jueves, 17 de diciembre de 2015

Dom Peixe (Matosinhos - Porto - Portugal)


Hai dellos sitios raros para alcontrar información de les coses, pero creo que ponese a falar col dueñu de un chigre de "frixuelos y pizzes para llevar" en metá d'Oporto pue llevase la palma. Pues sí, mentantu esprábemos po los dos frixuelos con chocolate que queríen merendar los neños entamemos una charra perprestosa col dueñu, qu'estudiara n'Uviéu, y recomendonos que si díbemos al acuariu al día siguiente xintáremos pexes na Rua Herois de França en Matosinhos, en cualisquier llugar, nel que más nos prestare nel momentu y asina de casualidá entremos nel Dom Peixe, magar que n'nesa cai podéis alcontrar varios, d'estilos diferentes pero too col pescau frescu y un "grelhador" o parrilleru a la puerta faciéndolo.

El  Dom Peixe ye un chigre formal, con perbona atención, bien decoráu y, en fin, que nos dio bona pinta pa entrar, ¡qué queréis que vos diga!.

En vez de Dom Peixe, tengo un neñu que podía llamar Don Gamba (por munches coses, pero tamién porque y-gusten) asina que pedimos pa que ellos compartiersen una de gambes al ayu que taben per prestoses. Eso sí, nun me dio tiempu a prepara el móvil y ya la metá del platu taba nos platos d'ellos....ye lo qu'hai :-). Aceite d'oliva, ayu, gambes semi pelades fresques (siempre dexen la cola ensin pelar) y pa dientro. Bones.


Ellos de segundu quxeron salmón a la parrilla. El salmón nun ye un pexe que a mi me preste, pero a ellos la verdá ye que yos-gusta munchu. Bien parrillau, con costrina per fuera y tienrín por dientru, dieron bona conta. Emplatáu pa cada un sobre la marcha, na semeya sólo ta puesta una metá del bichu.




Los mayores preferimos da-y a la dourada grelhada (dorada a la parrilla, eh! aunque ya sé que lo pillásteis) que desepinaron n'un plis-plas y emplataron los camareros na nuesa mesa en un momentín. Gran puntu, gran pexe, aceite, sal, algo d'ayu y a esfrutar. Meyos véis les semeyines, qu'esta vegada nun son tan males.



De compaña, un Planalto branco 2013 (Douro D.O) que fixo bien los deberes cola comida, agua grande, una mus de chocolate, una copina de oporto y un café solu. Si tuviéremos n'España, por calidá, y serviciu rondaríemos los 85-90 €, en Portugal, tando na zona VIP d'Oporto, con un 23% d'IVA y siendo, de lloñe, el sitiu más caru onde comimos durante'l fin de selmana, nun llegó a 66 €.

Si váis a Matosinhos a dalgo, vos recomiendo la cai, escoyer un chigre y a ver :-)


sábado, 14 de noviembre de 2015

Polvorilla (Burgos - Castiella)

 Estupendo chigre del que nos despedimos de Burgos. Alcuéntrase na plaza onde ta'l más afamáu de la ciudá (el Ojeda) y ye un bon sustitutu pa metese una xintadina curiosa en Burgos munchu más económica (y con tiques munchu más entovía).

Na parte baxa ye chigre-cervecería onde vimos un montón de pinchos con bona presencia pa facer compaña al vermú. El restaurante ta na parte de riba y tien una decoración clásica, incluso un plizcu d'eses "pasaes de moda". De la que llaguemos nun había naide, asina que escoyimos una mesina esquinada; Dempués el chigre foi enllenándose, sobre too de families en plan domingu, anque yera llunes festivu.

Como desayunáremos perbien nun habí muncha fame y casi too foi para compartir 2 y 2.

Casi too porque el "bicheru" quixo media de gambes pa él, asina que mentantu y-daba a les gambes los demás entamemos con unos níscalos con tocín a la plancha que taben mui bien. A pesar del tocín (que nun yera munchu y servía pa dexar tastu) los níscalos taben nel puntu de sal. Prestonos, eso sí, magar d'intentalo (porque ellos prebar, prebenlo too) les setes nun terminen d'entrar nel gustu infantil.


Para el 2 y 2, como vos dixe, per un llau hamburguesa de güe (vaca vieya) con tomatinos y cebolla pochadina. Perbona la carne y bien fecha. Presto-yos munchu.



La neña y yo preferimos compartir una patina de llechal al mou clásicu castellán, que y-tenía yo ganes dende Palencia. Fornu, agua, sal y un plizcu de llimón pa dexar un llechal perbonu, del que dimos cuenta los dos poco a poco y bien que nos prestó.

