lunes, 24 de diciembre de 2012

La Sosiega (Uvieu)

Fino l'añu con un chigre al qu'en principu nunca diria de manu, pero al que fuimos a celebrar la xinta de Navida de la empresa.

La Sosiega ye'l restaurante del hotel AC Forum d'Uvieu. Como tolos chigres de los nuevos hoteles carez d'encantu, salon funcional que val para desayunar, xintar, cenar.., friu con meses de maera escura. Ta bien la parte de les ventanes y les vistes. En branu de xuru que presta munchu mas dir ya que pue aprovechase la terracina sobre la Llosa y xintar fuera selemente.

Vamos a la xinta, que con esto de la crisis foi a escote pericote y usando los billetinos de monopoly.  Tolos presentes fuimos al menu asturianu, un menu de 21€ por cabeza con cafes incluidos, vinin, agua y panes (si, los que quixeres) y de varios tipos (baguette, cereales, normal...) lo que ye un detalle a agradecer siempre.

De primeru traxeronnos un arroz con oricios y afuegal'l pitu (vamos, un ristto d'esos). Perbonu, prestome munchu. Bien presentau, racion abundante, cremosu col arrocin nel so puntu y'l afuega'l pitu o yera con pimenton o charon-y un plizcu de pimienta al platu, el casu ye que taba nel puntu xustu de picor, tirando a sele pa nun desmerecer los tastos del platu. Na presentacion destacaben dos cruxentes de quesu. Ya vos digo que ricu.


De segundu pitu caleya con pataquinos. Un pitu de abonda calida, prietu, bien cocinau dexalu tienru y sele. Un racion contundente.


Para mi un pero, solo guisau falta-y dalgo al pitu, prefiero otres recetes tradicionales onde primero se sofrie un plizcu enantes de metelu al guisu, pero esto ye cuestion de gustos y nun quita pa que'l resultau fuera bonu.

De postre pedi un frixuelu, normalin, ademas a mi nun me da munchu mas polos postres y esti venia rellenu de compota de mazana y tuve que desrellenalu.

El vino del menu foi un Austum 2011 Ribera del Duero. Un vinu prestosu y que pa un menu de 21€ taba mas que bien puestu. En resumen, nun tuvo nada mal la xinta, sorprendente, pero yo volveria pol branu pa aprovechar la terracina.

Prestoses fiestes pa toos y que'l 2013 sea meyor qu'esti :-)