martes, 3 de junio de 2014

Feudo Real - Feudu Real (Grau)


De camín a Teberga, onde díbemos a facer unes fleches prehistóriques de fundir el misteriu, desviémonos un plizcu pa dir xintar a Gráu, que ye una villa prestosina de visitar magar de nun ser domingu de mercáu que ye cuando más maraballu hai.

Decidimos parar a prebar el Feudu Real, un chigre afayaizu, bien decoradín (maera, botellines de sidre puestes con gustu) y bona atención. Tienen comedor aparte, anque esi día preferimos xintar nel chigre, y tienda. Pa que vos faigáis una idea ye abondo asemeyao al Tierra Astur, tan asemeyáu ye, que tamién tienen tables y tablones de munchos tipos.

Ensin denguna referencia, más allá de ver dellos platos del menú del día pasar, vimos que les raciones teníen bona pinta y que yeren "piquiñines".

Ente la madre y el fíu decidieron qu'un entrecot taría bien pa entretenese con eso de dir poniéndolo na piedra y char sal que-y presta un montón al guah.e.  L'entrecot de xata yera de primera, ya venía marcáu para que'l toque de piedra fuera na más que lo xustu según y-preste a cá un y nun montar una fumarea, claro. Primera calidá, ración perbona con pataquines frites de les de verdá y sal gordo a char al gustu.

Les ventaxes que tien el baxar de pesu son que los fines de selmana nun te preocupes de lo que xintes, asina que tortos con picadiellu de gochu xabaz, ¡vaya fartura!. Pedazu de platu con cuatro tortos de tamañu mediu, nada grasos, nel puntu guapu de fritos con pataquines de verdá, dos güevos perfeutos de puntu pa moyar y un picadiellu de gochu xabaz que picaba lo xusto y que casi nun tenía grasa, sabrosu non, lo siguiente. Bua...como me punxe...teo que lo dicir, nun fui capaz de finar el caberu tortu, claro,  esa ye la desventaxa del réximen :-) y del que de detalle de la casa te pongan una ración completa de pastel de tiñosu, que nun taba nada mal, enantes de xintar.


Un zumín de piescu, un par de Viudes de Corsino, dos cafetinos con xelu y 45 € con billetes de Monopoly. Ensin dulda, un chigre con terracina pa los díes de branu que merez la pena visitar.