La Maquina (Llugones-Siero)

Milenta años ensin venir por esti miticu chigre de Llugones y tuve que dir n'un dia nel que los paxaros cayien de los arboles pol calor, en fin, cuando toca, toca, pero claro, con esti calor y la fabada teo una fartura que nun se cuando alicare :-). Bono, a lo que vamos, el chigre tornose mas a restaurante dando-y un toque mas afayaizu. Lo que ta claro ye que ye sota-caballu-rei, vamos, qu'equi un vien a lo que vien, que ye a xintar fabada y arroz con llechi, asina, que a eso vamos. Raciones de paisanu, lo que veis na semeya ye la fabada pa 5. Bien presentada (pa ser fabada), col companguin a la vera. La verda, ya que tando bona y aconseyable, yo cola fabada toi mal avezau cola de mio güela, pero si comparo con otros chigres hai un par d'ellos que nun desmerecen la fabada d'equi (y supongo que mas baratos, nun se, que nun vi la cuenta), el Fondin y la Rula de Santolaya. L'arroz con llechi taba perbono (yo al nun ser llambion prestame que nun te mui dulce) pero taba demasio compactu, prefierolo un poco mas sueltu. En cualisquier casu, si vais, vais quedar bien, anque de la relacion calida / preciu nun pueo falar. Sorprende, eso si, un sitiu nel que hai fabada y...fabada, ye la pedazo de carta de vinos que tienen, con entrades que sorprenden (pa un sitiu asina). Nosotros de compaña un Balbas crianza. Hala fartucones, ya teneis otru que poner na llista!!

Casa Marcial (La Salgar-Parres)

Como non, habia que prebar otra de les estrelles Michelin qu'hai n'Asturies. Casa Marcial ta n'una casina vieya del pueblin de La Salgar, pa mi que ye'l que mas lloñe y fuera mano queda de toos, pero la verda ye que les vistes dende esti pueblu a la falda'l Fitu y les dos caleyes que lleguen al restaurante, merecen la pena. El sitiu ye perafayaizu, nosotros xintamos nel comedor de baxu que dexa ver la piedra de la casa n'una de les paredes y el restu ta pintao en blanco, col techu en maera vigues en marron y'l restu'n blanco. Musiquina de fondu, sele, que siempre presta, date bona pinta. El personal mui eficiente y como suel prestar, eficaz y sin agobiate de tar encima tuyo tou'l rato. Decidimonos por pedir un par de menus d'entraes y dempues un segundu ca un. Les entraes entamaron con un aperitivu de xelatina con tomate y amasuela que taba perrico. Dempues un pulpu con microvexetales que foi lo mas floxo de la comida, poco y ensin munchu amestu ente los componentes, les verdures taben adrede poco cocies y predominaben munchu nel tastiu del platu, a esti vamos da-y un compensable de los de la Uni. Sigue con unes crocretes impresionantes, fines con una bechamel esquisita, vamos pa lantre, y vienen los dos platos que mas nos prestaron de los entrantes, la sardina sobre tortu y güevu (semeya), cola cebollina bien sofritina, nel so puntu y'l sabor de la sardina mui bien compensau col tortu y'l güevu. Por pone-y un pero, el güevu tenia que tar pa moyar, pero la yema taba mas bien pasadina.El caberu platu de los entrantes, tocin sobre vinagreta y unes fabines. Tremendo, el tocin cruxente por fuera y tiernin por dientro, coles fabes con tastiu a fabada y col amestu de la vinagreta en salsa, realmente bono (semeya). De segundu yo, ya fartu, tireme polos papos de xata con pure de garbanzos y zanahories. Perbonos, francamente ricos, seles y col so puntu de cocina que yos-dio un tastiu esquisitu. Pa mi sobraben-yos un poco de salsa, mui asemeyada a la de barbacoa de los sitios yanquis, porque terminabes un poco empalagau al final. Pela otra vera salmonin del Seya (pa mi que tamien remonto'l Piloña, pero esto nun nos lo confirmaron). El salmon taba perrico anque n'estos sitios sigo pensando (de momentu naide me saca de la idega) que preparen meyor la carne que'l pescao, que siempre lu dexen un poco crudu. Pero'l salmon taba rico, con unes poques trufes blanques encima (anque nun taben mui alla, mas que a trufa sabien a rabanu), unos boletus y unos arbeyos de guarnicion que sabien a güertina. De compaña un catalan conociu que nunca falla, Les Terrases 2005. De postre, na, a nun ser mi par de PX ;-). En resumen, esti ye un sitiu pa aquellos que nun tienen claro l'animase coles estrelles michelin, porque?, por que ye'l que mas cuida el tastiu tradicional de los platos de tola vida, a los que yos-da un toque mas innovador (A nos prestonos asgaya). Ensin embragu, pa otros, pierde esa parte de sorpresa que tamien busques nestos sitios. Vamos busca-y peros, que tamien lo cobren bien como pa nun buscalos, anque seyen "perinos". El pan, mui normal, eso si calentin pa que la mantega que te dan se desfaiga sobre el, pero deberien de facer como n'otros sitios, tipu la Tabla, nel que xueguen con varientes de pan que presta muncho. Les copes, yo camudarieles por otres, nun son les mas adecuades. Polo demas, de les estrelles michelin prebaes ocupa, pa mi, el tercer puestu, mui cerquina del Corral del Indianu. De momentu el Gallery sigui siendo la Estrella y Koldo l'estrellau. Les raciones abundantes, vamos quedes fartuqin, pero'l preciu ta un pelin pasau pa too esto, 90€/persona. En cualisquier casu, mui aconseyable, un sitiu pa repetir. Ah!! y tampoco tienen te desteinao (yo nun lo tomo, pero tenia que dicilo, sin non peguenme!!)