De compaña hubo agua y media d'Izadi crianza 2007 (en 1/2 nun había munchu qu'escoyer) y finemos con  2 cafetinos con xelu de postre como reis.
Total de la cuenta 65 €, que ye un preciu perbonu. Prestonos el sitiu a pesar de la decoración tipo "Cuéntame"



viernes, 6 de noviembre de 2015

Bodegón de Güela (Llugones - Siero)


Llunes raru de fiesta nel xintemos nel Bodegón de Güela porque dempués de facer unos recaos pela zona nun atopábemos per dengún llau un sitiu con meses llibres onde comer, asina que mirando la aplicación tiquetera del móvil alcordeme del Bodegón que fadría mil años que nun pisaba y que venía ellí. Prebemos suerte y teníen mesa para 4.

El chigre sigue tando igual de bien puestu; Ye afayaizu y ta decoráu en forma tradicional con piedra y maera con un comedor al fondo piquiñín y prestosu.

La especialidad parecen ser los callos, pero, nun me digáis porqué, que soi un fan, nun tenía yo'l día calleru, asina que decidimos pedir 4 platos y eso que pareciones que nes meses d'alrodiu llegaben unes raciones pergrandes.

La peque pidió unes croquetines de xamón, que como y-pareció poco a los del chigre vinieron con pataquines frites (de les de verdá) y que a doña croqueta y-prestaron pola vida, asina qu'ensin prebales doy-yos l'aprobáu. Ración abundante, que mirando la semeya tengo mieu que nun fuera media ración.



L'otru pidió unos chopitos, ración inmensa (d'ehí que dulde si les croquetes nun sedríen media) que debieron-y parecer inabordables :-). La cuestión ye que taben bonos, ensin aceitón y cruxentes. Anque lu tuvimos que sofitar, dio bona cuenta d'ellos ensin más problemes.



Pela nuesa parte y para compartir pidimos una de zamburiñes y una de pitu caleya. Cuando llegaron los platos creimos que se confundieren y traxeren dos y dos, pero non. Equí vinieron los estremos del día, esos momentos nos que daste cuenta de que'l chigre ye de guisos y que cuando hai muncha carta tien qu'haber fallos. El fallu, les zamburiñes, contamosles, 24 unidades, pero nun sé que fixeron na cocina con elles. Les probes veníen reseques y con un tastu a pegáu a la sartén de fondu, vamos, que se yos-pasaron claramente. Tendríemos que les devolver, pero el que haiga xintao con guah.es cuando ellos ya tienen la comida na mesa sabe que ponese a esperar por otru platu termina en traxedia griega al final con ellos esperando por tí, asina que nada, había fame y tiremos pa lantre.



Menos mal que'l pitu compensó too lo que había que compensar. Inmesa ración de pitu de caleya prietín y guisao con pataquines. Tienru y sele. Un día van tener qu'esplicame que pinten nos chigres esos pimientos de bote enriba les pataques, pero bono, si ye pa decorar, meyor nun ponelos. El restu, mui rico. Y non, nun se equivocaron, nun pudimos con ella y dio para cenar, que nos llevamos la metá pa casa :-)




Agua grande, dos de sidre de Val D'Ornón (rica), un kas y un par de cafés con xelu por 62,1 € de tiques, lo que nos pareció mui bona relación de calidá / preciu. Vos encamentamos a pedir guisos y la prósima nun se m'escapen los callos, a ver.

martes, 6 de octubre de 2015

Las Cuadras (Ponferrada - El Bierzu)

Las Cuadras ye un chigre afayaizu situau al pie del castiellu de los Templarios, n'unes antigües bodegues. Piedra, maera, meses con banquinos y amplies. Sólo faltaba que se picase bien para tar agusutu y, efeutivamente, asina foi, y, amás, de raciones contundentes.

Tiremos de un par de coses para compartir y les dos fuera de carta. Primero llegaronnos unos pimientinos de Padrón perbonos, carnosos, de bon tamañu y gran tastu. Eso sí, ente toos nun me picó dengunu y eso, que prestame asgaya que dellos piquen, en fin, para la prósima.



De segundu vinieron los papos de xata con pataquines a la panadera. Papos guisaos, ye más, fechos al estilu "carne guisao", con trocinos piquiñinos y guisu con pimientos. Estupendes, tienres, riques, contundentes. Un bon platu para finar con una bona fartura.



De compaña tuvimos a un Godello de la zona, cumplidor y prestosu, Viñalia (apuntelo, apuntelo, aleluya).

Dos cafés con xelu y 23 € por cabeza que nos resultó bien de RCP.

