Deloya (Uvieu)

El martes pasau llegue al Deloya totalmente refalfiau ya de comida dempues d'un fin de selmana de fartures en grandes sitios, d'estilos diferentes, pero de gran calida. Entame'l sabadu na Corriquera nel que'l corderu llechal volvio a tar estupendu y abundante (una patina vino pa casa n'un taper, nun yera cuestion dexala elli). Siguimos el domingu na Rula de Santolaya nel que mos dieron un tortu impresionante. Pa rematar, el llunes entamo con una xinta de trabayu na Maquina. El casu yera que tres tres dies ensin poder cenar llego'l martes otra xinta de trabayu. Decidi acutar nel Deloya a ver si habia suerte y yera mas sele la cosa. Equivoqueme, volvi a quedar fartucu n'un estilu diferente a los otros tres y agora teo que poneme a dieta polo menos quince dies (hasta dir a Bilbo, h.e h.e). Gran xinta n'un sitiu que nun conocia y que paeciome perprestosu y abondo afayaizu. Magar de tar situau nel pisu -1 del hotel Santu Domingu, tien bona lluminaria al dar, al travies d'una gran cristalera, a un patiu interior con un xardin. Dempues de sentanos (en silles comodes, pero d'eses que nuca pondries en casa) con un bon presentimientu y preparando'l butiellu, una vegada mas, pa'l almax de postre, entamo la xinta. Enantes del detalle de la casa, entamaron a ponenos dos clases d'aceite pa moyar el pan (gran costume esta) un de Toledo, que foi'l que mas me presto, y un navarru fechu con aceituna griega (¿pero bono, nun hai aceitunes propies en Nafarroa/Navarra pa tener que trayer del pais del vino de Retsina?) persele pal mio tastu.
L'entamu de la casa consistio n'una imitacion en forma a un güevu pero con tastu a castaña y toques dulces (semeya un), prestosu y del que nun m'alcuero de mas detalles, nun porque nun tuviera rico, pero tantos detalles pa la mio tiesta nun valen. Al centru pedimos xamon ibericu (mui rico, como siempre digo, nun lu fain ellos, pero hai que mercalo bono) y un amestu de güevu fechu a baxa temperatura, foa y setes de temporada (semeya dos). Esto taba impresionante. La manera de xintalo ye amestandolo too en un solo golpe de cuyar, colo qu'al final queda como una especie de revueltu. Platu abondo contundente y sorprendente, ya que a mi nunca se me ocurriria poner foa.
De segundu yo tireme pol gochin esin güesos con piña y debi ser l'unico que se confundio. Rico, eso si, pero na mio mente, y ehi tuvo'l fallu, taba'l de La Solana y nun tenia munchu que ver (semeya tres). Como digo, prestome pero taba un par de puntos per baxu de lo esperao. Pa mi, un poco secu y col pelleyu demasiao tostau, simplemente prestome.
Pero pela mesa hubo corderu ensin güesos, del que comentaron que taba perbono (semeya 4), llombos de salmonete de los que dixeron lo mesmo (semeya 6) y pixin con cebolla cruxente (semeya 5) que yo tamien prebe y del que doi fe del tastu a mar que tenia y lo bien cocinau que taba. Too ello, raciones abundantes que dexaron a tou'l mundiu fartucu.
La compaña fiximosla con un Enrique Mendoza Santa Rosa 2004 que taba pa rellambese.
En fin, que debi ser l'unicu que nun acerto col platu, lo que nun quier dicir que nun saliere contentu, nun acerte col meyor platu podriemos dicir.
Convidaronnos, pero crei ver unos 250 € pa cuatro, nun ye qu'escucara, ye que la cuenta venia al aire. La verda que sitiu pa repetir, en parexa meyor.

El Castiellu de Valdes Salas (Salas)

