martes, 5 de abril de 2016

El Molín de la Pedrera (Cangues d'Onís)

Paseu perguapu colos neños per Cangues a la vera de los dos ríos, kilos de piedres tiraos al Seya, vermutín pela zona a la vera d'unos culumpios, en fin, un domingu familiar y prestosu que tuvo una parada pa xintar n'un chigre al que facía munchos años que nun díbemos (El Molín de la Pedrera), pero que sigue conservando'l toque y la calidá.

Nun ye un sitiu baratu, pero xíntase bien, ye afayaízu y tien una bona atención y tres del "desastre gastru-económicu" de la cena del miércoles pasáu en Ribeseya, sentó como Dios.

Cocina cenciella lo que pidimos, pero de calidá de productu y calidá de cocina. Ensin pih.aes enmarutando la comida. A lo que vamos, nun pudimos ser más normales pidiendo.

Dos platos de pataques fites de verdá con dos mini-escalopines de calidá y tres croquetines bien bones pa los neños que yos- apeteció (y a mí que me xinté un de los escalopinos del que menos come h.e, h.e)

Per un llau, tacos de sollombu cola salsa de cabrales aparte. Bona calidá, bon puntu de tienru y tastu, pataquines frites y la salsa persele qu'a mí prestame más pa moyar les pataques que pa antroxar la carne :-)


Pel mio lláu preferí tirame a unes manes de ministru esgüesaes con xamón per dientro y setes. A mí prestaronme munchu, eso sí la reducción que llevaben igual dexábales un poco más dulce de lo qu'a mí me gusten, pero esi ye un tema mui personal. El casu ye que taben bien bones. Veníen con unes pataques frites de verdá, pero como de bolsa, que claro, pasaron a los platos de los guah.es namás les vieron y amás diben un poco moyadines na salsa y dexaronme dos pa prebar :-)


Col vinu, pásame como col arroz, nu tengo munchu quorum para los tintos. Asina que nun habiendo La Descarga bebimos un Fillaboa 2014 (la carta de vinos blancos ye pasable eso sí), agua grande, cafés con xelu y una fanta naranxa (o kas con burbuxes que ye lo que pide). Los adultos podéis salis por unos 30 € por cabeza y los neños por unos 9-10 €
Prestosu domingu.


2 comentarios:

David López Castañón dijo...

Onde fuisti a Ribeseya?
Haz milenta años que nun paro nel Molín, pero polo que veo, sigue igual.

Fartones dijo...

Pues queríemos prebar dalgo diferente y amás, suponíase que con tiques, tantu anunciu de radio cala. El María Manuela Bistro. Foi tan mal, pero tan mal too y nun quixeron saber na de tiques que mandé un correu a la central de Benia, educáu pero direutu....Toi esperando, y puedo esperar sentáu, dempués llegará'l típicu chigreru que se quexa de les crítiques en Trip Advisor, pues n'esti casu, si nun ties nin la decencia de contestar , bien que la mereces, pero paso.