Olde Hansa (Tallin-Estoña)

Que tal collacios!!. Como voi tar fuera unos dies ensin disfrutar de los chigres asturianos, pues decidime a aumentar los foriatos. Nun se como nun escribiera yo d'esti, porque creo que a toos vos fale de la esperiencia fartucona, pero mira que nun ponelu, nun teo perdon. L'Olde Hansa ye un restaurante medieval nel centru de
Tallin, vamos, como dir a los esconxuraos de Llanera pero en casa'l demonio de lloñe y dientro un chigre. Al casu, el chigre pue paecer de turistes, vamos, reconozcolo, debe selo porque la mayoria de los estoños entovia nun salen munchu a cenar, pero tase perbien. Escucaramoslu, por si yera mui guiri, tomando una cervecina a la tardi y decidimos venir de nuechi. El chigre ta perbien puestu, tou con un aire medieval cola peña vestia del añu del rei Carolo, que presta un monton. Les meses de maera y los vasos y platos, pues lo mesmo. Too pergapu, pero los güeyos tarden un tiempu'n ver, porque col tema medieval nun hai mas lluz que la de les veles de les meses. El sitiu guapu, toi repitiendome, y les raciones grandes asgaya. La experiencia ye la siguiente, na carta habia osu pa comer y equi, nin anque'l Furacu se ponga les piles y Paca y Tola tean esbardos asgaya, vamos comelo nunca. Asina qu'osu pa dientru. La racion grande y'l osu perbien preparau, xugosin y nel so puntu de cocina (semeya). L'osu ye como una carne de caza, asemeyao (por asemeyalo) al gochu xabaz pero con un puntu mas fuerte de tastu. El problema, ye que la comida d'estos sitios lleva unes salses nes que nosotros nun tamos avezaos y claro...nun ye que te mal cocinao, ye que'l tastu ye tan diferente que cuesta, con decivos, que'l caberu dia n'Estoña fuimos a cenar a un italianu porque yera lo mas paecio al "sur", cosa que dempues d'unos dies nel "norte" eches de menos. Nel casu l'osu la salsa yera d'estes agri-dulces fecha con frutos del bosque (frambueses, arandanos...) supongo que pa "matar" un poco'l tastu de carnona de caza, pero si mio güela pilla esta carne preparala d'otra manera de xuru. Cervecina del pais, un vasin de vino (esto ye tamien complica d'alcontrar a un preciu razonable), nun lleguemos a los 40€ persona, teniendo'n cuenta que l'osu yeren unos 42€ y que tas nel centru de la capital d'un pais, nun fue baratu, pero bien. yo con esto ya teo de contar a los ñetos :-)