Hai que dicir, que pegáu al chigre hai un Pub, el bombardier qu'usa les mismes bodegues de entornu y que complementa perfutamente la cena ;-)



miércoles, 23 de septiembre de 2015

La Traserilla (Palencia - Castiella)


Palencia, esa gran desconocida, ciudá afayaiza, fácil de pasear, con un cascu vieyu que merez la pena (nel que destaca esa cachu Catedral) con cais anches y lluminoses. En fin, un pueblín pa conocer nel que nos prestó munchu tar un fin de selmana de cumpleaños y que nos pilló en plenes feries de San Antolín, lo que incrementó l'ambiente habitual de xente.

A nivel gastornómicu, Palencia nun ye Valladolid, pero tien el so puntu coles tapes (toes de pagu, que tampoco ye Llión nel que cada vinu lleva tapina) y había qu'aprovechar que un de los meyores sitios de Palencia tuviera tiques restaurant (que tanta vida mos dan, la verdá).

Allá que nos fuimos a prebar la Traserilla que ta en una casa vieya remocicada ente la metá de la Cai Mayor y el ríu Carrión. Como ye una casa vieya cada cahcín de restaurante ye perpequeñu y va situándose por pisos. El chigre ta nel pisu d'abaxu y son cuatro meses con una barra alta enllena de pinchos, de los que nun dimos cuenta porque díbemos pasar cenar, pero que teníen perbona pinta. Los comedores, como vos digo tan xubiendo peles escaleres estrechines y nun sé si tan o non decoraos diferentes ya que nosotros sentémosnos nel primeru d'ellos. Decoración minimalista y blanca n'otru espaciu con cuatro meses y un "mini-acutau" pa una cena mayor, tamos falando d'un comedor de nun mñas de 20 persones.



L'entamu de la casa foi morciella de la zona (d'arroz, como la de Burgos). Mui rica pa facer boca.


Pa compartir decidimosnos poles molleh.es con setes, la verdá que perbones y eso que llevaben salsa (que me parez que nun venía na descripción del platu) y salsa con nata (de la que nun soi precisamente amigu n'estos casos). Pero perbones, diferente preparación a la habitual a la que tamos avezaos nel Pumarín, normal. Molleh.es fines, nel so puntu de blandes, con bon tastu y setes. Prestonos.



Ya cada un fuimos a coses diferentes, per un llau de la mesa los papos de xata que taben perbine acompañados de pataquines y cebolla. Bon tastu, bona testura y rica la salsa, nun se puede pedir más.


La cagada vino pela mio parte, que non foi problema de cocina, foi de eleición y de facei casu a la camarera. Yo quería llechazu y entiendo que'l que seya d'equí innove con él, la cuestión ye que m'apetecía dalgo más clásico pero la descripción de la carta "Otra forma de comer lechal, bocaditos crujientes con miel y módena" llamábeme muchu, la camarera col "ta bonísmo y sal muchu, ye una especialidá"....cayí na trampa. Lo dicho, nun taben mal, taben ricos, pero nun yera lo que yo quería y, probablemente nun ye lo que un par de asturianos quieran comer cuando van a Palencia a comer llechal, d'ehí, l'avisu que vos faigo.

Como vos digo, tienros, suaves, bien, ricos, pero nun dexen de ser unos "nuggets" de llechal esgüesao bien empanaos, que déxente con esa espresión na cara de sustu cuando te los traen y esi "¿cómo ye esto,ho?" que nos sal a nosotros ensin querer :-). Repito, nada que dicir a la cocina.

El mélicu alemán esi sigue trabayando conmigo y, o entamos a tomar notes (cosa que paso) o esto de alcordase de too ye imposible. Nun termino de cayer nel vino, taba bono, fuerte, un Ribera Crianza desconociu pa mi dientro de una carta de vinos clásica onde les haiga....Entamaba por H y d'ehí nun paso por más que lo intente.

La cuenta 65 € pagaos colos tiques restaurant. Siendo un de los sitios caros de Palencia, podéis facevos a la idea de qu'esta ciudá nun ye nada cara.



martes, 15 de septiembre de 2015

O Bairro (Aveiro - Beira Litoral - Portugal)







Espumante de la zona de Aveiro por copas, entrantes (aceitunas y pan con matequilla) y agua. 89€

Apetecionos estes vacaciones pasadas dir pasar una tarde a Aveiro. Ciudá que llamen la Vencia de Portugal y que, siendo guapa y tienedo canales, nun tien nada que ver cola italiana. En cualisquier casu, quedemos coles ganes de pasear en barca colos guah.es porque foi finar de xintar y entamar a llover como si nun hubiere mañana y con fríu (y yo creyendo qu'escapando d'Asturies llibraba d'agua y fríu siempre) y claro, 45 minutos en barca vestidos de branu y chancles yera lo más apropiau pa garrar la muerte y fastidiar el restu de les vacaciones, asina que queda pendiente una visitina

Mentantu esperábemos la hora de dir en barca a dar un vueltina per un de los canales más llargos (ya vos digo que 45 minutos) vimos cerquina un chigre con perbona pinta, afayaizu, illumináu, decoráu con gustu, coles meses distanciaes una d'otra y cocina a la vista, un sitiu con fen-shui d'eso y que nun parecía el típicu chigre turista....vaya güeyu que tuvimos, acertemos de plenu y ensin mirar guíes.

