La Casona de Rioseco - La Casona Rusecu (Rusecu-Sobrescobiu)

La peña quinielo-lloterística que tenemos millonarios nun nos fadrá, pero pa dir xintar llega, polo menos una vegada'l añu. El chigre escoyíu foi la Casona Rusecu, un chigre perafayaizu na capital de Sobrescobiu.

La eleición del chigre ye un procesu detalláu, milimétricu, planificáu, causa d'engarradielles y...¿tais creyendovoslo?, epero que non, porque ye mentira. Primero dalguien diz, "¡quiero xintar corderu a la estaca!" y dempués salen los chigres y escoyemos un, rápidamente. L'añu pasáu foi'l gochín al fornu y finemos nel Asador de la Miranda y esti añu finemos equí.

Nesti tipu de concentraciones gastronómiques viense a lo que se vien, que ye al antoxu, güei corderil. Que seya bonu, que te bien preparao y qu'haiga asgaya (nun vaya quedar xente con fame), el restu de los componentes de la llacuada son importantes, pero queden n'un segundu planu.

Xintemos na terraza zarrada, un plizcu más fresquino que nel interior pero a mi prestame más ver el pueblu de la que xinto. Mantelos de verdá, cubiertos, bonos detalles, anque la mesa en sí yera dalgo estrechina. 

Primeru ensin complicaciones, tables d'embutios pela mesa con resultaos variaos. Perbono'l chorizu (desfacíase na boca), bien, el quesu y la cecina y regularín el xamón, anque dependía del platu. Vamos, qu'habia polo menos dos xamones diferentes pela mesa.

Pasemos al segundu, que foi'l corederín y equí nun hubo peros. De la estaca a la mesa fueron llegando les raciones abondo grandes d'un corderu perbonu, cruxente per fuera y  xugosín per dientro (ye lo que tien dexar trabayar a la maera con tiempu y ensin prieses). ¡Y venga llegar raciones en su puntín de calor, y venga toos a da-y!.

En fin, una fartura que dexó un tuper pa llevar a la persona que faltó, munchos cafés con goterines y dalgo más que eso y dellos postres pa aquellos que, tando fartos ye imposible que nun finen con dalguna llambioná.

Con nosotros sentose un tal Balbás que nun avieyaba sinon que diba pa xoven porque entamó siendo del 2007 y finó nel 2009 que nos prestaba más.

La fartura a corderu, a lo qu'hai que sumar qu'hubo tres persones de 11 que camudaron el corderu por otra cosa, salionos a unos bonos 34,5€ persona.

Prestosa xuntanza en un sitiu guapu. L'añu que vien, otru!.