Ca Suso (Uvieu)

Gran descubrimientu el d'esti restaurante nel centru d'Uvieu (pegau al Fartuqin). El sitiu tien bona pinta por fuera, pero cuando pases dientro entovia tien meyor pinta. Puestu con un amestau de piedres y lladrillos y col restu les paredes pintaes de colores afayaizos, ye d'esos sitios nos que te presta tar (tamien la musiquina de fondu ayuda). El personal ye profesional y tan pendientes de ti ensin agobiate. Dempues de sentate y vete agustu llega la hora de la comanda, claro. Na carta echense de menos delles entrades de blanco, y del tinto, anque nun tengan muncho tienen bones elecciones. La nuesa Emilio Moro crianza 2005. Pa entamar, l'aperitivu de la casa un cruxente de quesu de pria sobre una cremina de zanahoria que taba perbono, asina que la confianza crez. Pa entamar aconseyaronnos que pidieramos güevu con choscu de Tineu, pataquina cocida y berza (una de les semeyes) asina que nos llanzamos con un par d'ellos. Impresionantes, eso si, ye contundente como entra. El güevu taba pa moyar como Dios manda y la berza nel so puntu daba como resultes un amestau realmente bono. Moyes el pan, vuelves moyalu y fines con ganes de mas. De segundos tiramos pola costera, vamos bonitu pa mi y ventrisca pal otru llau de la mesa. Les dos coses prepares sobre un pistu d'aceitunes prites que taba realmente rico. El bonitu taba mui rico y, claro, la ventrisca mas. Too con bona mano na cocina y raciones que nun dexen indiferentes. El preciu, na mal, alreor de los 38 €/persona, eso si, ensin postres, si nun contamos el mio PX, claro, nun voi marchar yo ensin una copichuelina d'estes :-). En resumen, sitiu perafayaizu con bona atencion na que podeis quedar bien con quien lleveis. Avisu pa los que tienen guah.es, fumase, pero la verda ye que como nun habia muncha xente güei, nun notamos na. Venga, una entrada mas y fino, que güei toi semau.

El Meson de Sariegu (Moral-Sariegu)

Dempues d'un tiempu ensin escribir na, vamos entamar col Meson de Sariegu, mas que na, porque como xintamos perbien l'otru dia pues home, nun vamos dexalu ensin entra nel blogue!. El Meson, que ta na carretera vieya de La Seca-Villaviciosa (si home si, la que los d'Uvieu facien tola vida pa dir a Rodiles pela Campa), ye una parrilla na que los paisanos de la zona van tomar el vinu y picar sobre too nos dies de misa (ta enfrente la ilesia). Tanto la parte de bar como la de comedor nun tienen na destacable, les meses de tola vida, los mantelos de tola vida, en fin, un chigre como tantos otros. Eso si, curiosamente pa ser de pueblu, nel comedor nun se fuma y nel exterior tienen prau y culumpios y cosiquines pa que los neños mas grandinos ten entretenios. Pa xintar, que ye lo que mas interesa, son peraconseyables les parrilles mistes, eso quier dicir que amas de les costielles de gochu alcontrais pitu, sollombu de xata y choricinnos criollos. La verda, ye que too tenia'l puntu perfeutu l'otru dia, mui xugoso tola carne. Palos llambiones falla que nun tien postres caseros, pero a los que nun lo somos, ye lo de menos. La sidre Foncueva o Riestra (falta Pachu pa completar la triada saregana). Otra cosa pa dicir, ye'l preciu, 3 parrilles mistes con les sos raciones de pataques correspondientes, 3 ensalades mistes, dellos postres, chupitos, cafese y sidre asgaya (yeremos 12 en total y con eso comimos de sobra), 17 €/persona...yo crei que d'esti tipu ya nun quedaben. Ya sabeis si tais pela zona y vos entra la fame, podeis parar con garanties equi.

La Mundina (Llugo Llanera-Llanera)

Si tais per Llugo Llanera, cosa que a mi pasame de vegada en vegada, un sitiu mas, ya vos comente lo del Regueral, ye esi chigre-parrilla. Tien otra ventaxa, suel sacar meses fuera, y anque la zona nun ye pa tirar cohetes, cuando'l dia ta guapo polo menos xintes al frescu. El llocal tien dos partes clares, la de chigre ayaizu abondo porque ta puestu'n piedra y maera y'l restaurante-parrilla que ya ta mas serio. Un detalle, ye qu'anque seya una sidreria y xintes fuera, ponente un mantel de verda, lo cual siempre presta, ho!. Tienen una cocina perdecente y les raciones son de paisanos. De la ensalada mista (semeya) destaca'l bonitu (de bona calida), el restu nun tien na destacable, pero ta rico y... esto ye un chigre nun espereis muncha imaxinacion nos platos (o denguna). Recomendar los chopitos y de parrilla les tipiques costielles. Serviciu prestosu y precios populares (que bien falo cuando me pongo) andareis alrodiu de 15-20€ persona, lo cual ta perbien.

