Les oportunidades hai que les aprovechar y si la oportunidá ye viaxar a Bélxica nun vuelu baratu pa esfrutar colos neños del ambiente centru-europeu de les Navidades (llámese vida na cai, mercaos de Navidá, lluces y espectáculos) pues a ellos nos punximos.
El Mercáu de Navidá de Bruseles ganó nel añu 2013 el premiu al meyor de los mercaos d'iviernu d'Europa y la verdá ye que ye perprestosu. Van dende la Grand Place na que cada hora, más o menos proyeuten sobre les fachades un espectáculo de lluces y música, hasta la zona de la Ilesia de Santa Caterina onde tienen el gruesu de los puestos de mercáu, la Noria y los tiovivos. Ente medies una pista de patinaxe sobre xelu y na bolsa una exhibición de animatronics pa los más neños.
En fin, munches coses que facer y muncha vida na cai que nos llevó a comer nel mercáu, nos puestos (podeis quedar de gofres de mil clases, frixuelos, salchiches y vino caldiu bien fartucos) y tamién en dellos sitios que vos resumo. Tenei en cuenta que Bruseles nun ye como Alemaña, ye abondo caro. Eso de ser la capital d'Europa tien de marcar estes coses.
Quitando la conocía Roue d'Or, na que esta vegada nun paremos, tamién quedé coles ganes (pero nun había sitiu dientro y fuera taba frío ya de coyones pa parese munchu) de aparar n'una pescatería-chigre na plaza de Santa Caterina que tenía una pinta bárbara.
Los sitios nos que paremos taben alrodiu del mercáu y del apartamentu y ¡ah!, hasta agora nunca cayera n'ello, pero equí hai sitios non que nun almiten guah.es, asina qu'esa ye otra, igual nun vos dexen entrar en tolos que vos apeteciere.
Entamo cola cena del primer día.
Santino (zona de la Grand Place)
Chigre italianu, piquiñín, con bona cocina casero. La pizza pa compartir de los peques de xamón, quesu y delles verdures taba pa rellambese, masa fina y xugosa. Dio pa dos perfeutamente, ya que, como comprobemos a lo llargo de los cuatro díes, les raciones suelen ser abundantes.
Per un llau de la mesa, carpacciu de xata con quesu. Bona ración, bien tratáu, dixeronme que taba perbonu, a mí'l quesu prestome, yera fuertón y acompañaba bien.
Para mí, una pedazo ración de espaguetis a la putanesca, que picaben lo que teníen que picar, al dente. Pa mi perfeutos de too, salsa, picor y dente.
Skievelant Brasserie (Zona Sablon)
Un de los que más nos prestó pol ambiente que teníe, con una comida mui decente. Foi la cena de la cabera nuechi en Bruseles.
Palos neños una hamburguesa en platu con pataquines (pataques con too), mediu-fecha y de bona carne. Yo nun sé pa que acompañen tolos platos con eses pataques frites, que tan normalines porque nun son de verdá en dengún llau, pero ye lo qu'hai. L'hambuguesa taba bona y dio bona cuenta d'ella.
Crocretes de quesu y xamón. Les crocretes en Bruseles son de tamañu xigante en tolos llaos, o seya que los platos suelen trayer dos o tres d'elles. Siempre con pataques y ensalada de compaña. A mi prestaronme, pero a la crocretera mayor nada de nada porque el quesu yera perfuerte para ella. La probe comioles a regañadientes, eso sí con ayuda y a cambiu de unos mexillones :-).
Palos mayores una potada de mexillones al vinu blancu (lleven tamién apiu, cebolla y perrexil na salsa) que taben perbonos, quiciabes los que más me prestaron. Los mexillones son holandeses, más pequeños que los nuesos, pero con un tastu impresionante. Dende'l mio puntu de vista, nada qu'envidiar.
1 llitru de vinu de la casa blancu normalucu y un agua grande para un total de 65€
Café Grimbergen (Zona Ilesia de Santa Caterina)
Sitiu prestosu, y bien decoráu ta enfrente de la trasera de la Ilesia y pegadín al "núcleu duru" del mercáu y tenién una comida abondo prestosa. Los sos mexillones prestáronme munchu.
Esti cayó pa xintar un de los díes. Doña crocreta pidió unes enormes crocretes de quesu que taben bien bones. Curioso que llevaren ensalada y nun pataques.
El mariscador y carniceru pidió crocretes tamién, pero esta vegada con quesu y gambes (lo de la besamel per estos llares, como que non). Tamién mui prestoses.
Los pas, como siempre, una potada de mexillones (la tapa de la pota dexentela na mesa pa tirar les cáscares y si la enllenes traente otra). Tamién al vinu blancu, poques variantes cola del Skievelant, cebolla más grande, apiu y más perrexil pa la salsa. Perprestosos.
1 agua pequeña, 1 zumu de mazana, 1 cerveza Rochefort Brune y 2 copes de vinu blancu pa salir a 67 € de xintá
Cheese Cake (Zona Bolsa)
Na típica hora tonta, que nin xintar, nin merendar y na que los pas decidimos ya tirar hasta al nuechi, a estos entro-yos una fame que Dios tirita, asina que ellos comieron y nosotros bebimos :-). Un bon sitiu con una decoración y distribución curiosa que pa esto del "stop n go" va bien.
Doña crocreta-gofre-churros-frixuelos, se llevó al butiellu un con azúcar morenu que nun sé yo como lu finó entovía. Más gordos que los nueson, un plizcu canela y ¡hala! tou pa dientro.
Una de pitu, pero non de caleya, claro ta, fritu y rebozáu con pataques. Tipu los de KFC pero más rico y menos picantes, acompañau de salsa de repollu y mazana asao (mira que son raros)
Café Leffe (Zona Sablon)
Pa desayunar tolos díes, prestonos el primeru, los desayunos yeren abundantes, taba pegáu al aprtamentu, en fin, ¿pa qué dir a la gueta d'otru?. Por 25,4 € Tortiella francesa con ensalada, 2 croasanes o napolitanes, cafés, colacaos, zumos de naranxa y tostaes con nutella. Abundante y bien pa entamar el día
Si vais per Bruseles, facei lo que vos dé la gana :-)
2 comentarios:
Bruseles namás poles cerveces ya paga la pena!
Hailes perbones, pero a nun ser que vayas a sitios especiales, poques marques diferentes a les que alcuentres perquí, la Rochefor garrela por eso :-)
Publicar un comentario