El Rompeolas-El Rompefoles (Tazones-Villaviciosa)

¿U la felicida?. Hai xente que ye feliz tou'l dia y nun se sabe porque, hai xente que nun ye feliz nunca porque necesiten munchu y hailos, como yo, que d'arreu sorrien, miren alrodiu y piensen "esto ye vida" y sientense felices un ratiquin. Nun ye una cosa solo lo que lleva a esi estau, mas bien la conxura universal que fai que pequeños fechos arrexuntense nel momentu precisu, la compañia, el dia, el solin, la xinta, la mar...nun se, depende'l momentu. Estes, otres o toes xuntes, eso foi lo que mos paso'n Tazones un domingu caulisquier d'esti mes de mayu.
Nun hai munches mas razones qu'espliquen lo bien que tuvimos. Unes gambines a la plancha (la mesma plancha na qu'a mi siempre se me pasen un plizcu mas) col puntu perfeutu, xugosines, xustes de sal, un tamañu guapu, una racion suficiente y un tastu mariñan que daba gustu (semeya un). Un rubiel pa dos persones, al fornu, que nun entraba nel platu, con una salsina con un plizcu de tomate y otru de pimientu, un detalle raru pa un chigre de zona turistica como'l de emplatanulu sobre la marcha quitando-y les espines y, por supuestu, un bichu que taba de muerte (semeya dos).
Sol, tres botellines de sidre seleicionao d'Orizon (Novalin), el nuesu Cantabricu como un platu, otra vegada'l sol, dos cafes con xelu y un "güei puen da-y pol...a la crisis". Los 35€ por cabeza fueron pa la Mastercard, el restu, impagable.

Casa Genio (Mieres del Camin - Mieres)

Casa Genio ye un chigrucu de Mieres con ganes de facer coses diferentes pero na mesma vegada manteniendo el calter de chigre y los sos menus del dia. Aire modernu pal chigre de siempre y con mantelos de verda.
Tres de acutar a una hora prudente ente selmana (esto ye broma, yeren mas de les 15:00) seguia tando enllenu xente y con munchu trasiegu.
Decidimosnos pol menu del dia (15€) pero con un chateo de Ribera del Duero (varies copes) y finando con unos cafes con xelu que dexaron la cuenta n'unos 17€ por cabeza.
De primer platu decidime por una ensalda de xarda escabechao onde se notaba la mano de la cocina planteando una ensaladina con cherry, güevu cocio, vinagreta, mazana y delles fueyes de llechuga y dientes de lleon, amas de la xarda que taba escabechao en casa. Un conxuntu afayaizu y de bon resultau pa entamar.
De segundo decidime polos callinos. Del tipu sele de tastu tenien de too con una salsina un plizcu picante y de poca grasa. Bon amestu de salsa y callos (hai vegaes que xintes callos y paez que xueguen n'un campu distintu al de la salsa).
En resumen, un sitiu interesante nel que tamien hai carta y que ye recomendable si tais per Mieres, que por otra parte ta enllenandose de sitios interesantes (L'Albar, el Cenador del Azul, esti...).
Por ciertu, escaeciaseme comentar que ye un de los pocos chigres que conozco onde enantes de xintar ponente primero unes aceitunines y dempues un detalle de la casa. L'ultimu dia una bisisuas :-) d'eses.
Guei nun toi de munchu animu pa escribir nada, pero esto polo menos relaxa :-)

Don Pedro (Monforte de Lemos-Lugo)

Dempues de la decepcion del O Grelo y dar unes vueltines per Monforte, apetecionos dir a cenar tranquilinos al Parador. Viendo lo rico que taba'l desayunu (eso si, baxai enantes de les 10:30 porque nun reponen gran cosa a partir d'ehi), mal nun podriemos cenar y l'atencion ya sabiemos que diba ser bona. El Parador ye un monasteriu empicorotau nel centru de Monforte a la vera de la torre de "Monte Forte". Como monumentos nacionales les dos coses puen visitase y'l Parador merez especialmente la pena (el patiu ye perguapu).

Nel restaurante, llamau Don Pedro, la mayor parte de les meses tan cerquina de les ventanes, anque esto ye mas d'afayu personal que nun d'esfrute de les vistes (un monasteriu nun va tener megaventanales, claro ta).

Como imaxinabemos, el desayunu nun dexa ser d'autoserviciu, l'atencion foi otra cosa, profesional y cercana, afayaiza y nada agobiante, lo que siempre presta pa poder cenar a la to bola.

De detalle la casa punxieronnos unes cigales plancha con vinagreta que nun taben na mal (semeya un). Cigales grandines que de tastu nun pasaran a la hestoria pero que como detalle agradecense pa entamar una bona cena.

Al centru tiremosnos pol pulpin a la brasa. "Ñam, ñam, hummm, ta bono!!". Perbono diria yo, amas de ser una racion xenerosa. Puntu perfeutu, nin blandu, nin duru, si acasu tirando a un plizcu duru que ye como mas me presta y esi tastu a pulpin bien defniu y mariñan (semeya dos).

Como tenia una zuna tremenda cola xata galega (semeya tres), nun m'entrugueis pero taba antoxau del too, y tres del expediente X de la nuechi antes, tenia que facelo, tuve que pidila. N'esto llego'l sollombu preparau como me presta, vuelta y vuelta, colos tres colorinos famosos, tienru, el tenedor temblabame na mano, pero metilo na boca y... ¡tenia tastu! sabia a xata!, de la bona!. Bien, bien la cena ya taba arreglao del too. Dicir que los pimientinos del padron taben perobonos y que les pataquines nun me prestaron na a pesar de la pinta (taben cocies y dempues frites y asina nun me gusten).

Pel otru llau de la mesa decidieronse poles vieires. Si yo taba d'antoxu cola xata que dicir de la muyer, zamburiñes el primer dia y vieires el segundu. Preparaes con un poco de tomate y un gratin de fornu taben bones, anque nun tan bones como les zamburiñes del O Grelo, si que dicir que foi un platu prestosu (Semeya cuatru).

Pa fina, cosa raro en nos, toco postre, el culant con xelau dalgo (nun m'alcuerdo del dalgo porque creo que nin lu prebe), dulce de naranxa arreglando'l fondo y frutes. Rico, vamos prestonos asgaya (semeya cincu).

Como taben en plena renovacion de la carta de vinos el metre cantonos los que tenia al entamu la cena y recomendonos un que gustonos munchu. Cillar de Silos Crianza 2006. Un Ribera del Duero abondo interesante con una gran calida/preciu que cumplio perfeutamente na cena. Un par de cafes con xelu y, colos vinos dulces paso lo mesmo que colos normales, tenien dos y decidimosnos por prebar un exxperimentu, creo que gallegu, llamau Maria Castaña, vinu macerau con castañes que nun taba mal anque prefiero los mio PX, claramente. La cuenta resulto ser de 44€ por cabeza, que visto lo xintao, teo de dicir que mos sorprendio'l preciu, pa bien, claro.

Con esto finen les nueses andances pela tierra del Mencia. La siguiente ya ye mas cerca, en Mieres del Camin.