Tierra Astur (Uvieu)

Bono, vamos siguir con un de les tipiques sidreries d'Uvieu que hai tiempu qu'abrio un chigre pergrande en Cuayoto. Del de Cuayoto solo podria falar de la sidre porque nun xinte nunca elli, asina que voi falavos de los dos d'Uvieu. El de Gascona ye'l primer qu'abrieron y ye'l mas petau de toos y'l de la plaza'l Fontan ye una de les tiendines de Crivencar que tien meses pa'l esterior y que presta un monton con bon tiempu. Cuidadin, el del Fontan nun tien cocina propia, colo que podeis disfrutar de los bonos productos que tienen (embutios, quesos, ensalaes-la semeya-, pates, conserves...etc..) pero si pedis coses como "papos de gochu" son calentaos de micro (que vienen d'otru sitiu) y pa ser asina nun tan mal, pero bono, que lo sepais y la fabada ye de bote. Nel de Gascona podreis xintar ya de cocina, si vais unos cuantos suel tirase pol platu estrella, los llargueraos de tamañu considerable que lleven de too (embutios, pates, tortos con picadiellu, quesos...) en fin, de too y que nun hai quie fine. La comida nun ta mal y los precios, depende de lo que pidais (hai coses que tan bien de preciu, como los llargueros, y otres que s'escapen de preciu pa lo que son). Los guisos siguin ensin ser lo suyo, pero claro, nun prebe'l de Cuayoto cuando tienen oveya xalda y como repiten tolos años debe tar rico, pero los clasicos de los chigres tan toos ricos (calamares, chipirones, tortos con picadiellu y cabrales...)anque los precios nun son de los mas baratos. Ye un chigre con ruidu, pero ta perbien puestu, cola piedrina, les meses de maera, el llar que tienen al fondu... que-y dan un aire mas afayaizu. Bono, de lo meyor de la zona Gascona xunto cola Pumara, pero d'estilos diferentes anque seyen sidreries les dos.

El Chabolu (Deva-Xixon)

Pues güei, que toi que me salgo, sigo con esti, nun ta mal pa entamar xunetu, a ver si sigo asina tou'l mes. Na, ya se que lu conoceis toos, pero como los merenderos de Xixon tan camudando a chigres pues prestabame ponelu. Ya sabeis, cerquina de Casa Yoly ye'l tipicu merenderu de tola vida nel que hai unos pocos añinos, pue ser que 3 ya?, ampliaron pa tras y entamo a ser un chigre. A mi prestame mas xintar onde tola vida, tien mas personalida, pero nun dexa de tar bien lo que punxieron, polo menos mantien l'aire rural. Siendo sinceru, a mi prestame dir mas a Casa Yoly, pero hai vegaes que ye imposible asina que tiro pal Chabolu o, menos a xintar que a tomar una botellina xubo pa Ca Mario. Nesti, lo de siempre, nun dexeis de prebar les tortielles de pataquines, los choricinos a la sidre, los calamares y los chipirones. Vamos, que nun-y pidais peres al mazanu, pero lo que xinteis tara rico. Precios de merenderos, tirando a lo baxo. Venga, paez que toi mas animau esti mes.

Fujiyama (Paredes-Siero)

Hola!! como va too? dempues de un tiempu ensin escribir voi entamar xunetu con un exoticu. Nun ye que me preste a mi Parque Principau, voi cuando nun hai mas remediu, pero ya que tas equi, un de los sitios a recomendar pue ser esti. Claro, nun ye nin de lloñe, el de Fuente la Lloba, n'Asturies nun hai otru asina, pero nun ta na mal. Ye pereconomicu, quiciabes porque alrodiu hai un monton d'ellos, qu'anque d'otres coses, hai que competir. Bono, equi tire pol menu con Tepanyaki, nun ye'l mas economicu, pero ya que tien tepanyaki d'eso, habia de prebalo. El menu de Tepanyaki anda polos 10 € persona y nun que la comida seya perabundante, pero ta abondo rico y calida / preciu hai de reconocer que ye un sitiu peraxustau. Son un monton de platos de preba, ensala (d'ese con mucha soja), arroz tres delicies (esto nun yera lo meyor), un platu shushi con gambes perriba (abondo rico) y asina un par de coses mas hasta llegar al tepanyaki, xata con gambes (rico) pero poco. Tienen una cartina de vinos blancos abondo decente. Vamos, si tais por PP ye un de los sitios a prebar (pena de Ribs...) y anque les raciones nun son gran cosa, viendo'l preciu ye normal y la calida ye bona.