lunes, 10 de noviembre de 2014

La Marina (Veiga - Navia)


Como tolos años por estes feches la peña de la lotería, que nun nos val pa facenos millonarios, pero pa xintar col bote que va quedando sí, organizó una escapadina gastronómica hasta Veiga pa esfrutar del pueblín perguapu que ye, de la costa y de la comida, claro ta.

El centru de comides foi La Marina,  un chigre perconocío situáu nel puertu de Veiga. Una sidrería que destaca pol cuidáu de los productos y por ser un sitiu nel que te fartes a pexes de bona calidá.

Entamemos con una cantidá curiosa de platucos pa compartir y dempués. ca un a lo suyo, como ye menestar. Pondré semeyes y opiniones de los xintadores, pero yo dediqueme a lo mio y a prebar el arroz con bugre :-).

D'entamos, como vos cuento había crocretes caseres de xamón y quesu, unes crocretines tamañu prehistóricu, con una besamel sele y riques de tastu. Bien



Tamién ciruló el pulpu en dos versiones, a la gallega y a la brasa. Como sabéis yo col pulpu nun soi mui neutral creo que si me ponen a preba sedría capaz de xintalu crudu, pero, na que ver un con otru, el pulpu a la gallega taba perfeutu de puntu y tastu, mentantu el pulpu a la brasa nun pasaba del aprobadín raspáu, un tantu chiclosu y ensin tanta gracias como l'otru y visto les esperiencies con esta forma de preparalu toi viendo que deber ser más dificil da-y col toque al braseau.





Ensalada de cecina y quesu de cabra, combinación que non por perconocía déxame de prestar a mi, mui rica y dellos entamos más de los que o nun prebé o nun quedó rexistru gráficu (ye dificil tar a too n'una xintá d'estes!!)

Pasado a los segundos, hubo de too, yo tireme por unos saramolletes espectaculares, a pesar de la semeya na que parecen quemaos, taben pa mi gustu impecables, una capina cruxente de pelleyu y nel so puntu per dientro. Una bona ración que merecía la pena prebar.

Tamién prebé, la confianza eh!!, el bugre a la plancha. Lo cenciello, con bon productu, nun tien comentarios, ye lo que ye. Tamañu mediu, sal y plancha. Pa mi perbono.

Ya colo mio finao, y'l bugre prebáu, estos queríen matame d'una fartura, sobraba arroz con bugre y pa allá que me calló una ración. Melosín, xugosín, l'arroz nel so puntu y hala, una barrigada que tardé dos o tres díes de running d'eso en volver al mio pesu.

Voi dexavos con delles semeyes de coses que nun prebé pero que la xente xintó y que quedó peragustu con elles. Equí entamo colos "creos"; Creo que merluza con salsa d'oricios y creo que xáragu al llombu :-).

De lo que sí toi seguru, porque llamonos munchu a toos l'atención na carta, ye del bonitu con salsa cabrales. Curiosu amestu, que yo ya nun tuve arrestos a prebar (nin butiellu), d'un pedazu de corte de bonitu perfinu, supongo que pa que quedare más xugosu, pero pergrande con pataques. L'arriesgáu que lu pidió quedó contentu, yo nun sé lo que vos diría, tendría que m'atrever a facelo en casa primeru a ver que ye lo que pasa.


De vino anduvieron perllí un Albariño collecheru de cuyo nome nun m'alcuerdo pero que valía pa pasar la comida (nun taba mal, un plizcu afrutáu que facíase cansín a llargu plazu) y un Rueda estándar.

Cafés, dellos postres, dellos chupitos y una cuenta que rondaba los 32€ cabeza, que ta perbien pa la cantidá y calidá de lo xintao. Un chigre de siempre, bien puestu, que nun destaca en presentaciones pero onde'l productu ta presente y onde con fame nun te dexen.


4 comentarios:

pululante dijo...

Suena muy bien.

En Puerto de Vega comimos un par de veces en la Cofradía del Puerto ya que La Marina estaba llena. También muy bueno y bastante bien de precio.

N'ast dijo...

Y nun tengo cronica d'ello?? Faigo bien en pagavos poco!! ;-)

David López Castañón dijo...

Pintaza! Apuntao

Fartones dijo...

Rico, rico, has de prebalu, eso sí, nun tien tiques :-(