El Rinconin de Les Campes ( La Pola - Siero)

El Rinconin de Les Campes ye un restaurante que ta na plaza del mesmu nome en La Pola. Ta dixebrau en tres plantes onde la baxa ye'l chigre onde podeis tomar unos vininos o unes botellines y les otres dos son del restaurante.

La parte de chigre ye estrechuca y poco afayaiza pa tar y pa mi qu'esa ye un de las razones poles que la terracina de la plaza ta abierta tou'l añu. Esa y qu'a los polesos lo mesmo yos-da que llueva o ñeve, que pa tomar una botella sidre fuera nun hai mal tiempu. Les coses como son.

Los pisos de restaurante son mas afayaizos y prestosos pa tar tranquilamente. Amas, ye una de les poques propuestes de La Pola que s'escapa a la sidreria de siempre pa xintar y hai vegaes que s'agradez camudar el palu de la cena :-).

Mantelinos de verda nes meses, cocina ensin complicaciones, bones vistes a la Plaza Les Campes (si ye que te toca pales ventanes) y bona atencion. En resumen un sitiu prestosu pa xintar abondo bien.

De primeru escoyimos unes zamburiñes a la plancha. Nos caberos tiempos estes zamburiñes al vaciu que venden en munchos sitios tan dando munchu xuegu a los chigres. Ye bon productu, ta'l vaciu colo que'l manexu y almacen nun ye complicao y a poco que les prepares con mimu (plancha, aceitin, sal, y un plizu llimon) dan un resultau estupendo pal xintador.



Una docenina prestosa pa abrir boca.

De segundu y tamien pa compartir, unes mollejes tipiques de La Pola. La verda que na Pola toi viendo que puede gustate mas o menos la manera de preparales (nun tienen na que ver les del Pumarin, coles del Rinconin o les la Ferrada) pero tienen-yos bien garrau al puntu de preparacion.

N'esti casu un estilu guisau, con un plizcu de cebolla, tomatin y guindilla. Mollejes tienres y tastu perbonu. Venien con unes pataquines de verda de compaña n'otru platin. Les mollejines venien "contentines" de guindilla, pero si quies un plizcu mas siempre pues pedir un aceitin o guindillina picao pa da-yos mas vida.



Un pero, de facil arreglu nos dos platos y que depende de la xente, ye'l usu del sal. Normalmente nos chiges tiren de llargu, pero equi dalgun cocineru tien un familiar hipertensu porque el sal yera inapreciable nos dos platos (tres si cuentes les pataquines de compaña), pero garres el saleru mientres tan calientes los platos y arregleslo.

De compaña un Campillo Crianza 2006 que respondio perfeutamente. La carta de vinos ye curtia, pero dalgo puedes rescatar (como esti Campillo) pa facer una bona cenina.
Dos cafetinos y 26€ por persona. D'esti estilu, esin dulda L'Abrelates tien la meyor calida preciu, pero esti ta abondo bien.

El Moreno - El Morenu ( El Puntal - Villaviciosa )

Pa entamar l'añu nesti blog voi tirar del caberu chigre visitau y, como non, volvemos al chigre de productu d'esos prestosos.

Teniemos bones referencies del chigre en cuestion y delles vegaes tomemos un vermutin equi mirando pa los barquinos, ya que tien unes mesines fuera perprestoses pa estos menesteres de meudia. Asina que dempues d'un viaxe per les Galies, foi lo que mos llamo l'atencion pa dir cenar.

Cenemos solos nel restaurante (la parte de chigre entovia tenia un par de mesuques viendo'l BarÇa-Madrid). La parte de comedor tien unes prestoses vistes al Puertu del Puntal (magar qu'a la nuechi eso nun importa munchu), ya ampliu y a pesar de tar solos nun se nos fizo grande.

Ensin mirar la carta (un riesgu, reconozcolo) pidimos conseyu al dueñu sobre lo que cenar. El resultau, unos muergos cocinaos de la forma mas prestosa y cenciella, sal aceite y plancha. N'esti casu (non como la vez d'Eutimio) bonos muergos (val, nun son los de buzu del Corral del Indianu) mui sabrosinos y d'un tamañu mediu. Estupendos pa entamar.



De segundu, una chopina al fornu que de fresquina que taba retorciose na fuente na que nos la sirvieron. Sobre la marcha desespinaronnosla a ca un nel so platin. Perbona. Como too n'esto de la cocina un bon productu bien tratau ye esitu seguru. Otra cosa ye la forma de cocinala al fornu, pues tar mas o menos d'alcuerdu, a mi gustome. N'esti casu cocinada como suelen facese los besuguinos, aceite, sal, cebolla, pataquines a la panadera y trocinos de llimonin en dos partes del llombu, na mas igual un poco menos de cebollina taria bien, pero nun enmascaro'l tastu'l pexe. Pa recibinos Asturies, francamente acertemos.



