martes, 23 de junio de 2015

Quince Nudos (Ribeseya)


Segunda visita al Quince Nudos, anque esta vegada nun tenía quorum pa tirame al arroz, una pena, eso sí, pudimos esfrutar del restu la cocina del chigre, que ye bien prestosa. Amás, debie-ymos al chigre una "ración de semeyes" tres de la cabera visita onde la máquina de retratar, bono, non, nun y-echemos la culpa a la máquina, el semeyeru, foi un desastre y sólo salió la primera.

D'entamu la casa punxieronnos un par de tortos de maiz con un pexe afumáu (nun m'entrugueis agora que pexe que nun m'alcuerdo) y unes güevares, magar de nun alcordame del bichu, sé que taba bono.


Pal centru decidimos volver a los chipirones al puntu de plancha, con cebolla y tomate secu.Bon productu, bona preparación, perpretosos. Una ración contundente pa siguir faciendo boca.



Pa nosotros el meyor platu de la tarde foi ensin dulda el tataki de ventrisca de bonitu con salsa de wasabi y güeves al wasbi de pexe que pidieron pel otro llau de la mesa.
Una ración contundente, un productu espectacular, bona presentación y un puntu de pexe perfeutu. Un platu pa fartucase bien, vais contámelo a mí que finé xintando más de 1/4 dempués de acabar colo mío.


Yo escoyí un platu más normalucu, un saltu de xata con aceite de boletus onde tanto la salsina como les pataques a la panadera taben perbones. La carnona de primera y con bon puntu y, anque dellos trozos taben un plizcu más duros qu'otros, el resultau foi bonu. Otru platu prestosu, pero esti chigre ye más de pexes, claramente.






Dos cafés con xelu y de compaña una botellina de sidre EM brut de El Gobernador. N'esti estilu sólo tenía prebades El Gaiteru etiqueta prieta y Ponma Aurea y esta gustome munchu. Ye una opción munchu más interesante que les sidres aquelles de nueva espresión (porque a sidra natural los asturianos siguimos prefiriendo la d'escanciar) y más prestosa al mi mou de ver.

En resumen, una bona xintá na que la calidá pagase a 37,5€ por persona, eso sí, colos famosos tiques :-)

2 comentarios:

David López Castañón dijo...

Vaya pintaza esi Tataki ... yo tamién debo visita ensin arroz pa probar otres coses.

Sobre les sidres brut, toi d'alcuerdu contigo, EM ta a meyor nivel que les dos que mentes, pero pa mí (y ye dalgo personal) gana de goleada Prau Monga. Y da-y otra vuelta a la sidra de mesa, ta meyorando ... el problema de la sidra de mesa ye que nun dexa ser sidra natural, y eso produz madre, y nun ye plan presentar una botella con madre, entós, al clarificala, pierde; pierde sabor ya aromes. Pero tan nello, y toi probando sidra de mesa cada vegada más bona. 1947 d'Angelon tamien. Coyonuda. Y nun me paguen, eh? XD

Fartones dijo...

L'arroz ye que nun tengo más quorum que'l del guah.e pequeñu y esta vegada tabemos solos, que si non, vaya si cai, nin!
Prau Monga tamién la teníen y tuve pensando cuala prebaba, a mi estes espumoses convencenem más que les de mesa, sedrá pela clarificación o lo que seya, pero nun me dan más.
La prósima cae la del Prau :-)