domingo, 14 de noviembre de 2010

HR Amada Carlota (La Cotariella - Cabranes)


Ya somos unos asiduos a les xornaes de la güerta y la viesca de Cabranes dende que les nauguremos alla pol 2007. La verda que da gustu la oferta hotelera y de restaurcion d'esti conceyu vecin y piquiñin que dame muncha envidia si miro pal mio Sariegu.
Ya conocemos la mayor parte de los chigres de Cabranes, pero viendo los participantes llamome munchu l'atencion esti hotel rural que, igual toi equivocau, pero paezme que ye la primera vegada que s'apunta al tema. Mirando la paxina güeb llamonos munchu les vistes del sitiu, asina que decidimos prebar la cocina.
Comedor piquiñin (3 meses) con unes vistes impresionantes al valle, aunque'n dos de les tres meses hai un sitiu nel que pues quedar d'espalda. Ensin dulda la meyor mesa ye la de la semeya un onde naide queda ensin esfrutar del mesmu. Tamien ayudo'l dia de seronda que pola mañana tuvo ensin llover y con solin. Tratu esquisitu por parte'l dueñu y musiquina persele qu'ayudaba a relaxase.
De detallin traxeronnos un par de crocretes de morciella que daben a entender que dibemos xintar acorde'l sitiu.
Ya de primeru una sopina de castañes al Pedro Ximenez que taba perbona y na que lo unico que s'echaba de menos yera'l que'l tiempu nun tuviera peor pa esfrutar mas del calorin de la sopa. Tastu xustu a castañes, sele, ensin empalagar pero mostrando la contundencia delles nel platu. Gustome munchu (semeya de baxu).

De segundu tomate confitau de la güerta con cruxente de cecina (el papelin ponia virutes, pero non, yera un cruxente). Segundu estupendu, un tomatin con tastu de los de verda, llixeramente confitau, con un cachu de cecina en cruxente (perfeutamente llograu de testura) too ello con aceitin de perrexil que sirvio pa facer "barcos" col panin (por ciertu que foi lo unico que nun taba a la altura, el pan). Bien conseguidu'l tema del camudar el calor del primeru pol friu del segundu. Prestosu y ricu.

Pasemos entos al caberu platu del dia, sollombu de gochu en salsa de mazana, con cebolla acaramelizao y muselina de mangu. Munchu nome, a l'altura del platu. Un sollombu tienru, bien cocinau, poco fechu como me presta a mi, sobre una salsina de mazana un plizcu dulce que-y ponia esi contrate a la carnona. perbonu, gustome munchu. L'unicu que llego xustu de temperatura a la mesa y col pasu de los minutos termino un plizcu mas friu de la cuenta. Pero vamos, esto ye por poneme pih.u col tema porque taba coyonudu. La cebollina de compaña tamien taba perbona, mentantu que la muselina de mango yera l'adornu que s'esperaba n'una esquinina del platu.

Ya cola fartura completa llego'l postre, frixuelu rellenu de mermelada de frambueses. Ricu, ya sabeis qu'esto nun ye lo mio. Gustome munchu un cachu de dalgo que llevaba figos que vese a la manzorga de la semeya de color prietu.

Pa beber habia tres opciones, tintu Jumilla Juan Gil Monastrell 2008, Care Rosao de Cariñena o Sidre de mesa Villacubera (de Cortina n'Amandi). Escoyimos el tintu. Vinin curiosu d'alta graduacion alcoholica (15º) pero sele'n boca y afrutau. A mi gustome. Dos cafes con xelu y dos chupitinos de mazana verde de Los Serranos (pa mi los dos), tou ello por 29€ persona, que yera mas o menos como taben tolos menus na zona (variaben dende los 26€ hasta los 32,4€). Ensin dulda un sitiu especial pa repetir tirando de carta a ver que tal.

miércoles, 10 de noviembre de 2010

El Sena (Torazu - Cabranes)





Tres del desgraciau incidente gabachu, un nun podia quitase de la tiesta el restu de Paris y bono taba Torazu ehi a la vera. Torazu tien munches similitues con Paris, los dos tienen helipuertu, los dos tienen hoteles con SPA, viesques frondoses y los dos tienen un Sena. Hai munches diferencies, la mas importante ye que'n Paris yo nun alcontre un sitiu onde te dieran tortos con picadiellu y güevinos de casa lo que, per otru llau, y-resta munchos puntos.

Mira que paso munchu per Cabranes en xeneral, pero nunca entrara nel Sena (casualida) asina que decidime l'otru dia. El Sena ye un chigre de los de tola vida con mantelos de papel y sidre pa beber (nun mire si tenie carta de vinos, la verda) y una parrilla detras de la barra que domina la entra pel bar. Nun hai carta, polo menos en domingu, sinon dos paisanes cantandote les coses que tienen que n'un 90% de la parrilla que manexa l'amu.

Esti dia yera facil, daque verde, daque carne, un con fame y otra que non, asina que pa compartir una ensaladina de llechuga, tomate y cebolla bien rica (semeya un). Dempues la parienta decidiose por media de costielles de gochu, pasadines lo xustu, riques y xugosines. El chimichurri que tienen ta bono y nun pica munchu (semeya dos).