Una chopina mas que curiosa, porque dempues de servinos entovia quedaba nel platu lo que pue vese na semeya siguiente pa repetir. Punximonos les botes.




De compaña, un Do Ferreiro 2010 que cumplio perfeutamente. Un par de cafetinos y 36€ por cabeza que parecionos un preciu estupendu pa la xinta que nos metimos.

Hala!! a ver si esti 2012 portase bien pa toos!!. Feliz añu!!

El Abrelatas - L'Abrelates (La Pola - Siero)

Enantes de partir a la vuelta a les Galies (meyor dicho, la vuelta al Pais del Loira y sur de la Bretaña Francesa) dionos tiempu a prebar un chigre al que-y teniemos munches ganes, primero porque tou'l mundiu dicia que se xintaba perbien y segundu porque llevenlu unos collacios nuestros de Sariegu.

Pues bien, si lu comento ye porque nos presto asgaya. El chigre ye piquiñucu por lo que a nun ser qu'acutes nun vas alcontrar mesa, polo menos los fines de selmana.
Piquiñucu, pero bien puestu, con una cartina de vinos curtia pero con entraes prestoses, una gran calida/preciu y...almiten tickets lo que pa mi ye un presti estra :-). Per otru llau, ye dalgo que La Pola necesitaba, un chigre que nun fuera una sidreria, con una bona calida y mas baratu que'l Loriga.

Llamonos l'atencion el menu de fin de selmana por 15€/cabeza, y fuimos a el, ye mas, coincidimos nos dos platos, cosa raro.

De primeru una tostina de xamon con fua y güevu fritu perriba con tomate cherry. Oye, prestosu y amas, una presentacion guapa. Tenia dellos toques dulces pa contrastar col xamon de bona calida y resulto un primeru afayaizu.



De segundu fuimos al pitu caleya con patatinos. Una racion abundante de pitu de verda, guisadin con un plizcu de tomate, cebollina y pimientu. Puntu estupendu y bona materia prima. Llamonos l'atencion que'l menu costare lo mesmo enteru que munches raciones de pitu que pides perhi.



Como pagaben los tiques y nun yo, cambiemos el vinin por un esperimentu que salio perbonu, un Musai de Roa de 2006 que pegaba perfeutamente con tola xinta. Un collecheru caru,avieyau en carbayu, que taba abondo meyor que munchos criances de la mesma Ribera.

Al final 30€ persona (la culpa foi del alcohol!!!!). Volveremos, a prebar la carta de nomes suxerentes que paecen amestar la cocina tradicional con toques modernos. Eso si, viendo el par de gochinos a la "segoviana" colos que se farto'l grupu de tras nuestru, casi que paso de too y los encargo...que pinta!

La Calleja Real - La Caleya Real (Aviles)

Hasta Aviles llevonos el ver y sofitar al Niemeyer n'un domingu perguapu de Seronda. Pena qu'al nuevu conseyeru de Cultura y-guste mas velu quemau "como'l Liceo y mirai lo guapu que ta agora". Toi seguru de que nun y-gusto la pelicula de Woddy porque foi confundiu a vela creyendo que yera la de Toy Story 3, ye mas, nun y-gusto Ricardo III (nun y-paecio cultura) porque Kevin Spacey falaba raro, pero esto ye d'otru blogue.

Volviendo a lo que nos ocupa, que ye'l xintar, y teniendo'n cuenta la epoca de contencion de gastos actual y preocupandome por que los mercaos nun me punxieran la prima de riesgu de la hipoteca peles ñubes, fuimos a la Caleya Real onde nos llevaron los tiquets restaurant y una paxina güeb con bona pinta.

Alcontremonos con un chigre bien cuidau, con musiquina sele de fondu, con perbona pinta. Una entrada con un toque mas de "chigre" pero, na que ver, y un comedor puestu con gustu y con munchu espaciu ente les meses. Espaciu que s'agradeceria si hubiera dalguien pa xintar al meudia d'un domingu...naide...solos. La Primera entruga que se te vien a la tiesta ye esa de, ¿onde nos metimos, ne?. La segunda esa, ¿sedra la crisis o la comida? y lo mas optimista lo de "debe ser que los d'Aviles nun tienen costume de salir los domingos a xintar". Teniemos que ver los platos y la cuenta pa tener mas claru'l tema.