O Bairro ye too eso, un sitiu nel que te presta sentate y esperar pola comanda, y amás tien bona cocina. Reconozco que los precios nun son portuguesos del too, pero para 5 y en comparanza con España al mesmu nivel de chigre, nun taben nada mal.

Voi contavos que sí, que 1.000 o 10.000 formes de preparar el bacalláu, peroalcontrar dellos bonos o al nuestru gustu, polo menos el mío, hai que se lo trabayar. El casu, ye que'l chigre con esa bona pinta preparaba un bacalláu y diome por pedilu. Bacallau desecao, siempre en Portugal, con costra de pan y pistacho y una salsina d'aceitunes. Nun sólo los platos taben bien presentaos, ye que esti bacalláu foi un de los meyores que comí per ellí. Perbono.



Dos de gambes (camaroes) al ayu pa los dos "gamberos" menores d'edá que había na mesa. Curiosa presntación, curiosa preparación, perbonos también y una racionina curiosa (a un hubo qu'ayudalu un poco, si ye que come como'l micu que ye, h.e, h.e)



La otra mini, que ye de bon comer, tampoco pudo col so caprichín, nun m'estraña, ya que foi una ración percuriosa de spaghettis a ala boloñesa que nun prebé, pero que nun-y taba disgustando nada, asina que daremosla por aprobada :-)



Pal otru adultu de la mesa, carne, raro pa ella, pero ye que nun s'atrevió col bacalláu, sollombu de xata con una salsina perbien conseguida. Igual lo más "floxo" de la comida porque, pal nuesu gustu taba un plizcu más fechu de la cuenta, lo que nun quita que tuviere bono, tanto pola cocina como pola calidá de la carne que'esfrutemos.

De compaña, un espumante de la zona d'Aveiro por copes (nun m'alcuerdo, 4 o 5) de la casa, y que nun me quedé col nome de la "garrafa" (caberamente, o apunto les coses o....) y agua. Fueron 89 € en total (lo que nun llega a 18€ persona).

Un sitiu prestosu e igual una escapada de puente llargu a la zona...ensin piquiñinos :-)

viernes, 4 de septiembre de 2015

El Escorial - L'Escorial (Amandi - Villaviciosa)


L'Escorial ye un chigre al que y-tenía ganes porque siempre que pasaba delantre d'él un domingu a meudía veíalu enllenu de xente y, una de dos o yera'l típicu del vermú o xintábase bien. Aprovechando una visita d'unos amigos a la Comarca la Sidra quedemos a mediu camín ente Colunga y casa (más a nuestru favor, too hai que lo dicir :-.) ) y d'ehí a ver que nos ofrecía el chigre.

Tien tres ambientes diferenciados, el de chigre cola barra y cuatro meses, el del comedor que pa mi gustu ye poco afayaizu (típicu comedor grande con un montón de meses que y-quita munchu fen-shui d'eso a nun ser que te toque n'una esquinina) y la terracina, que tando bona nuechi parecía que apetecía más. La terraza ye interior y tien meses de merenderu de maera con unes sombrilles enormes que les tapen enteres y protexen de la lluvia, lo que tando n'Asturies siempre ye bono, porque a metá de cena púnxose a llover como si nun hubiere mañana.

Decidímosnos por coses pa compartir, entamemos con unos calamares frescos que nun taben nada mal preparos y abondo bonos de tastu (ya los comí meyores), eso sí, la ración parecionos un plizcu xusta de tamañu. Resumen aprobáu altu.




 Coles llámpares la cosa meyoró munchu, la ración yera abundante, les llámpares nun teníen nada de sable y la salsa taba impresionante. Tengo que lo dicir, que yo soi más de llámapres preparaes con verdures, pero que tanto aquelles del desaparecíu Molín del Puertu que llevaben chorizu, como estes que lleven xamón (tamién cebollina) tan perbones. Esti ya resultó de notable y tuvimos entreteníos faciendo barcos col pan y la salsa un bon ratu (¡qué pésima costume pa baxar kilos de pesu!).

Los nuestros amigos, que nun tan de llámpares (igual en Madrid ye más complicao pillales) quedaron encantaos.



