martes, 21 de mayo de 2013

La Venta del Jamón - La Venta'l Xamón (Pruvia de Riba - Llanera)

La Venta'l Xamón ye un clásicu na cocina asturiana, polo menos nel centru. Un clásicu con toles lletres, nun espereis preparaciones minimalistes o conceutos novedosos. Ye un sitiu, nel que nunca fallen, basáu nel productu de calidá y la cocina tradicional.

¿Nun quies fallar con un veceru o una visita de fuera?, pues traeslos equí. Conozco a un famosu diputáu d'un país centroamericanu, que nun taba seguru de prebar les fabes porque claro, yeren "frijoles" como los d'ellos pero, ¡ay amigu!, creo que cuando soltó eso de "¡puta, esto no tiene nada que ver con nuestros frijoles!" ya se veía que la cosa diba bien.

Al casu, la cabera visita foi pa celebrar un cumpleaños na familia. Como siempre atención profesional y unos entamos de la casa sólo pa la espera (aceitunes, almendres y esta vegada choricín un plizcu picante). Sobre'l mantel la propusta del mes del menú del bugre que convenció a parte de los presentes y otros que preferimos tiranos a la carta.



De los entamos de la carta, como non, el xamón, siempre de gran calida, siempre perbien cortáu y cola compaña de unos panes tostaos con tomate y aceite por si te presta mecelo con ellos.


Hubo varios entamos toos ya del menu del bugre. El que más me prestó foi el de la tortiella de kikos y fuá gras. Ya nos platos principales, como non, el bugre a la plancha col meritu de tener un bona pieza y nun pasalu, los que lu prebaron dixeron que taba perbono.



Ya nos principales, pa mi carnona, sollombu de xata endolcáu en tocin, que ye un clásicu del sitiu. Un par de sollombos de bona calidá perbien fechos, nel puntu esi de los tres colorinos y cola compaña de un platin de pataquines frites de verdá con pimientos del padrón, que nesti casu foi que "non", vamos, que nun picaron pero prestaronme asgaya.



Otru platu diferente al menú que pasó pela mesa foi el pixín del que dixeron tamién que taba nel so puntu.

El vinín que pasó pela mesa foi el Murua Reserva 2010 que cumplión con tou'l mundiu. Nun m'entruguéis pol preciu, porque nun tengo nin idea que pa eso me convidaron, eso sí creo alcordame que'l menú del bugre andaba polos 25€. Como vos digo, un clásicu, de nun fallar y xintar bien.