De primeru pa compartir un abundante platu de cecina de Llion con quesu de cabra. Aceitin d'oliva virxen y base de tomatin frescu. Esti platu nun lleva una llabor de cocina de la llechi precisamente, pero hai qu'escoyer bien los materiales. N'esti casu, cecina rico, tomatin bien, quesu ricu y aceite del bonu con un bon resultau final pa entamar.



Pa mi pedi un sollombu de xata con pataquines que cumplio perfeutmaente les espectatives. Carne bono, bien preparao (pa mi un plizcu mas fecha de la cuenta, pero ye qu'a mi ponennme la xata pastiando'n platu y comola). Prestome, nun buscaba nada con munchu llabor y cumplio.



La mio muyer tirose pel pixin amariscau. Mui ricu. Una salsina sele, un bon corte de pixin con unes amasules fresquines, unes gambines (que nun prebe) y unes pataquines panadera cocies (a mi gustenme mas fritines). Tou perconxuntau y de bon tastu. A esti puntu yo sentia'l ruiu d'unes cuyares movese a lo lloñe y pense que polo menos tenien otra mesa.

De compaña tomemos un Gran Bazan Ambar 2009, agua y unos cafetinos con xelu pa finar. Como nun miremos el preciu de dengun platu (¡¡benditos tiquets!!) taba yo esperando, nun se, un hostion. Nun foi baratu, 41€/cabeza. La mesma calida pues alcontrala n'otru sitiu por menos perres, pero claro, 6 persones contaes trabayando, una atencion perbona, un sitiu afayaizu y cuidau tamien se paguen. Por ciertu quela otra mesa al salir yeren ellos comiendo por turnos. Esta crisis va matanos.

Eutimio (Llastres - Colunga)

Pa nun perder la costume de dir a chigres con bon productu dempues de pasar pel Horru pues habia que siguir por otru miticu-clasicu de la escena asturiana, Eutimio.
Nun voi ser yo el que descubra esti sitiu al que ye una pena que y-falten unes meyores vistes a la mar.

Llevabemos unos cuantos años ensin dir, por eso de que nos gusta descubrir chigres entre otres coses y, aprovechando unos niñeros qu'apaecieron por casa pa "chanos" lliteralmente d'elli a cenar, sobre la marcha acerquemonos equi.

A priori, bon sitiu pa allegase cola parexa y esfrutar d'un pescadin del Cantabricu maravillosamente preparau. Atencion perbona y, anque nun teniemos muncha fame, si que apetecia un bon pexe.

Entamemos con unos muergos un tanto decepcionantes, piquiñucos y ruinosos taben estupendamente bien preparaos (sal, aceite y'l puntu xustu de plancha), tenien bon tastu y taben bien llimpios de sable. Un platu normal y un tantu decepcionante pa un chigre como esti.



Col segundu camudo la cosa, un rubiel fresquisimu y estupendamente preparau. Un plizcu d'aceite, otru d'ayu y sal. Too perfeutu pa esfrutar tranquilamente ya qu'hasta'l puntu de cocina yera perfetu. Menos mal, porque'l primeru dexome totalmente indiferente. Rubiel pa dos, emplatau y desespinau na propia mesa pola camarera con un preciu discretu (19€la racion) que'n comparanza colos 10€ de los muergos, yera hasta baratu.



Reguemoslo too con un Belondrde y Lurton 2009 que foi'l que fizo xubir la cuenta (Carpe Diem!!) hasta los 41€ por cabeza colos 2 cafetinos con xelu finales.

El Horreo - L'Horru (Antromero - Gozon)

Si hai un chigre n'Asturies onde'l productu seya la estrella, pa mi esi sigue siendo L'Horru d'Antromero. La calida de los sos pexes y mariscos ye seguro; teniendo,amas, dellos barcos pescando pa ellos. Tamien ta clara una cosa, baratu nun ye, por eso hai que dir siempre acompañau d'un bon enchufe (un veceru de tola vida) colos precios bien negocias y ataos enantes de sentate a la mesa. Esi dia cumplieronse toles condiciones (incluso la de tener a los neños cubiertos) pa poder esfrutar d'una cena impresionante, dempues d'años ensin poder pisar el chigre.

Aprovechando una celebracion y cola compaña de los canticos rexonales (y nun tan rexonales) del numberosu grupu qu'ocupaba l'ala drecha de la casa blanca, punximonos con toles ganes a esfutar d'un maravillosu alcuentru cola mar. Entamemos con dos entrantes de quisquilles (semeya un) y otros dos de percebes (semeya dos).

