martes, 10 de septiembre de 2013

Paço dos Cunhas (Santar - Beira Alta - Portugal)

Pa nosotros finar o entamar les vacaciones en Viseu ye una tradición, un amestu ente munches coses nes que primen les per bones alcordances y sensaciones que nos produz la zona.

Esti añu finemos ellí y como los guah.es ya taben refalfiaos d'agua, normal dempués de unes cuantes selmanes a remoyu y a más de 30º tolos díes, decidimos dedicar un dia a facer otres coses como recuerrer en bici una parte de la ecopista que tienen y dir a ver unos paços y bodegues en Santar (a unos 15 Km de Viseu, que per otru lláu ye la capital de la zona de D.O Dao).

Les bodegues y viñedos pertenencen a Global Wines que tienen varies marques de vino conocides pela zona como Casa de Santar, Cabriz...Paremos primero en l'Adega de Casa de Santar, pero taba trancada y nun pudimos visitala, eso sí, pudimos sacar una semeya a los viñedos, ni en Falcon Crest.



Dempués fuimos a visitar el Paço dos Cunhas que taba al pie, a ver si había más suerte y nos alcontramos con un bar- restaurante perguapu dientro d'el. Como faltaba una hora pa que nos pudieren enseñar el Paço y yera la hora de xintar decidimos esperar ellí mesmo. Una pena que nun furrulara la terraza pa xintar, pero dientru, col calor que facía, casi que se taba meyor. Eso sí, un poco de miéu al posible clavu económicu (vistu el sitiu) teníemos pero bono, tábemos de vacaciones.




Miéu que quitóseme pronto na más ver la carta y tener que mirar tres o cuatro vegaes la del vino y plizcame el brazu otru par. IVA incluidu 5€ la "garrafa" de Cabriz 2012 branco Encruzado (que vien d'una viña portuguesa inxertada con otra yanqui y d'ehí'l nome). Dellos viaxes per Portugal dan pa saber que "garrafa" ye botella, pero eso nun quita pa que nun pudiera creelo, a pesar de ser el vino de la casa. Un Dao Branco con munchu cuerpu y que prestó asgaya.





Sitiu perguapu, bien puestu, piedra, comedor piquiñín y afayaízu separáu del bar y con veceros un poco-munchu meyor vestíos que los turistes que se presentaron ellí de casualidá con dos guah.es pequeños en pantolones curtios. Nun se porqué, pero nin tando en Portugal llegaba yo a creéme los precios.

Detalles de la casa una copa de espumante brut Pedro & Ines (bodegues Cabriz) que me resultó abondo superior a lo esperado (la verdá que nin sabía que yos-daba por facer "cava" en Portugal). Perbonu pa un incultu como yo d'esto, tanto que nos traximos una botellina pa casa.

Na mesa tamién teníemos sal, pan y un AOVE de Cabriz pa facer barquinos. Perbonu tamién.

Los mayores (y tanto ya, jeje) entamemos con un platu pa compartir de llangostinos. Un resultáu mui llográu a pesar, no de la pinta y del olor (¡que prestoso golifalo!), sinon del aparente amestu del platu; llangostinos con una salsina sele de mostaza, trozos de piña y una especia, qu'agora mesmu nun m'alcuerdo bien, pero creo que yera cominu, a riesgu d'equivocame. El resultáu final acertáu, un tipo llangostinos al curry, onde los llangostinos yeren de gran calidá.



Pa los neños, que xinten de too, pero non muncha cantidá, pasemos de pedi-yos el típicu menú de guah.es y yos-pidimos una ración a compartir de risoto de pexe gallu con verdurines. L'atención profesional del chigre llevó a alvertinos de que'l risoto llevaba "coentros" y que a ellos de xuru que nun yos-diben gustar, que si los quitaben o non. Alcordeme d'unes ensalades preparaes que llevaben los dichosos coentros (que hasta que nun te fixes nun sabes que ye'l perrexil xabaz- cilantro en castellán) y que pola so culpa casi nun pudimos xintar na casa de vaciones, asina que fuera con ellos. Na semeya la ración ya dividia y emplatada. Un risoto mui rico, nel so puntu, con trocinos de verdura y gallu asgaya ente el.

 

Mentantu ellos daben  cuenta del arroz con cara de satisfación (anque al final siempre hai qu'ayudalos pa que lu terminen, porque nun se parecen al pá y comen menos cantidá qu'un canariu coxu), los mayores poníemos a esfrutar col gochu xabaz guisao y esgüesao sobre puré de pataques. Rico, tienrín, bien preparáu, ideal pa finar de xintar.


 

Total de la cuenta, a la qu'añadir un café con xelu, 55,10 € n'un sitiu onde nun esperaríemos baxar de los 80 € en España, por atención, calidá de la comida y llocal.  Dempués visitemos el Paço (visita curtia d'una media horina) que por ciertu, ye gratis.

Si táis pela zona un sitiu prestosu pa xintar y mercar unes botellines de vinos Dao.


5 comentarios:

Toni dijo...

Bona pinta, aunque será difícil que me coincida.
Viseu lo tenía tachao por el asuntu esti de les autovíes con peaxe pero lo destacho ya que ayer pasé por la frontera de Ayamonte y hay un sistema aceptable. Paras, metes la tarxeta de crédito en una máquina, asóciatela a la matrícula y puedes pasar por les autovíes de peaxe electrónicu durante un mes.

Fartones dijo...

Hola Toni,
lleven asina 1 añu y picu. Ye percomodu y nun sal mui caru. Solo hai que parar nel primer puntu de la autopista que ponga "extranxeiros" y llisto.
Amas, otra razon pa volver ye que te pesllaron el O Cortiço...la crisis :-)

Fartones dijo...

Por ciertu, 55,10€ y teniendo'n cuenta que'l IVA de la hosteleria equí ye del 23%...y aún asina tienen unos precios que ya quixeramos nosotros y suelen tratate como un rei...bono, meyor, como al presidente de la república, en tolos llaos :-)

David Castañón dijo...

Tien perbona pinta.
A mí Portugal préstame pola vida, magar los peaxes.
Esti añu tiré pa la zona Aljezur y torné encantáu, de xuru que vuelvo (y pensaré en Viseu)

Fartones dijo...

Hola David, nosotros solemos dir ente Silves y Portimao, anque facemos delles escursiones pela zona, Aljezur dexemoslo pa'l añu que vien, esti toco Sagres y'l Cabu San Vicente.
Viseu con un-dos díes da pa visitar, y ente'l 9-10 d'agostu hasta'l 22 de setiembre tienen la feria de San Mateo y alrodiu de la ciudá ta la zona de viñedos. A nos prestanos pasar unos dies de la que vamos o volvemos, pero ye cosa nuestra el tar más de dos díes, jeje.