai mas que falar y, si nun lu conoceis, ye un bon sitiu pol qu'entamar.

Villaronta (Ribadeo-Lugo)

Fin de selmana raru, nun digo feu, digo raru copiando a Don Fito Cabrales. Raru porque marchamos pa les galicies nel meyor momentu (vamos que vaya temporal qu'hubo na mariña Llucense) y sobre too, porque'n Ribadeo entovia deben tar coles veles porque nun hubo lluz dende'l vienres de nuechi, asina que menos mal qu'onde tabemos tenien xenerador y lluz habia, pero nin agua caliente, nin califacion y lo peor de too, los chigres pesllaos o ensin cocina!!!. Menos mal que siempre pue contar un col Villaronta, chigre gallegu de los de verda onde les 4 coses que preparen tan pa rellambese, eso si, hai qu'aguantar a la teniente O'Neil (ye dicir, la dueña) organizandote la mesa (les servilletes ehi, el pan pa riba, etc...) pero como yeremos 4 en plan de güevu, como que la cosa tenia la so gracia y riimonos un monton. El chigre, en plenu centru, ye de los de toa la vida cola meyora de que nun sales goliendo a cocina. Puestu abondo guapu con piedrina tien dos tipos de meses, les de bancu corridu o les de 4 persones, eso si, perxuntes, pero equi a lo que se vien ye a xintar. Pa compartir pidimos 2 de pulpu colos cachelos aparte (perdonai les semeyes pero alcordeme de sacales cuando llevabemos un ratin dando-y a la comida, semeya dos). Un pulpu perfeutu de tastu y sele que se desfacia na boca, lo dicho, perfeutu. Una de calamares a la romana, perbonos, bien preparaos col rebozau xustu (semeya un), una de muxones al vapor (impresionantes) y una de quesu con ñueces y dulce, mui rico y eso que'l quesu tienru nun ye'l que mas me presta. De compaña ribeiro'n taza...nun m'entrugueis cual. En resumen, un chigre gallegu tipicu con bona comida, ensin complicaciones, nel que nun pues tomar el cafe na mesa, nin pagar con tarxeta, cosa qu'ayeri daba lo mesmo porque nun furrulaben nin los caxeros, nin los datafonos. Si tais perqui y vos apetez dalgo de tola vida, ye un gran sitiu, ah! y 12€ por persona...tremendo!.

Casa Vitoria (Les Caldes-Uvieu)

Esti finde cayo un mini-tour gastronomicu pel conceyu d'Uvieu. El sabadu xinta d'amigos nel nuesu queridu "Les Viñes" de Puertu nel que xintamos como campeones y qu'aproveche pa sacar una semeya al pitu y xubila al blogue, por ciertu, que nunca lo prebara, pero prebelu el sabadu y vaya arroz con llechi!!, tremendu. Debio ser por tar el sabadu pela zona que nos dio por dir güei a prebar Casa Vitoria nes Caldes. Chigrin bien puestu y perafayaizu nel que pues tomar una botellina de sidre fuera n'iviernu porque ta bien orientao y pega'l solin (palu de Llagar de la Ferreria). El sitiu ta mui guapu puestu y tienen un menu palos carnivoros y pa dos persones que yo nun pude xintar pero que tien bona pinta, de chuleton de güe. Pola nuesa parte tiramos de carta y vimos dos coses que se salien un poco de la comida tradiciona y que, claro, cayeron. La primer d'ella fueron les crocretes lliquides d'afuega'l pitu, de les que pedimos media racion (semeya un). Pues bien, conseguides y abondo riques, pero, son mas dificiles de xintar que robar nel Bancu España. A ver, les crocretes lliquides d'Al Son del Indianu tienen un tamañu pa entrar na boca del tiron y amas el lliquidu ta na temperatura correuta (nin frio, nin caliente). Al primer intentu escalde'l cielu la boca, madre mio, claro, meti na bocona tola crocreta (que ye mas grande de lo recomendao pa esto) y l'afuega'l pitu salio tamien mas caliente de la cuenta, resultau un tragu vino rapidu. Pel otru llau de la mesa intentaron cortala nel platu col resultau obviu...tou'l quesu pel platu. La manera alcontrada, garrar la crocreta cola mano, da-y mordisquinos y dir poco a poco. Fuera de coñas y teuniques, taben mui riques. El siguiente entamu, los esparragos verdes firtos con setes taben bien conseguido y mui ricos (semeya dos). Los segundos fueron normalinos, bien pero ensin emocion. Los papos de xatu correutos de tastu y testura anque ya los xintamos meyores. Pola mio parte decidime por otra prebatura, callos con setes y gambes, que se salien de lo normal nel nome, pero non nel platu. Los callos bien preparaos de puntu, pero con tanta verdura (calabacinos incluidos), sete y gambes, tenien que tar mui seles pa uun machacar el restu y...vamos, nun me dieron mas, pa mi nun acertaron cola combinacion y quedaro unos callos "amariconaos". La compaña fiximosla con 1/2 botellina de Ramon Bilbao crianza y agua de Quess (esto de la DXT ye lo que tien). En total 25€por cabeza. El sitiu llevo l'aprobau xustu. Teniendo "Les Viñes" a un pasu creo qu'equi vendre a tomar el vermutin enantes de xubir a xintar a Puertu, a no ser que consiga parexa pal menu del chuleton!!. Un abrazu pa toos

Fitumar (Playa La Espasa-El Visu-Caravia)

