Cenador del Azul (Mieres)...y fin :-)

Dalguna qu'otra vegada pase perqui pa xintar el menu del meudia, pero...dempues d'una nuechi'n vela esperando la meyor noticia pasamos pel Azul a xintar de carta, como los blancos. Contentu poles bones nueves (guah.e sanu y gallasperu como la so ma) too tastiaba meyor, lo cual nun resta meritu a la estupenda cocina del restaurante. Xamonin del ricu con tostaes de pan con aceite y tomate, el xamon taba pa rellamabese y como digo siempre, nun lu cocinen ellos, pero escoyenlu y cortenlu (semeya un), eso si, un plizcu piquiñina...o ¿sedria la fame?. Furagaña a la plancha con verdurines, como mos dixo'l camareru, si'l productu ye de primera, ¿pa que complicase?, bon llombu con aceitin y sal y ¿pa que mas? si la furagaña fresca y xabaz facia'l restu, costrina esterior y tienru interior (semeya dos). Les verdurines a la plancha un meru tramite pa enllenar el platu y da-y color, pero, ¿de verda importen?. Pel otru llau de la mesa saramolletes con xamon en taquinos (semeya tres), impresionantes, cenciellos como la furagaña pero cola compaña ya dicha y unos pataquinos cocios, aceite, sal y puntu del cocineru (amas, pueo prometevos que la semeya "d'autor" que yos-fice nun ye pa demostrar que yeren frescos, que lo yeren, por munchu que paezca que ten corriendo). Bones raciones cola collaboracion del collaciu de Terras Gaudas 2008, Fuensanta d'esti añu (digo yo), un par de cafetinos y "baratu", foi la expresion usada pol feliz güelu (que de xuru qeria dicir, "me tira del... el preciu")...que quereis, toa la nuechi'n Muries nun podia tener meyor final...y nun va pola comida, que taba perbona!!!. Asina querria pesllar un blogue por una temporada, con una bona noticia. Besos pa toos, ya somos 4 a xintar la proxima vegada que nos digais dalgo..asina que pensaivoslo :-). Gracies por estos meses lleyendome y mos vemos en teniendo tiempu...a saber cuando!!

Casa Gerardo (Priendes-Carreño)

Apurando los caberos dies de fartures enantes de tener de pesllar el blogue por un timepu, decidimos dir a prebar una de les mas reconocies Estrelles Michelin d'Asturies, eso si, un dia primero de que'l Madri acabare cola comida (creo que diben güei a xintar, garraron fuercies y llantaron 4 nel Molinon). Como yera la primer vegada que dibemos quiximos parar nel bar a tomar un vinin pa dempues pasar a xintar. El bar ta mui guapu, modernin y lo que mas me presto foi la bodega esa de cristal y metal nel que tienen tolos vinos a la vista, pena de "Euromillones" pa poder poner una asina en casa. Pasamos al comerdor de non fumadores, nel primer pisu con una decoracion ente moderna y tradicional, perafayaiza. Tomonos nota Marcos Moran avisando de que mio gorrin diba tardar unos 35 minutos, asina que casi nos fartamos a entamos de la casa. Como detalle pa entamar punxieronnos una mantega casera (mas bien como una mouse de mantega) con mazana que taba perbona, tan bona que colo rico que taben los panes (de maiz, de cereal, de trigu...) casi entumbo. Como siguien engarraos col tiempu del gorrin traxeronnos dempues una cremina de verduras con un poco de pasta brick, mui rica. Ya casi fartos de tantu pan vinieron los oricios (semeya un), platu cenciellu, simplemente güeves de varios oricios presentaes dientro d'un, paciencia pa sacar les güeves y presentales asina. Los oricios casi crudos, solo un golpin de calor, vamos, como a mi me gusten. Una perla de llimon dientro que facia bona compaña anque yo prefierolos solos. Por fin fizose'l gorrin y llegaron los segundos. Tienru, con un gran tastu, mui tradicional y col pelleyu tostadin, de 9 (semeya tres). Punxieron una confitura de naranxa a la vera por si m'apetecia amestalo col gorrin, prebela, pero mazcaraba munchu'l tastu y elli quedo. Pero, ay amigu! si'l gorrin taba bono, el pitu yera de 10, impresionante, nun hai mas pallabres, prietu y tienru, xugosu, preparau como tola vida (una salsina d'aceitin y cebollines per baxo), mui, mui rico (semeya dos). Que mano hai na cocina porque un cachu yera pata, pero l'otru cacahu yera pechuga que ye mas dificil de dexar xugosa. Bones raciones, bona fartura que finamos con unos cafetinos y una copina de Sidre de Xelu canadiense (Neige), ya sabeis que yo nun llego a los postres nunca (pena porque tenia ganes de prebar l'arroz con llechi, pero yera imposible, el mio butiellu nun daba pa mas). De compaña un Abadia Retuerta 2006 y la sorpresa llego col preciu, 57€/persona, la verda que mui bien. De les Estrelles Michelin d'Asturies prebaes quedome col Corral y esti. La verda que pasamoslo bien, atedieronnos xenial y xintamos como campeones. La cocina mas tradicional de les Estrelles Michelin que conozco, pa mi ye'l que mas guarda esi puntu. De momentu El Corral y Casa Gerardo son los mios preferidos. Si teneis que entamar por dalguna Estrella, esti ye un gran sitiu.

