jueves, 23 de octubre de 2014

De Tapaencepa (Vigo - Galiza)



De tapaencepa ye lo que podíemos llamar un gastrobar con una carta de picoteo y una cocina con munches posibilidades (polo que pudimos ver na nuesa visita).

Pela mañana, de baxada del hotel a la gueta d'un sitiu pa desayunar llamonos l'atención; De tolos que fueron pasando pel móvil con tiques foi'l que nos llamó más y creo qu'acertemos. O seya, qu'en tocando la xubida pa'l hotel (en Vigo ye dificil nun falar de xubir y baxar, madre que me....) aparemos a xintar.

Too pa compartir, etamemos por un carpachu de renu, como nun venía con trineu, nun vos sé dicir si yera de renu o d'alce o de corzu, pero taba bono. Bien presentáu, per cenciellu, un poco quesu rallao, dalgo de carambelu de vinagre de módena (per riba del quesu, nun del renu) y AOVE. Un aciertu, que diba entrando mentantu charrábemos col camareru y tomábemos una copina d'albariño (Atrium).



Dempués d'eso, pasemos a unes zamburiñes plancha. Una docenina d'elles de bon tamañu, bien preparaesy aliñades con AOVE sal y acabose. Un plizcu soses, que tien fácil arreglu, pero que nun quita para que la tapina tuviera per prestosa.

Un sitiu, que si nun cambia, bien parez que merez la pena esplorar más en detalle la cocina o los platos más ellaboraos porque promete.

Al final, añadir a la cuenta un cafetín con xelu y 5 copes d'Atrium dexando 40€ en total en tiques restaurante.

jueves, 16 de octubre de 2014

O Rei Pescador (Canido - Vigo - Galiza)

 A la vuelta de la folganza llarga, decidimos danos una escapadina a Vigo y alrodios y por recomendación lleguemos a O Rei Pescador na playa de Canido. Pa un Uvieista como yo, hai que avisar primero d'onde ta'l chigre, pa que nun te den valdíos al corazón, porque coño, ya tenemos abondo colo nuestro como para amás tener de pasar delantre del campu del Coruxo teniedo Balaidos al pie, quitando esto, el chigre ta bien situauen primera llínea de playa. Nada destacable na decoriación chigre bien puestu ensin concesiones a modernismos con una terracina pa cuando hai bon tiempu.

Pedimos para compartir unes puntielles de calamar (unos calamarinos, vamos) fresquinos, que veníen fritos y llixeramente rebozaos cola compaña d'unes cebollines pasadiner pela sartén. La verdá que mui ricos, un plizcu sosos con fácil arreglu.


De segundu pidimos lo mesmo los dos, unos llombinos de rodaballu xabaz a la plancha que taben perbien preparaos y ricos de tastiu, eso sí, la presentación nun podía ser más deprimente y ochentera, francamente.

Al igual que los calamarinos, veníen un plizcu sosaines y hubo que pedir el sal.


De compaña un Do Ferreiro 2012 y finemos con un cafetín con xelu ca un, too ello por 76 € dos persones que nos paeció caro, claro que veníemos de Portugal con raciones enormes con precios baxos. Nun podemos dicir que la RCP, si la C ye de calidá, tuviera mal, agora, si la C ye de Cantidá, les raciones yeren mínimes. Ca un ya, que decida lo que quiera porque salir a cenar o xintar ye tamién un cúmulu de coses que fain que te presten más o menos los sitios, a nosotros prestonos, pero'l qu'avisa...



domingo, 5 de octubre de 2014

Mesa da Sé (Viseu - Beira Alta - Portugal)


Como'n tolos llaos, en Portugal hai de too, malos chigres, bonos, premiun, normales y de los que presten. Esti ye de los caberos, de los que presten, del camudar la costa y los sos pexes pol centru y la comida más tradicional y cenciella con más carnona. Un sitiu nel que tar agustu na terraza, onde los neños ten bien y onde esfrutar de dalgo cenciello a pocu preciu. Anque de RCP el nuesu preferíu seya'l Cacimbo, hai que tener en cuenta que nun ta nel centru históricu y, sabiendo qu'hai munchu morgazu nesa zona, ye bono tener una referencia como esta.

Como siempre, los portuguesos fainte sentir como'n casa n'atención, agradable y prestosa ye siempre d'agradecer  l'esfuerzu por facese entender en castellán, en portuñol, incluso n'asturñol, que ye entovía más fácil ente nos y hai coses que dicense igual como fame :-), pallabra fundamental, claro ta.

Esta vegada tocó que los neños compartiesen una de gambes al ayu y media de salmón a "la broa".
Les gambes al ayu, bones, xintáronles enteres, preparadines con un plizcu salsa con ayu y pelades na metá dexando con cascara la cabeza y la punta la cola. Al neñu prestaron-y asgaya.


El salmón a broa nun ye más que salmonín a la plancha con un poco de rebozu de boroña perriba. Rico, a min nun me da más pol salmón a nun ser que seya de los que remonten el ídem o'l Piloña, pero tamién yos-prestó y tamién lu comieron con ganes y a mi eso valme :-).


Como siempre, raciones pequeñes :-), ya véis, si lleguemos pedir la entera, nun se yo quien se tendría que facer cargu de finar el platu y nosotros teníemos abondo col xabalí con castañes pa dos que pidimos.

Venía n'una potuca de barru y yera de sobra pa fartase a pesar de la cantidá de pataques cocíes que veníen debaxo. Ricu, xugosín porque yeren trocinos piquiñinos, bon sabor de caza, bona salsa y quien se-y ocurre pedir esto n'una nuchi de branu. buf!! :-)

Un café con xelu, un Casa de Santar tinto (Dao) collecha 2011 que tuvo bien, un plizcu ácidu pero prestosu, dos xelaos de lo neños y menos de 15€ por cabeza. Una referenica de bona RCP nel cascu históricu.