lunes, 23 de diciembre de 2013

Casa Basilio (Ribeseya)

¿Qué se pue dicir de Ca Basilio?, pues que ye un clásicu en Ribeseya, el típicu de tola vida pa dir xintar pescau fresco y nun-y guetes tres pies al gatu.

Día d'avientu espectacular polo que decidimos quedanos  na terracina a xintar con visteas al Seya y a la mar. Eso sí, enantes de colocanos el mantelu (de los de verdá por ciertu) el camareru avisonos, "tengo tres meses delantre pa servir asina que igual tardo un poco". Lo curioso foi que yo esperaba que tardaren la de mio madre, conociendo el percal del dueñu (vamos, que ye un poco repunante pa esto de que lu entaínen coles coses) y nun tardaron nada en tomanos nota y trayenos de xintar. Eso sín enantes de ver la comida entré y nin vi a Basilio controlar, nin vi a un de los fios que conozco, entrome la dulda de si se xubilaría el paisanu y trespasare'l negociu, dulda básica porque ser, sedría un repunante pero los pexes teníalos de primera y claro, un cambiu dueñu, vete saber per onde te sal.

Entamemos con un ensalada mista d'eses que Chicote tiraría abaxu en Top Chef al vela, pero que cumplió colo que tenía que cumplir, dalgo fresquino pa enantes del pexe y tengo dicir que voi destacar el bonitu en conserva que punxeron. Nun sé de que conserva, pero taba bono. Ensalada que valía pa cuatru, eso sí.



Y vamos a lo que vamos, que nosotros equí paremos de vuelta a casa y queríemos ver el Seya y xintar un bon pexe. Asina que pidimos un xáragu a la plancha. Perbonu. Puntín esactu de plancha, un plizcu aceite y un plizcu ayu (que pa mi sobra siempre) pero que nun tapaba el tastu del xáragu, que , por ciertu yera una bona pieza. El casu, que perbon resultáu. Prestonos asgaya.


Dos botellines de sidre Roza que nun taba nada mal, nada mal, mira que nun apuntar el lote!!!. Imperdonable. Anque claro, dempués de llevar dos díes tomando sidre cantabro, dasme una de puxarra y sábeme a gloria.

Dos cafetinos con xelu y una cuenta de 44,5€. Claro, el bichu costaba sus bonos 23€, pero si date por facer una comparanza coles mini-raciones de furgaña a esi preciu que te meten munches vegaes, tampoco yera caru. Al menos a mí, un sitiu nun me parez caru si sales d'ellí sin alcordate de la cuenta y sí de la xintá, que ye xustu lo contrario a lo que nos pasó fai dos díes nel Tonel de Cuayoto. Menos mal que pagué con tiques, que si non vamos pa casa con una sensación de tomadura de pelu y de tirar 40€ a la basoria que pa qué y mira, pagues col Monopoly y ye otra cosa :-).

viernes, 13 de diciembre de 2013

La Caracola (Comillas - Cantabria)

Como lo de contar chigres hai que lo entamar per dalgún llau, entamo pela xintá del segundu día d'escapada cántabra a la zona de les Asturies de Santiyana.

Depués de los desayunos de paisanos que nos metíemos na casa rural d'Oreña (a unos 2 km de Santiyana) y a pesar de los paseos llargos, al meudía muncha fame nun había, asina que lo ideal yera alcontrar dellos sitios pa picar.

Comillas ya lo teníemos fichao, y por eso nun hubo munchu que pensar. Col día de seronda tan perguapu que nos salió, unos paseinos y a xintar nel chigre de playa del fondu. Vistes pergupes d'un Cantábricu percalmu y a esfrutar de los rayinos de sol qu'entovía daben. En branu esto (que nun lo conozco) nun pue tar tan tranquilu y de xuru qu'alcontrar sitiu debe ser una odisea, a pesar de que tien meses abondo pa dientro. Por ciertu, qu'un problema con mal tiempu ye que les vistes sólo les tienes dende fuera o dende les dos meses del chigre, pero si pases a comer dame que nun se ve nada.





 Al casu, chigre de playa de los que merez comentar, por situación y cocina ensin complicaciones.
Calamares frescos a la romana (rabes) con esi puntín dulce tan prestosu de los calamares frescos. Rebozáu rico y pa dientro. Tenéi en cuenta que si pedís "rabes" en cualisquier sitiu (nun sé nel Annua, claro) y sólo eso, nun vos van poner nin mantel, nin cubiertos. Lo normal, polo menos de San Vicente hasta equí, ye que te les pongan con palillos y puntu pelota, too pa dientro y allá t'apañes.

L'otru platu a compartir fueron les zamburiñes al ayu. Perbien de puntu les zamburiñes y la salsa rico, eso sí, y equí nun engañen a naide, al ayu. Cuidadín col ayu, qu'espanta vampiros y vampireses :-). Pa mí pasóseyos un plizcu la mano, yo preferiría unes zamburiñes con una salsina más de muergos, un plizcu sal y llimón, ya m'entendéis, pero nun teníen na carta. Seya como seya, xintá perguapa, cola meyor compañia nun sitiu perprestosu. La sobremesa foi más curtia de lo normal, qu'esto mira norte, ye avientu y a les 16:45 Comillas punxoxe ente nosotros y la playa, vamos, que llegó la solombra y llegó'l cutu nenos, qu'un ye del norte, pero nun tanto como pa tar sentáu neses condiciones munchu tiempu :-).



Dos copines de Rueda (nun m'entruguéis ¡eh!, ¡que vos conozco!, ¿como que qué Rueda?, ¿somos paisanos o qué?, cagonros, ¡el qu'había pa chatear!, nun diba pedir otra vegada sidre cántabra que me funde la xintá, jajaja), dos cafetinos con xelu (un d'ellos nun sé si llamalo goterines o mediu bañal polo que ví cayer dientru) por 21,70€.

Sitiu prestosu pa un altu nel camín.