Pa finar, vino el Cachopu de la casa, pa compartir 5 dio de sobra (teniendo'n en cuenta que pillamos dos platos primero). Teníen varios cachopos en la carta y decidimosnos por el Cachopu Escorial (por eso de que si lleva el nome del chigre tien que ser el que meyor preparen, en fin, por pidir un).

 El cachopu llevaba bona carne, taba bien rebozáu y fechu y prestonos asgaya. Llevaba, champis, ñueces, cecina y quesu de cabra. Yo sólo tengo que dicir que cecina o xamón, bien, pero que el quesu de cabra sigo ensin velu n'un cachopu porque me mata el tastu de la carne. Un quesín suave de tastu ye lo que yo entiendo que tien que llevar dientro. En cualisquier casu, pa gustos colores y el cachopu taba rico.


Sidra asgaya que taba bona y de la que tomé nota mental y ya se sabe...que nun m'alcuerdo, pero si tengo qu'apostar xuraría que yera de Vigón, cafés y una botellina de agua por 13,2 €/cabeza.

Sidrería afayaíza de les qu'hai munches, como pa xustificar un "voi a la Villa a..."pero na que se come bien y te permite pasar un ratu prestosu con amigos si tas pela zona.







miércoles, 22 de julio de 2015

Hostería de Torazu (Torazu - Cabranes)


Nun tengo la culpa de cumplir años en martes, ye lo qu'hai, y mira, anque yera la 3ª opción pa dir y les dos primeres nun se m'arreglaron, salió bien la visita a la Hostería dempués de la so reapertura con un grupu hosteleru nuevu.

La Hostería sigue nel so sitiu privilexiau de Torazu con unes vistes perguapes que nun se pudieron esfrutar porque había más niebla que nes películes clásiques de Jack el Estripador. Sigue ellí cola mesma decoración, ensin más cambios que'l personal al que nun conocía de nada, y que ta entovía un plizcu verde, con fallinos de xuventú (nun traxeron el pan hasta los segundos, faltaba un tenedor...) pero atentos y amables.

Para compartir entamemos con unos llangostinos al tamarindo con salsa de guacamole. Curiosu númberu de llangostinos, 9, que traxeron formando un tipi d'esos indios ente ellos que permitía xugar a eso de "el que los tire paga". Rebozaos, cola salsa de compaña pa moyar si t'apetecía. Bien, platu conseguidu, pero que nun namoraba. Bon productu, pero el tastu del rebozu lloñe del del Naguar de Pedro Martino. La salsa nun aportaba nada al platu. Como digo, bien, ensin más.



Pela mio parte escoyí el gochín asturcelta carambelizao. Dos tacos de gochín, esgüesaos, perfeutos de puntu, col pelleyu cruxente y la carne de dientro nel so puntu. Agora, una cosa ye carambelizao y otra ye pasase. Lo primero que tuve que facer foi tresegar la carne a la zona de la ensalada de frutos coloraos y mecer la ensalada cola piña y la salsa carambelizada. Yera perdulce pa mio gustu y desllucía la carne. De a fechu alcordeme del osu que comí fai milenta de años en Tallin, rica la carne, pero la compaña nun taba a la altura. En cualisquier casu, bon platu.




Pela otra parte de la mesa, una merlucina fresca a la plancha que, si te presta la merluza, taba de restallu col puntín xustu de plancha. Nun entendimos bien la compaña de una salsa con pulpu que yera como amestar fabes con maíz, que bono, non taba mal, pero nun sé que pintaba cola merluza.



El vinín foi un Itsasmendi 2014 fresco y agradeciu para ayudar col calorín que facía a pesar de la borrina. Agua, un cafetín con xelu y nada de tartes que nun soi llambión nin el día que cumplo años :-) por 37 € cabeza.

Un bon sitiu, nel que'l cocineru o cocinera tien que pensar meyor eso de les salses, que nun dio una en dengún platu, más que nada porque nun aportaben nada a dengún d'ellos y porque nel mio incluso molestaba, aún asina, prestosa cena y meyor compañía :-)


miércoles, 8 de julio de 2015

El Abrelatas - L'Abrelates (La Pola - Siero)

Debia-ylo a Borja, sí, sí, debía-y espublizar dalgo más nuevo del Abrelates, sobre too porque na zona nuestra ye un chigre de referencia pa nosostros (pola cocina y polos tiques) amás dende qu'abrió le evolución ye contínua y caberamente añaden carnes raros a la ufierta habitual (cocodrilu, camellu...).

