sábado, 26 de octubre de 2013

De Pinchos per Valladolid (Valladolid - Castiella)



Nun conocía yo Valldolid en profundidá (tampoco voi dicir que lo conozca agora) pero fai poco pasemos ellí un fin de selmana y dionos un pucuñín más de tiempu a patealo y desubrir rincones como L'Antigua, la zona la Catedral, el museu de la ciencia, los paseos xunto'l Pisuerga..., en fin una visita más en condiciones que dexó, como non, coses nel tinteru (como'l museu de les escultures policromades) y la impresión xeneral de que la ciudá nos gustó abondo.

Una de les coses que tien Vallaolid a la hora de fartase (amás del llechazu, claro) ye la fama de salir de tapes y pinchos, una especie de Bilbao en Castiella. Tengo que dicir que currenselo muncho, pero que mira, el mes enantes de venir equí tuvimos en Bilbao otru finde y...les comparances son odioses, Valladolid ta a un gran nivel, pero entovía nun llega (pa mi, ¡eh!, pa mi) al de Bilbao, eso sí, ensin ser barata, yelo más que Bilbao, ehí gana.

De tolos pinchos y bares prebaos (munchos tengo dicir y con guía personalizáu el sábadu nuechi, jeje), Vino Tinto, la Taberna del Herrero, Vino Tinto Joven, El Corcho...voi destacar tres que pa mi tienen los pinchinos más ricos y orixinales. Atención, que nun voi falar de sentase nel chigre a cenar, sinon de tpaeu y pincheo nos mesmos, que dempués habrá xente que se lleve al engañu que igual la esperiencia nun ye la mesma.

Casa Jero

Nun tengo denguna semeya del sitiu, al menos qu'alcuentre, igual ye que
despistome el vinu.
Un de los sitios que se presenta al concursu de pinchos anual de la ciudá y que n'entrando apetezte pidir de too. Nomes imaxinativos de tolos pinchos. Ricos el Zapateru y el de gambes. Y nun prebé nin la 50 parte de los qu'había.

Los Zagales (almiten tiques)
Varies vegaes ganador del campeonatu de pinchos tamién a nivel llocal y de prestixu a nivel nacional, esti ye un chigre que nun podéis perdevos.

El sumun llega col Tigretostón. Pan prietu fritu enllenu con cebolla colorada acarambelizada, creo que quesu, el tostón que y-da'l nome y morciella. Perbonu. Endolcau n'un plastiquín como si fuera una Pantera Rosa de cuando yeremos guajes. La verdá que merez la pena.


El otru que prebemos foi el de Chipirón rellenu. Rico y prestosu, menos que'l tigretostón, pero espectacular de presentación. Ye como un chupitin con salsa vizcaína nel fondu, con un chipirón rellenu de trigueros, cebolla y algo más (nunm 'alcuerdo) sobre una xarra que desprende aroma de cerveza. Cuidadín que eso nun se bebe, el fumu que se fai dende la xarra xustu embaxu'l chipirón ye para aromatizalu y ta fechu como'l xelu secu de los conciertos de rock. Ehí queda l'avisu.


 Na semeya podéis ver el papelín del Tigretostón...sólo'l papelín porque ya me lu xintare enteru...cría fama.

Wabi-Sabi (almiten tiques)

El caberu de los que más me prestron ye raru pa dir a prebar un pinchu, porque como'l so nome indica, ye un xaponés, pero mira, si lo pienses nun ye tan raro, ¿que ye la comida xaponesa más que mini-pinchos de too?...pues eso.
Como tábemos sentaos na terraza agustu al calorín, pidimos de xintar tamién, pero a lo que vamos ye al pinchu colnome de "Bur-Ghueisa-tún" (jeje, exploto-yos la tiesta al pensalu, vamos), pero'l pinchu coyonudu. Ente dos panes diferentes (una brioche y un de llechi) con trocinos de calabaza y algas, alcuentres una hamburguesa d'atún sele de tastu, nel puntu de cocinaú (tirando a crudu) y que se desfacía na boca con una mayonesina de wasabi que y-daba un toque persele de picante.ç