Aprovechando que la cuñi anda per Salas trabayando, acerquemosnos un domingu a dar una vueltina perlli con "guies turisticos" y xintar n'un sitiu guapu al que mos llevaron. Dempues de munchos años ensin entrar a Salas capital (la caleya de Grau a la Espina si que la uso de vegada'n vegada) merecio la pena volver. Alcontreme con un pueblin cambiau, mui cuidau y llimpiu con un pasein nuevu a la vera'l riu Nonaya bien prestosu. Alrodiu del Castiellu de Valdes Salas hai una esposicion d'escultures ente les que s'alcuentra una piragua, qu'anque nun valga pa baxar el Seya, ya vos aviso a los que teneis neños, qu'estos y-alcuentren usos perinteresantes.
A la vuelta d'un par de vininos pela zona fuimos a xintar al interior del Castiellu. El restaurante pertenez al hotel del mesmu nome, bien puestu y encontradizu, destaca'l patiu interior abiertu que tien que dar munchu xuegu'n branu pa tomar unos vininos o unos cacharrinos tranquilamente de nuechi. El dia que fuimos taba perguapu con sol, pero ca vegada qu'esti marchaba nun habia quien parare fuera, asina que d'esfrutar de la terraza na de na. Nun se fuma (o polo menos nun fumaron en denguna mesa mentantu tabemos elli) y tien trones palos neños.
Pa xintar tiremos del menu de fin de selmana ya que'n toes les meses taben con el y tenia bona pinta.
De primeru (semeya un) un entamu, nun tan pequeñu, de tosta d'afuega'l pitu blanco con anchoa del cantabricu. Un amestu bien conseguiu con un quesu bien ricu y una anchoa de les que se puen xintar y non de les que te fain arder la boca col sal.
De segundu, un salteau de setes de temporada con xamon (semeya dos). Sabrosu y prestosu, teneis que disculpame si nun soi capaz de decivos que setes yeren, pero abondo riques.
El tercer platu pa mi foi'l mas floxu pero mas que na porque na carta ponia "sollombu" y lo que llego foi un entrecot. Los amantes del entrecot taran naguando, pero yo taba esperando un sollombu, fiu. Pataquines a la panadera con cebolla perbien preparaes y l'entrecot bien cocinau, pero ya vos digo que tenie otres espectatives.
De postre circularon varios, yo decidime pol canutin d'arroz con llechi con chocolate, prestome, lo cual pue querer dicir que nun yera pa llambiones. A mi prestome, l'arroz con llechi nel so puntu de dulce con una capina de chocolate fina perriba eso si, nun yera muncha cantida.
El vino del menu foi un Museum crianza 2003 abondo rico. Teniendo'n cuenta los platos, la calida del menu, el sitiu y que'l vino mesmu suel alcontrase a unos 7-8€ en tienda, paezme que 21€/persona ye un preciu realmente interesante.
De xuru que'n Salas hai sitios mas de caza o chigres de bon xintar de tola vida, pero agradezco esta xinta, tuvimos bien agustu n'un sitiu perafayizu al qu'habra que repetir visitina.

Roue d'Or (Bruseles-Belxica)

Fai un par de selmanes tuve de facer una visitina rapida a Bruseles polo que a lo mas que llegue foi a tar alrodiu de la Grand Place/Grotte Markt. Menos mal que ya lo conocia porque estos son los tipicos viaxes que dante rabia por nun poder "turistiar" un pucuñin, polo menos.
Amas de los bomboninos de Neuhaus (prefierolos a los Godiva) y la cervecina nel Manuel, traxe pala alcordanza un sitiu prestosu al qu'entramos porque nos dexamos llevar pola ñariz. En plena zona de guiris dimos con un tipicu sitiu nel que los foriatos como nosotros nun deben entrar munchu (de xuru qu'entren abondo, pero nun tanto como n'otros de perhi). Dientro notabense los acentos flamencos y franceses y los camareros solo chapurreaben l'ingles, eso si, tenien una version de carta na llingua de saquespeare (lo qu'ayudonos munchu teniendo'n cuenta que'l nuesu frances ye nulu y'l holandes anda ya polos negativos), asina que foi facil facese entender.
El sitiu tien una gran barra a mandrecha y la maera y'l gres dominen na decoracion (les meses son de la güela, d'eses que son too maera menos la parte de riba que yera de marmol-piedra), poco sitiu ente meses, como nel Barriu Altu de Lisboa, y cocina a la vista que ya facia presumir que diba dir bien la cosa.
Entamamos con un tartar de salmon (semeya un) que taba perbono solo lligau con un plizcu de bona mostaza y un poco de cebollin y mantega d'ayu decorando'l platu. Francamente ricu.
De segundos decidimosnos polos tipicos moxones "BENELUX" (semeya dos) al vinu blanco. Platu abundante, con moxones grandes y mui ricos de tastu, nel so puntu de cocion. Preparaos con vinu blancu, pimienta, cebolla y apiu, pa rellambese. Solo eche de menos el detalle Luxemburgues de ponete una velina debaxo la pota pa que nun enfrie, anque eses potes de la güela aguanten el calor ensin problemes.
L'otru segundu pa compartir foi coneyu (semeya tres). Nun yera de caza pero taba perricu preparau con prunos pasos, cebollin, perrexil y un plizcu de vinu blanco. Un guisu tradicional bien finau y otra racion pa paisanos.
A estes altures ya finamos col coneyu por pura gula porque la fartura yera consideratible asina que, una vegada mas, de postre nun falo.
El vino qu'anduvo perlli paso ensin pena nin gloria, pero ye que fuera cualisquier cosa que pidas xube de los 20 €. La carta paecia tener varieda abondo, pero el que nun sabe (nesti casu de vinos foriatos) ye como'l que nun ve, pero mas tontu y eso foi lo que paso, pillamos un blancu de 22€ que, bebiase y puntu.
Anque me convidaron eche-y una güeyadina a la cuenta cola esplicacion esa de "ye que teo un blogue y si nun t'importa...", 38€/persona, tiendo'n cuenta calida, cantida y que 11€/cabeza llevoselos el vinin, una gran RCP sorprendente n'esa zona. Por ciertu, llamase Rue d'Or pero ta na Rue de Les Chapeliers, nun m'entrugueis el porque :-)