La verdá que con esta costume mío de nun postear munches vegaes el mesmu sitiu, teníalu abandonáu. Eso sí, tendré que volver a facelo porque les semeyes nun ye que ten mal, non, ye lo siguiente, ¡qué desastre de paisanu cola máquina de retratar, fios!.

Como siempre, raciones xeneroses (que'n La Pola tienen que comer de calidá y cantidá) que compartimos. Dos platinos y los dos por suxerencia del chef.

El primeru, rebozuelos con güevos fritos, espárragos plancha y fuá. Enantes de servilu y preparalu ofrecieronnos camudar el platu, ya que'l fuá taba agotáu, pero como nun teníemos ganes de pensar nun lo fiximos, eso sí,  rebaxaronnoslu de preciu ensin dicir nada nosotros.

Taba perbono, asina que con fuá tien que salise. Güevos pa moyar, curioso lo de los espárragos y perbono l'amestu coles setes. Rico.


El segundu, un llombu de pintu espectacular cola compaña de una salsina d'algues y eso que veis na semeya son mazanes, nun pataques (si ye que veis dalgo).
Productu ensin más (que ye dificil tratalu bien), perfeutu de plancha. Impresionante y eso qu'a mi gustme munchu dir a pedir los papos de xata que los claven.



De beberciu un vinu de Cangas blanco (La Descarga) secu pero afrutáu, taba bono anque nun seya del tipu de vinos que suelen gustame, esti prestonos asgaya, dos cafés con xelu, una d'agua pequeña y 29€/persona pagaos colos tiques restauran que tanta vida mos dan :-).

Un bon sitiu al que nos presta munchu dir y al que volveremos pa pedir un d'esos menús degustación que tienen que me los ofrecer  ;-)

martes, 23 de junio de 2015

Quince Nudos (Ribeseya)


Segunda visita al Quince Nudos, anque esta vegada nun tenía quorum pa tirame al arroz, una pena, eso sí, pudimos esfrutar del restu la cocina del chigre, que ye bien prestosa. Amás, debie-ymos al chigre una "ración de semeyes" tres de la cabera visita onde la máquina de retratar, bono, non, nun y-echemos la culpa a la máquina, el semeyeru, foi un desastre y sólo salió la primera.

D'entamu la casa punxieronnos un par de tortos de maiz con un pexe afumáu (nun m'entrugueis agora que pexe que nun m'alcuerdo) y unes güevares, magar de nun alcordame del bichu, sé que taba bono.


Pal centru decidimos volver a los chipirones al puntu de plancha, con cebolla y tomate secu.Bon productu, bona preparación, perpretosos. Una ración contundente pa siguir faciendo boca.



Pa nosotros el meyor platu de la tarde foi ensin dulda el tataki de ventrisca de bonitu con salsa de wasabi y güeves al wasbi de pexe que pidieron pel otro llau de la mesa.
Una ración contundente, un productu espectacular, bona presentación y un puntu de pexe perfeutu. Un platu pa fartucase bien, vais contámelo a mí que finé xintando más de 1/4 dempués de acabar colo mío.


Yo escoyí un platu más normalucu, un saltu de xata con aceite de boletus onde tanto la salsina como les pataques a la panadera taben perbones. La carnona de primera y con bon puntu y, anque dellos trozos taben un plizcu más duros qu'otros, el resultau foi bonu. Otru platu prestosu, pero esti chigre ye más de pexes, claramente.






Dos cafés con xelu y de compaña una botellina de sidre EM brut de El Gobernador. N'esti estilu sólo tenía prebades El Gaiteru etiqueta prieta y Ponma Aurea y esta gustome munchu. Ye una opción munchu más interesante que les sidres aquelles de nueva espresión (porque a sidra natural los asturianos siguimos prefiriendo la d'escanciar) y más prestosa al mi mou de ver.

En resumen, una bona xintá na que la calidá pagase a 37,5€ por persona, eso sí, colos famosos tiques :-)

jueves, 11 de junio de 2015

Mesón Añejo (Aguilar de Campóo - Palencia- Castiella)

 El vienres de la llegada a Revelillas teníemos que cenar en dalgún sitiu y Aguilar de Campóo yera'l sitiu más cercanu pa dir xintar. Na casa había varies tarxetes y decidimos dir al Añejo qu'amás ponía que tenía tiques. Bona decisión.

L'Añejo ye'l típicu mesón castellán con una parte de chigre y otra de restaurante, decoráu cenciellu y afayaízu a la mesma vegada., bon productu, trato amistosu. Un pero, la música, ta bien tener el radio puestu, pero hai que baxar el volume.

Los neños parecíen esfamiaos asina que entrugamos que queríen y la respuesta foi "carnona a la piedra""...val, val y d'entamu una ensalda de codronices escabechaes que taba perbona, con llechuguina y tomatín de la güerta del dueñu (que nun debería poneles en chigre, pero ye que Aguilar ye un pueblu grande).


