miércoles, 21 de marzo de 2012

La Gruta (Uvieu)




La Gruta ye un d'esos sitios d'Uvieu qu'agradecio un cambiu de rumbu. Un sitiu que diba tocar fondu foi recuperando nel par de caberos años gracies al nuevu propietariu, el dueñu de La Venta del Xamon, que volvio a recuperar una cocina que nos sos tiempos foi de les meyores d'Uvieu.

Hai vegaes nes que lo que menos t'apetez ye complicate la vida y mira, por circunstancies de la mesma, esi dia taba percerquina y arimeme a xintar colos mios pas y, como digo, ¿pa que complicase?, pa na, asina que dionos por dir a La Gruta en plan tradicional. Dos de fabada pa tres persones y puntu; y menos mal que pidimos dos porque la verda que daba pa cuatro.

Nunca me dio ma por xintar fabada fuera de casa magar que munches vegaes lo facia, por eso de la comparanza ente la de casa y la de fuera, que siempre ganaba la de la mio güela. Pero, como por desgracia fai mas d'un añu que la probe nun ta pa facemela los domingos, acabaronse les mariconaes. Si un dia m'apetez, pues fabada que te crio.

La de La Gruta ye una fabada que vien a plazos como les hipoteques, pero que da munchu mas gustu. Per un llau tienes les fabes y per otru, el compangu. A mi, personalmente, prestame munchu mas que te too xuntino de la que vien, pa que la grasona (si, esa que ye perbona pal colesterol y tan mala pa un) notese nel caldin, pero en cualisquier casu a esta fabada y sienta igual de bien lo de venir xuntina de mano o de si lo amestes tu nel platu.

Fabes tienres, grandes, mantegoses, sin desfacer, de les que entren soles, y un companguin de primera (sobre tou la morciella que me presto asgaya) fain un platu redondu.

De compaña el vinin de la casa, un Conde Real Agrado crianza 2007 que cumplio perfeutamente y que tien un puntu de la "Comarca la Sidre", porque o los mio informantes m'engañen o la bodega ye propiedad de Sidre'l Gaiteru.

Prestosa xinta, fabada pa repetir, y de la que nun conozco el preciu, un entovia tien pas a los que da-yos besinos :-)

domingo, 4 de marzo de 2012

Agustiner am Dom (München - Alemaña)



Anque los viaxes de trabayu nun te dexen tiempu pa munchu (ya sabeis, aeropuertu, hotel, eventu, hotel y poco mas), en dalgún sitiu hai que cenar. Munich ye a la cerveza n'Alemaña lo que Franfor a les salchiches, asina que la decision ye facil, a pesar de los bonos chigres qu'habra na ciuda, que meyor que facese'l guiri y dir cenar a delles cerveceries del centru. La primera foi la impronunciable Hofbrähaus que ye la mas grande de la ciudad y na que debe xintase bien, pero como equi foi de xintada concertao, pues nun taba mui alla el tucu que nos metimos.

Distinto foi la cena del dia siguiente nel "Agustiner de la Catedral". Un par de pintes de cerveza de la casa (al igual que nel HB). Cerveza rubia y llixera qu'entraba sola y un platu de salchiches de tres tipos diferentes. Les que mas me prestaron les clasiques coloraes que alcuentres en tolos llaos n'esti pais. Cama de pataques, choucrut y cuidadin col rabanu picante, que ye como'l wasabi!!

Un chupitin caseru (tamien fechu por ellos) y un resultau de 22€ por cabeza. Teniendo'n cuenta que tas nel centru de Munich, nun se pue dicir que los precios seyen escandalosos, ah!! y too presta mas si te conviden :-). Si vuelvo a folgar procurare dedica-y mas tiempu a la ciudad que tenia una pinta perbona, amas de un monton de cerveceries.