La Bienquerida (Llión)

Sí, ya sé que agora que vemos el sol (como Blade) nun nos alcordamos del xunu que pasemos de lluvia a morrer. Asina que, aprovechando la guardería infantil propuesta por los güelones pa que nos diéramos una escapadina, garremos el Puertu Payares y'n Llión que nos plantemos a facer turismu, xintar bien y beber meyor.

La Bienquerida ta nel cascu vieyu de Llión a dos pasos del Húmedu enfrente de una disco abondo conocida, faciendo esquina con dos cais peatonales. Chigre de día y copeteo de nuechi, tienen una terracina perbien puesta na cai más tranquila de les dos a les que da. Solín, calorín, bon vinu (Quinta Apolonia 2010), tratu profesional de la nuestra camarera (eso tan difícil de ser simpáticu ensin pasase de confiances y profesiona a la mesma vegada), la meyor de les compañíes, ¿qué más se pue pidir?, pues una bona xintá y, la verdá, cumplió, prestonos asgaya.

Tolo pidimos al centru la mesa. Entamemos con unos sushi de salmón, ricos, anque ya los tomara meyores estos taben bien fechos y prestaron munchu al aire llibre. La curiosidá de la salsa de soya llixeramente reapartía per riba del sushi (tamién te poníen el platín pa moyar más si queríes) y que los xinté a mano, porque veíame raru usando el cuchiellu y'l tenedor pa esto :-). 8 bonos trozos de ración pa entamar.

 Ensin priesa, pero ensin pausa, vamos, nel puntu xustu de tiempos, y mentantu apurábemos la botellina del hermanu pequeñu del Belondrade, llegó la sorpresa de la tarde, ¡que rico taba!. Carpachu de potru con escamines de fuá, pistachos y emulsión de AOVE con aceite pistachu. Buá! pero que rico!, nunca probare yo un carpachu tan bono. Esos toques que-y daba'l fuá y'l amestu d'aceites bonos, chaos nel platu en proporción adecuada para resaltar el tastu del carpachu y nun ocultalu, sorpresa perbona.

 La botellina de Quinta diba baxando, pero entovía y quedaba apurase col caberu platu, que tuvo perbonu. Un tataki d'atún colorao, con fideos chinos y crema d'ayu, al que y-poníen un platín de sal maldon a lláu por si queríes char un plizcu.

L'atún vuelta y vuelta pa da-y el doradin xusta per fuera y dexalu crudu per dientro. La cremina d'ayu un ali-oli persele, que facía bona compaña. Otru pltu pa esfrutar, bien rematáu con bon productu.
Unos caftinos con xelu y a esfrutar del día y'l sol.

De la cuentina fixeronse cargo los tiques restaurant, qu'esto de la crisis ye mui jodido, 60€ en total que me paecieron más que bien.