Dempues de les ñevaes que lleven cayendo dende'l dia de Reis, ayeri y güei tuvieron bien prestosos col cielu escamplau y'l solin caldiando'l dia, asina que, ¿por que non dir a la Playa a ver les foles y disfrutar d'una xinta?, pues eso fiximos. Allegamosnos hasta La Espasa onde hai un chigrin en primera llinea de playa qu'en branu ta hasta los estadoños, pero que supusimos que n'iviernu nun sedria pa tanto, y del que nos falaren abondo bien. El chigre ye eso, un chigre llimpin con dos partes, la de sidreria en primera llinea y la de restaurante un plizcu pa tras. Si quereis ver la mar lo mesmo da, porque'l restaurante ta un par de "escalones" per riba de la sidreria y vese perfeutamente. Queriemos picar dalgo, pero na sidreria taba enllena xente asina que pasamos al restaurante y, nun se, sedria que ver los mantelos de verda llamonos picar dalgo mas que calamares y punximonos a ello. Pa compartir pidimos unes amasuelines a la plancha, mui riques, fresquines, de tamañu mediu (tirando a piquiñines, pero ensin ser raquitiques), bon puntu sal y racion abondo abundante (semeya un). Dempues de ponenos como'l quicu, entafarranos les manes y da-y a prebar una amasuela a la neña (que van y y-gusten...¿a quien saldria?) pasamos al pexe. Tamien lu queriemos pa compartir y resulta que tenien un tiñosu de racion y media y eso fue lo que xintamos, un tiñosu al llombu. Llamonos l'atencion que fuera al llombu, normalmente esti pexe suelen ponetelu al fornu o la cazuela, pero alla que nos punximos a da-y vidilla. La verda que fresquin y muy ricu, bien de puntu (a esti, como al pixin hai que da-yos un buen puntu pa que nun queden "gomosos"). Unes pataquines a la panadera per baxo y una salsina que taba pa rellambese col so aceitin y llimonin de siempre. Taba un plizcu pasau d'ayu, pero'l tastu que dexo fue'l xustu pal platu y, si nun quies comelos, con apartalos a un llau del platu, santes pascues. Les raciones podien colar como dos, pero tuvieron el bon detalle de cobranos la 1 y media pa lo que nos dixeren que daba y eso, que ensin conocenos, pudieronnoslo cobrar ensin problemes. Ya nun pudimos aguantar mas a la fartonina na trona, asina que nun tomamos el cafe y marchamos a dar un pasein pela playina d'Espasa, que bien que prestaba facelo güei. Ah! la cuenta nun llego a los 20€/persona (bona calida/preciu) con una botellina de sidre de Buznego, que por ciertu, nun taba mal, pero creo que nos chigres deberien renovase y ponenos una carta de sidres, eso de que solo puedas escoyer ente una o dos marques (o nin eso, como güei) paezme del Neoliticu. Bono, ya tenies un chigrin nel que xintar ensin pretensiones y nel que vi pasar munchos "potes", "fabades" y carne asina que'l que vaya y nun xinte pexes tien otres opciones, a nos prestonos lo que xintamos.

iSidra (Asturies)

Bonos dies, nun soi dau a articulos d'opinion, pero n'esti casu voi facer un pola so trescendencia que tien palos fartones asturianos. Añu nuevu, vida nueva y'l Llagar Piloñu sorprendionos a toos el dia los inocentes cola Sidre ensin alcohol. Dexando unos dies pa ver si yera o non verda, paez que la noticia ta confirmada d'arreu. Taba visto qu'esto tenia de llegar, agora la dulda que me queda ye si furrulara. De xuru qu'habra xente a la que-yos apateceran unos culines ensin mieu a los puntos (los de la DXT y los melicos) y ta perbien pa dellos que nun puen tomar alcohol pero yos-presta la sidre. La dulda ye ¿que sedra de nos, los asturianos?. La sidre ye, sobre too, una bebida social, ¿que pasara coles charres de chigre ente collacios, agora?, ¿van tener que ser toes series?, ¿nun vamos pasar a la exaltacion de l'amista?, ¿vamos falar de Madoff y la crisis tou'l ratu?. ¿Que va ser de los cancios de los chigres?, lo probes ya son rara avis, entamando por mi, que nun paso del paxarin parleru (y dai gracies toos, porque coles oreyes que teo pa la musica...) y siguiendo por supuestos chigres onde nun se pue cantar, agora llega un de Nava y diz que-y demos al palu ensin alcohol. Agora nes sidreries tendremos qu'andar con cuidadin, nun seya qu'al chigreru nun solo y-de por escoyer si tomamos del palu bonu o del malu, a ver si nos va dar del "ensin" y nin garramos. En fin señores vamos entamar a dir al chigre con un llibru, que como esto s'esparda na socieda, van ser abondo mas aburrios.
Del nome escoyiu, ya nin falo, "isidra", pue ser un homenax a la so güela, o bien quir dicinos que con esta lo que vamos tener son "i-mangades" virtuales, siendo asina, ta bien escoyiu.
Con too, aplaudo la iniciativa y los "propios" del Piloñu. Por ciertu, el primeru que vaya y abandone'l camin alcoholicu na sidre, que nos diga a que tastia, yo mantendreme fiel a mis 5,5º y a les babayaes que se dicen dempues d'unes botellines.
Prestosu añu ensin alcohol pa toos :-)
Mas info