Nun hai munchu que dicir de la preparacion, pero vamos, espectacular productu, sobre too les percebes, pena de nun alcordame de poner una moneda a la vera d'un d'ellos pa sacar la semaya. Too persabrosu y prestosu.

Siguimos con otres dos raciones de chipirones de potera afogaos. Otru espectaculu pal tastu y eso que vinieron con una disculpa por ser mas grandes de lo normal (lo qu'afecta a la testura del bichu, pero non al tastu). Unes pataquines frites y la salsina con tinta un plizcu cebolla y a esfrutar.



Llegaos a esti puntu, ya sabiemos que'l platu estrella del chigre nun taba disponible (la furagaña al llombu) a pesar de los intentos d'ultima hora de mandar al barcu piquiñin a pescar de nuechi a ver si entraben delles. Al casu, a falta de furagaña, llegaron virreis pa siete. Escandalosamente frescos y con una salsa que, particularmente a mi gustame munchu,con un puntin acidu que-y dal llimon. Preapracion cenciella, sin ayos, nin cebolles, nin hestories. El bichu, les pataquines, la salsina y al fornu. Impresionante.



Pa ser sinceru, nun puedo contar el numberu de botelles d'albariño (nun apuesto pero creo que Terras Gaudas) que circularon pola mesa, amas de la botella de Ron "dos maderas" que tamien anduvo per elli hasta que desparecio entera.

Ensin dulda un sitiu pa esfrutar, del que nun m'atrevo a poner precios porque la referencia pue salir rana, que nun ye pa tolos dies, pero que bien sienta. Un abrazu especial a los otros dos "fartones" que apaecieron perlli de sorpresa y que tuvieron qu'aguantar la marcha que llevabemos na mesa de siete :-)

El Tonel ( La Villa - Villaviciosa )

Enantes de marchar a folgar perhi n'agostu, dimos una vueltina n'un caldiu dia d'esi mesmu mes (si, esi dia que tasi pensano, porque foi l'unicu bono d'agostu) y decidimonos parar nel Tonel, porque teniemos bones alcordances dende que fai unos añino tuvimos cenando con unos familiares de la muyer ehi y salimos encantaos, porque nos gusta camudar de chigre, porque taba bono y apetecianos terracina y porque si, y ya ta.

Pa compartir, y como los antoxos de la señora son inescrutables, tomemos unes alcachofes de bote con xamon. Ensin ser les meyores alcachofes de bote que tomare na vida, el resultau foi l'esperau, abondo bonu. Visto les ensalaes que circulaben yo camudaria esta eleicion pa la prosima. Pasadines un plizcu pela sarten con aceite d'oliva y xamonin, daben el pegu y xintaronse bien.

La costera ya taba ehi, asina que los dos segundos nun podien se d'otra cosa que bonitin de dos cachos diferentes del bichu, pa prebalo too. Per un llau unos llombos de bonitin a la plancha (semeya un) con un plizcu de tomate natural, unes fueyuques de verde de compaña y unes setes plancha perriba. De la que lu pedimos el camareru foi abondo insitente n'esplicanos que'l puntu d'esti platu yera tirando a poco fechu pa que quedare xugosu y que habia xente que lu queria pasain del too.Ya y-comentemos que queriemos el puntu que los cocineros y-diesen, que pa turrialu habia tiempu.
Resultau, nun taba tan poco fechu como mos asutaba y'l puntu resulto l'ideal pa dexalu xugosin. Platu bien llograu.

Pela mio parte pedi una ventrisquina plancha con unes pataquines a la panadera que taba pa rellambese con tomatin natural perriba. Na, bon productu bein preparau, col puntu llograu pa nun pasar la ventrisca. Tamien acertemos.

Pa beber tuvimos con un vinin Verdejo que nun se si sedra hibridu/ecoloxicu pero que cumplio bien col bonitin. Yera un Prius de Moraña (nun de Toyota) 2009. Dos cafetinos con xelu y 26€ por cabeza. Ente que xintemos bien, que tabemos agustu y que nos metieren un clavel na Poda'n Verde el dia antes que entovia me temblaba la cartera,la visita prestonos un monton. Volveremos a ver como preparen el restu los pexes.

Tamien me presto que ser, sedra un chigre, pero los mantelos yeren de verda y la presentacion de los platos taba tamien bien llograda, que tou'l mundiu sabe que pelos güeyos tamien se come (y munches vegaes mas que pel butiellu)