jueves, 25 de abril de 2013

La Cabaña de Conce (Santuyanu - Les Regueres)



Dionos l'otru día por dir al mercáu de la Flor en Gráu y, como nun podía ser d'otra manera, más que llover nun fixo. Too enlleno de xente y colos neños poco pudimos patear, una pena. El problema llegó a la hora de xintar, día de folixa y tiempu malu, ¿onde van tar los asturianos?, pues xintando, ¿u van tar?, asina qu'en Gráu y alrodios nun se podia dir a dengún llau. Alcordándome de contínuo de les pites roxes del pueblu (famoses en toa Asturies) paeciome una bona solución tirar pal conceyu vecin de Les Regueres, ta a tiru de llanxa del Nalón, y ellí paremos en un d'eso de tola vida de la zona (acordaivos que soi de Llanera).

Sitiu afayaízu de comida asturiana, con culumpios fuera (dempués de xintar nun llovía, pero tenéis que imaxinavos como quedaron les culeres de los guah.es) nel que los fines de selmana sólo trabayen menú.

Pa los neños mediu menú consistente en escalopines con pataques, perseles y tienros. Yo, nel menú de los mayores tireme pol pote y'l cabritu guisao con pataquines. Hai que perdonar al autor de les semeyes, yo mesmu, por nun tener la decencia de sacales colos platos enllenos :-), pero ye que tar a la gueta d'un sitiu onde xintar, tarde, colos guah.es y los mayores esfamiaos, casi nin m'alcorde de sacales. Prestome mas el cabritu que'l pote. El pote nun taba mal, bon compangu (gustome munchu la morciella) pero a mi gustame mas compactu. Esto nun quita pa que nun tuviere bonu. El cabritu prestome muchu porque taba nel puntu xustu de cocina, sele, tienrin y tenía un toque, un plizquín de na de picante que-y daba muncha identidá.

Per otros llaos de la mesa pidieron el llinguau rellenu (nun m'alcuerdo de qué) y'l bacallau con salsina que recibió aplausos.

Bon sitiu u dir cola xente a xintar y nun quedar con fame, eso sí, la prósima con sidre, porque nel menú venía incluíu un Jumilla que yera ideal pa los amantes del Aloyón, Mangas y/o asemeyaos, la madre que me...qu'entrba porque taba frescu y porque un paisanu, ye un paisanu y si hai que lo beber, bébese.

Nun nos cobraron los cafés y'l menú salió por 15€ los nuestros y 8€ los peques. Raciones abondo grandes y xinta prestosa.


martes, 9 de abril de 2013

L'Albancia (La Ortigosa - Llaviana)

Tou tien un entamu y un fin, y esi foi'l casu de la carnona, entamó equí, na Albancia, un sitiu perafayaízu y perguapu puestu'n piedra y maera, con munchu gustu. Un sitiu prestosu onde perderse a tres Km de la Pola Llaviana, pero to pa riba, pal monti, como nun podía ser d'otra manera diendo yo.
L'albancia ye'l nome d'un chigre y tamien el del hotel pegau a él, pero nun ye'l chigre del hotel, y los dueños nun son los mesmos, magar que fixeron les coses n'andecha y arrancaron al mesmu tiempu.
Fin de selmana con muncha ñeve y cutu asgaya que nun nos permitio el domingu esfrutar de la bona pinta del menu especial de fin de selmana por 18 € porque punxose a ñevar con tantes ganes que ellos tuvieron que trancar y nosotros que marchar rapidu, nun fuera ser que tuvieremos que quedar ellí hasta'l llunes. Volveremos.
Pero voi centrame na cena del vienres, la del día de llegada, nel que pases pela Pola a tomar un vino, pero apetezte cenar cerquina del hotel.
Pa entamar, como detalle de la casa, una mantega casero con munches coses (ente elles ayu y mas especies), polo visto van camudando los ingredientes pa nun repetir. Bona presentación y ración abondo grande pa ser un detalle.

L'únicu que tenía fame yera yo, asina que'n vez de la tabla de mini-tortos entera, punxeronme 2 como de preba. Perbonos, prestome más el de la mazana asao con quesu vidiagu (creo) y mus de fuá, igual más polo estraño del amestu que por otra cosa. L'otru mini-tortu el clásicu de picadiellu. Un picadiellu abondo bono. Los tortos per bien fechos, esponxosos y seles. Prestaronme munchu.

Equí llega la tarxeta mariella que me saquen dellos de vosotros, sí, taba carnivoru y pedí carne a la piedra. Carne de primero, y con un acompañamientu como tien que ser pa un sitiu prestosu, pataquines de verdá y verdurines a la plancha. En mi defensa diré que nun había naide más que la familia de los dueños cenando, colo que nun molestábemos a naide col fumu, jaja.

Bona ración, too nel so puntu, bonos detalles y lo dicho, quedemos con ganes de prebar la so cocina en serio y nun pudo ser, una escusa pa volver
Dos cafés con xelu, un par de chupitos y una botella de Pago de los Capellanes cr 2009 que fixo una gran compaña por 28€ cabeza.