Casa Monchi-Bar Antuña (Valdesoto-Siero)

Otru sitiu en Valdesoto nel que xintar estupendamente. N'esti casu tamos falando d'un chigre de siempre, de tratu amable y comida rico, que ye de lo que se trata, amas de tar llimpiu y cuidadin. Bar pa char la partidina (la que podeis char dempues de la xinta) y comeor afayaizu. Comida contundente, raciones grandes y precios piquiñinos. Tenemos la costume de dir cuando ñeva y visto de nuevo los cm de ñeve'n casa, ¿onde meyor que dir?, pues a Casa Monchi. Por ciertu qu'en La Pola, Valdesoto y alreores, güei nun quedaba nin una gota ñeve, en fin, paez que vivimos n'alta montaña porque'n casa quedaba abondo. Como vos contaba, chigre de comida contundente, caserina y prestosa. De primeru una ensalada mista de les de siempre, bien presentada y munches cosiquines, bonitu, esparragos, aceitunes...normalina pero rica (semeya un con mano de trasguina de 17 meses intentado garrar el bonitu). De los platos contundentes un bacallau de la casa, que preparen mui rico con les sos amasueles y gambes y sobre too la salsina allangostadina cola que va (semeya dos). Carne guisao con pataquinos y arbeyos, enorme racion pa un solu y carne mui rico (semeya tres, y paez que güei naide queria esperar a la semeya y venga meter les manes!). Bono, eso los demas, yo a lo mio, si vengo equi ye polos callos (semeya 4), tastu fuerte, con un plizcu de xamon, pero trocinos seles y tienros, piquen lo xusto (anque yo siempre yos-echo un plizcu mas de guindilla'n polvu). En resumen, unos callos coyonudos. Pa beber, sidre Muñiz y una botellina de Rueda blanco Vega de Zarzales. Equi lo de los vinos ye cuestion d'entruga-y al dueñu, porque na carta nun vais ver na que vos llame, eso si, nosotros vimos un "albariñu cosecheru" por 6,60 € y, como nun quedaba, traxeronnos el Rueda esti, que mira, nun taba mal. Dos postres non caseros (caseros hailos, pero paez qu'apetecio mas unos tipo xelau pa baxar la xinta)...22,4 € por cabeza, meyor RCP imposible.

Casa Alvarin (Aviles)

El domingu pasau siguimos col dia raru de Ribedeo volviendo per Aviles. Cutu, vientu y poca xente na cai pa tomar el vermutin. Tando equi apetecionos tomar pexe, asina que cualiquiera que conozca Aviles (yo conozcolo poco) va dicite que'l Tataguyo, el Moises o'l Alvarin. Como nun ta'l fornu economicu pal Tataguyo, col cutu que facia y lo poco que conocemos Aviles (error, gran error nun conocelo bien) nun habia manera d'atopar el Moises y decidimos quedar nel Alvarin (a la vera la Casa'l Conceyu). Pa un d'Aviles nun hai munchu que contar, chigre de tola vida con bon productu (como pudimos comprobar) y cocina tradicional. La sidreria ye un plizcu "fria", pero tien un par de comedores, un de fumadores y otru que non, abondo afayaizos y bien separaos por una porta de cristal automatica. Mantelinos de verda, servilletes de tela y ambiente ensin fumu, raro pa una sidreria, solo quedaba ver si la xinta taba bien. Decidimonos pol menu de fin de selmana, cazuelina de gules con setes, racion grande y bien rica, sobre too por unes setes que taben especialmente carnoses y sabroses y unes gules nel so puntu (avisu pa los sensibles a la comida caliente, ¡¡soplai bien que quema!!. Semeya un). De segundu decidime pol bacallau a lo Alvarin (semeya tres) y pel otru llau de la mesa merlucina a la cazuela ensin cazuela (debieronse-yos acabar con tanta gula. Semeya dos). El bacallau, nun llego al puntu d'entusiasmame, quiciabes porque la salsa tenia munchu pimientu, nun taba mal, rico pero non mas. Eso si, la merluza (mira qu'a mi nun me da mas por ella) taba que se salia, fresquina, con tolos ingredientes de compaña bien ricos y con gran tastu (a mi paezme dificil que la merluza sepa a dalgo). Dende llue nel Alvarin tienen bon productu y abonda bona mano coles coses. Pa beber dos botelles de Sidre Peñon, que meyoro munchu dende la cabera vegada que la tomara y dos cafetinos. Bona relacion calida preciu ya que salimos a 23,5 €/persona. Si conoceis Aviles nun hai mas que falar y, si nun lu conoceis, ye un bon sitiu pol qu'entamar.