Y con estos son colos que me quedo a nivel gastronómicu. Valladolid prestonos a pesar de esa illuminación nocturna, como muestra la Casa del Conceyu, que yera la más discreta, porque si veis la Catedral o l'Antigua con unes lluces de colores que salen de los campanarios, menos ilesies podíen pasar por cualisquier cosa!!!.



miércoles, 2 de octubre de 2013

El Cafetín (Llastres - Colunga)


¡Tuvieron que ser unos amigos nuesos de Madrí los que nos enseñaren esti sitiu!. Tengome castigáu dende entós :-). La verdá que tien trampa la cosa, porque él anque marchó de neñu tien familia'n Llastres y vien tolos branos, eso ye lo que me digo pa llevantame el castigu, nun creáis.

Al casu, teníen ganes de convidanos dende facía munchu tiempu y de pasu, si podía ser a un sitiu que nun conociere yo, meyor. El Cafetín llevenlo dos moces, la cocinera de Bilbao y la xefa de sala que ye...¡¡oh sorpresa!! d'al pie de Villabona (Robléu), ¡qué piquiñina ye esta Asturies!.
Ta situáu na parte baxa de Llastres, cerquina del Eutimio. El llocal per dientro ta cenciellu y parez abondo afayáizu, pero cola nuechi que facía quedemos na terracina. La terraza ta puesta abondo normaluca con meses de piedra de merenderu y silles de plásticu, claro que, si nos llamó foi poles vistes, ya que al tar altu esfrútense unes vistes de la mar que nun tienen preciu. Amás, colos mantelucos que te ponen ye más que suficiente pa "tapar" eses silles (que danme igual, por ciertu).

Detalle de la casa, una crema de pexe con pan tostadín. Rica, calentina, porque la nuechi taba bono, pero nun dexaba de ser setiembre n'Asturies y a lláu de la mar con esi nordés sele que...¡pa que sigo!. Taba bona y cumplió colo que prometía, templanos un plizcu.



Al centru de la mesa pa compartir, una bona ensalada templada de bacalláu al pil-pil con vinagreta. Estupenda ensalada y ración con un pil-pil sele perriba del bacallaú y que dio pa repartir bien ente los 4. Ya yeren 2 de 2 aqiertos.


Enantes de llegar a los platos principales tuvieron el detalle de traenos otru regalu de la casa, nesti casu unos raviolis de pasta casero enllenos de calamar encebolláu y prietos de la tinta de los mesmos. Realmente bonos, cola pasta nel so puntu y el rellenu increible


Pasemos a los platos principales. Tal y como nos comentaron, lo d'elles ye facer los pexes a la brasa, pa dexalos con esi puntu de tastu a mar y bon productu.

Pela mesa pasaron bacalláu (hubo dellos que dempues de la ensalada todavía yos quedó ganes de siguir col bacalláu), pixín y calamar de potera.


Raciones como véis importantes, el pixín enteru, un bon llombu de bacalláu y un par de calamares. Lo mio yeren los calamares y debo dicir que taben coyonudos, un plizcu duros como ye normal nel calamar frescu y esi tastu mediu dulce, mediu a la brasa. Mui ricos. sobre todo los tentaculinos, ya sabéis.

Del bacalláu y del pixín solo prebe un tenedorazu de ca ún. Bon puntu de los pexes, pasáos los xusto.pa dexa-yos toa la intensidá de la mar. Bona compañía y a esfrutar d'una bona cena.

De postre y dempués d'insitir que ya nun podía más y qu'amás nun soi na llambión, convencieronnos pa trayenos una crema de quesos asturianos, con xeláu de quesu y galleta intermedia de cacagüeses. bua!! que rico. Claro está, que dulce nun tenía más qu'un toque. Postre adictivu pa aquellos como yo que nun llambionamos ná de ná.


Cartes curties (vinu y comida), pero bien medíes y precios que me parecieron conteníos (ye que veníemos de Bilbao y too parecía más barato y convidaronnos asina que tampoco me fixé na cuenta). Tamíen porque venía cola zuna bilbaina, el vino que nos plantamos foi un Itsasmendi BizkaiakoTxakoli 2011, perbonu.
Como vos dixe un sitiu a apuntar n'Asturies. Que sigan asina!