De platu estrella, el xuletón de vaca vieya de 1,5 Kg que nos merendemos ente toos y, efeutivamente, taben esfamiaos, facía tiempu que nun los veía comer asina a los guah.es. Comer, comen de too, pero son ruinucos coles cantidaes, vamos que nun comen munchu.

El xuletón de carne de primero, nun tenía nada qu'oxetar, amás venía marcáu por fuera pa que na plancha solo tuevieres que caldialu un poco y marcalu más per dientro si t'apetecía. Ye prestoso pedir esto con guah.es porque ente que lo salen, dan-y vueltes y deciden qu'esi cachu ye pa mi y esi pa tí, tan comiendo la de mio madre.. Perdonai la semeya.



De compaña una d'agua grande, y un La Planta 2013 que taba bien bono.

Postres dos xelaos, dos cafés con xelu y un oruxo de setes caseru, sí, de setes, que fabrica'l dueñu y que nun quixo dar la receta y que, como les llechugues, eso de ponelo a los clientes, como que nun debiera :-). Yo sólo lu golifé y la verdá que golía perbien, la muyer dixo que taba perbonu y por más qu'insisitió marchemos ensin saber que setes, nin como lu facía.

Parez ser que ye un chigre de setes en temporada y que siempre preparen opciones de menús nos que tolos platos lleven setes, menos el chupito, una vecera los picó y'l resultau ye que tamoén lu tienen. Habrá que volver pa la seronda.

En tiques salimos a 21 € por cabeza. Nun ye baratu, pero tien bon productu y paguemos con tiques :-)



viernes, 5 de junio de 2015

Fuentebro (Fontibre-Cantabria)


Perguapu fin de selmana que pasemos colos neños pela zona sur de Cantabria. Una zona que nun conocía na raya castellana más asemeyao en paisaxe al norte de Castiella que al típicu verdor cantábricu y ye que de Reinosa pa baxo, montañes poques. Un sitiu guapu, nel que pasar ente Palencia, Burgos y Cantabria ye una cuestion de cartelos, con incluso enclaves palentinos completamente dientro de Cantabria (Cezura y Lastrilla), un sitiu pa relaxase y facer escursionines tranquiles (Canal de Castiella en barcu dende Herrera del Pisuerga o dir ver les foces del Ebro a Orbaneja del Castillo) polo menos en primavera.

N'una d'eses escursiones, la de conocer el ñacimientu del ríu Ebro, acerquémomos a xintar al chigre Fuentebro por varies razones, quedaba xustu enriba del ñacimientu colo que puedes xintar con un bon paisaxe si lo fais na terracina, dos porque nos falaren bien d'el y tres porque, aparentemente tamién tenía tiques, ¡qué más se puede pedir!.

Taba bon día y decidimos xintar fuera,  na terraza. Ca un a lo suyo, el peque decidió tirase por unos llangostinos, los cuales veníen con ali-oli de curry (persele que y-daba un gran toque y con un rebozu cruxente en formato paxa. La verdá que taben bien bonos y sólo nos dexó prebar un a los pas (el restu al sacu)



A la otra antoxáronse-y unos macarrones con tomate, chorizu y quesu gratiano que vio na mesa de al lláu, asina que nada. A mí gustame la pasta, pero nun soi mui amigu de esa forma de facer macarrones, en cualisquier casu, reconozco que taben al dente y que teníen un tastu bono. Vamos, lo importante ye que la neña fusilolos en un abrir y zarrar de güeyos, asina que perfeutos.



Pela mio parte decidime a prebar unes manes de gochu al estilu Fontibre. Perbien guisaes cola compaña de chorizu, xamón y una salsina estilo callos. Veníen con una fuentina aparte de pataques frites de verá y pimientos de Padrón. Unes bones manes, xelatinoses y prestoses asgaya.



L'otru platu tamién foi de guisu, unos papos de xata con quesu y membriellu (un amestu un tantu estrañu). La verdá que bien guisaos, perbonos anque pal nuestru gustu sobraba'l membriellu, bonos trozos y bona cantidá en tolos platos.



De compaña tomemos 3 copines de Rueda, una botellina grande d'agua y de postre 2 cafés con xelu y 2 xelaos pa los neños. A la hora de pagar vino la sorpresa, nun nel preciu, que taba bien, si non nos tiques, que nun teníen, parez ser que diéronse de baxa hai un timepu pero na aplicación del móvil de Endered entovía vienen.