Pela mio parte llego un de les estrelles del chigre, el sollombu de gochu (semeya 3) a la parrilla. El gochu debia ser la "gran" estrella del cubil polo menos pol tamañu del sollombu, si bien taba como abiertu a la meta de xuru que pa poder dexalu xugosin na parrilla. Impresionante, pa que contar, tienru, xugosu, con esi llixeru afumau que dexa'l cocinar con maera, ensin dulda de lo meyor. De compaña venia con unes pataquines frites caseres y un poco de verde.

Taba abondo fartucu y nun soi llambion, pero claro, nun voi dexar la oportunida de pedir l'arroz con llechi de Cabranes, asina que pedilu....pa llevar a la mio güela esi mesmu dia. La so opinion en dulces ye valoratible na mio casa, nun porque los cocine, sinon porque nun conozco paisana mas llambiona, ye capaz de xintar una bandexa de pasteles ensin respirar. Puntuolu realmente altu, pal mio gustu (pude meter una cuyar al cuencu n'un despiste) taba un plizcu mas dulce de la cuenta pero claro, la mio opinion n'estos temes ye intrascendente, la verda que taba perbono.

Dos botelles de sidre del palu de Coro, cafes y pan por 16€/persona. Aprovechai a xintar el sollombu que dixome un paxarin con familia elli que'l paisanu xubilase o a finales d'esti añu o pa primeros del que vien. El negociu va tenr continuida, pero lo que importa ye'l parrilleru.

miércoles, 3 de noviembre de 2010

Le Laurent (Paris - Francia)





Primera visita pola mio parte a Paris, la ciuda del "Amour" o "el pueblu de Juanjo" que yera como la conocia hasta agora. Pena de visita rapida porque llegue'l mesmu dia de la cena y'n cuatro hores, cual turista nipon, diome tiempu a patear dende'l Arcu del triunfu hasta'l Louvre pasando pel Obeliscu y la Torre Eiffel, eso si, paeciome una ciudad impresionante y quede con ganes de volver con mas tiempu.

Dempues d'esti paseu, el madrugon aeroportuariu y la xinta del aeropuertu ya taba yo naguando por una bona cena en Paris. L'escoyiu polos mio anfitriones foi Le Laurent, xustu enfrente del Palaciu del Eliseu colo que nun perdi la esperanza de ver a Carla Bruni perlli (a mi Sarkozy ye que nun me pon na) durante la mesma. La verda que'l sitiu prometia, una institucion na ciudad, un cheff, Alain Pegouret, dau a la cocina d'autor y xuntar Francia y cocina, la cosa nun pintaba mal.

Tres de la recepcion, que pase tomando champan del ricu y falando ingles ente gabachos, entremos a cenar n'un salon d'esos piquiñinos (yeremos unes 60 persones) y afayaizos pero qu'en pocu tiempu paso a ser piquiñin ensin mas, con esa mania que tienen equi de ponete los cubiertos casi enriba del platu del vecin. Nun se si habra que yos-explicar a los franceses eso del "espaciu propiu", menos mal qu'un nun ye Tachenko y entra en casi cualisquier sitiu.

Entamo la cosa con un indescriptible primer platu consistente en salmon marinau debaxo d'una capa de color verde que llevaba de too, dende tastos a naranxes y llimones a pepinillo con una testura ente xelatina y emulsion y que nun me fixo la menor gracia. Polo menos el salmon de baxu taba medianamente ricu. Debe tar de moda en Francia (polo menos en Paris) esto de poner la comida embaxu un conxuntu d'otres coses porque vilo na comida del dia siguiente nel centru de conceyos en varios platinos.

Ta claro que la cosa nun entamaba bien. El segundu (semeya dos) ameyoro les sensaciones ensin llegar a nada destacable dientro del mio sentiu del tastu que igual nun ye del tou finu. Entrecot de xata (la pieza central ensin nervios y con un corazonin de grasa) con tastu bono pero ensin gracia (la pieza nun tenia'l tastu que se y-presuponia). Fechina per fuera y sangrante per dientru, fallo mas la pieza y la falta de gracia del conxuntu (4 pataquines sueltes y un cogollu d'ivernaderu del Ejido) que la cocina en si.

Venga, ya taba yo quemau colos francese y la so nouvelle coucine cuando llego'l postre y...dexome com taba. Bon chocolate pero sobre una base "galletil" que nun-y aportaba na de na (semeya dos).

A tou esto, los vinos de la cena (de los que dexo la semeya tres a los entendios) fueron lo unico prestoso de la mesma, ensin ser denguna maravilla. Gustome mas el tintu que'l blancu. Esti caberu influiu por el "bon" facer d'un "profesional" que s'empeño en creer que'l blancu yera un "blanc de blancs" echandome la ultima copa de vinin na del agua. Y direis que que pih.u que soi, que que mas me daba una copa que otra y tendrieis razon porque les copes d'agua y vinin yeren iguales, si nun fuera pol pequeñu detalle de que la d'agua tenia dientro eso, agua y de la de gas, d'ehi lo de pasame del blancu al "blanc de blancs" llixeramente espumosu.



En resumen, nun se lo que pagaron por persona, pero si tenemos en cuenta que'l chigre nun ye baratu y qu'un menu curtiu cuesta sobre los 150€ sin bebides, fixome pensar eso de "¡ay! si vendieremos meyor l'Asturies-España gastronomica". En fin, que si vais a gastar perres a Paris n'um bon chigre, nun vayais a esti por muncha Carla Bruni qu'espereis alcontrar.