Total 14,3 € por cabeza, bona RCP




lunes, 16 de marzo de 2015

Herbé (Valladolid - Castiella)


Fin de selmana mediu, mediu, ye dicir, parte de trabayu estirau un poco más por placer que nos llevó la nuechi del sábadu a nun poder comer nel sitiu que nos recomendaron (El Peso) y que decidimos cambiar xuto por el chigre que ta a la ver, el Herbé.

La verdad que una sorpresa interesante, sinceramente, la parte de bar nun llamaba gran cosa pa quedase a cenar (y eso que taba enlleno de xente picando y tomando vinos), pero nun yera mui afayaizu. Sin embargu, el comedor, bien dixebráu y aisláu del ruidu del bar, resulta piquuiñin y más agradable, ye otra cosa.

Nun miremos nin la carta, díbemos con ganes de llechazu (bono, pa ser sinceru yo) y por recomendación del camareru (peramable) entamemos con una de setes plancha con chorizu. Raru l'amestu, pero resultón, setes perbones, xugosines a les qu'hai que poner el "pero" de la temperatura, taben templadines, nun calientes, pero por el tastu inclínome a pensar en una mala medición de tiempos pa nun tener qu'esperar munchu por el segundu, que non en un calentón mínimu de fornu nel caberu momentu. Bien, una ración prestosa.



De segundu, el llechazu D.O. que nun tenía pero. Puntu perfeutu, xugosu, carne que se defacía y el turriadín esterior del pelleyu. Lo dicho, prestome asgaya y fízome escaeceme del de la nuechi anterior onde quedó demostrao que por más que'l productu ten D.O si nun hai mano na cocina, nun hai na que facer, eso sí que'l productu seya bonu ye una garantía.

Na semeya el mio emplatáu, sobre un platu d'esos que permiten mantener el calorín de la pieza mentantu te dura'n platu...que nun foi munchu tiempu :-)



De compaña La Planta 2013, vino que dicho asina permitiome facer un chiste mal non, lo siguiente y que nun pienso reproducir equí por temor a que nun me volváis a lleer, collacios :-). Un agua, dos cafés con xelu y convite a un par de copines de crema d'oruxo casero. Total una cuenta de 38€/persona de la que s'encargaron los "santos tiques" que tante allegríes gastronómiques nos permiten nestos tiempos.

lunes, 9 de marzo de 2015

La Mina (Cuayoto - Uviéu)


La Mina ye un chigre de los que menos tiempu lleven abiertos en Cuayoto, pueblu nel qu'hai chigres asgaya.

Bien decoráu, con alcordances a la mina, varios espacios dixebraos en forma pa tar agustu (chigrón, restaurante y terraza cubierta con califación de setes de butanu), la verdá que da bona impresión.
Mantelos de tela y sensación de tar bien atendíu. Un puntu malu, coño, si yes un chigre, yes un chigre, pero nel restaurante ponente el pitorru verde pa char la sidre y eso a mi nun me presta munchu.

Diendo a lo nuestro, doña croqueta pidió croquetes de xamón, pa variar, eso sí, 1/2 ración de les que dieron cuenta los dos guah.es ensin problemes. Gustaron-yos, hasta ehí puedo lleer y que teníen bona pinta.



Don bichos pidió lo suyo, calamares y pulpu. Los calamares frescos a la romana, taben perbonos, con un rebozu con un toque d'ayu y perrexil y una salsa casero d'alioli de compaña, dexábense comer perbien y gustaronnos a toos. Bona ración a recomendar.




Convenciome menos el pulpu a la brasa, curioso eso sí, qu'al restu de personal y-prestó asgaya. Debe ser que yo esperaba un pulpu a la brasa y lo que vino nun finé de velo claro. O tenía poca brasa o taba metá y metá (metá guisau, metá na brasa) porque'l resultau, que taba abondo bono, nun yera el esperaú. Eso sí, los tomatino pelaos a la brasa tan bien bonos.

Como vos digo, platu con diferencia d'opinones o d'opinión nos presentes :-)


El caberu fueron un par de sollombos de potru, que ya nos traxeron emplataos. Rico, poco fechu, una carne prestosa, nunca la prebara, nun tien un tastu tan marcáu como la vaca, ye algo más dulzona, nun sé, taba bien fecha. Eso sí, el cocineru/a debe ser caribeñu/a, ya la cosa qu'había perriba del pulpu, yera raro pero la salsa de compaña del potru, nin vos cuento. ¿parez de pimientu y tomate, eh?, pues non, prebesla y..sorpresa...de plátanu. Ehí quedó fios, quédome cola carne.



Fuera de bromes, un bon sitiu con tiques, nel que por esto, un par de cafés con xelu, una botella d'agua grande y una de sidre paguemos 56 €, lo cual ye abondo razonable.