sábado, 10 de mayo de 2014

La Cueva (Ouviñana - Cuideiru)

 La verdá ye qu'estos caberos meses son un ensin parar de momentos familiares y cada vegada doime más cuenta d'onde me vien a mi esto de gustame les coses del comer, porque malos sitios nun s'escoyen, ¿oyisti?.

La cueva ye un chigrín piquiñucu nel que preparen perbien les coses del mar y del que sintiera falar en dellos blogs. Ye'l típicu sitiu, de los que cada día hai menos, de "podrá salir más soso o non, pero'l productu lo primero". Cocina cenciella y ensin engaños. Tradicional con bon productu. Ye lo qu'hai.

La ocasión pintaba para xintar l'arroz con bugre del chigre (que nun ye caldosu), asina que mentantu esperábemos fuimos dando cuenta de varios platinos pa compartir.

Pastel de tiñosu caseru al que y-podemos dar el bono, ricu de tastu pal mio gustu sobraba-y un plizcu d'ayu a la preparación. En cualisquier casu cumplía perfeutamente y a los demás tamién yos-gustó.


Más raciones pela mesa, unos calamares frescos a la romana, que ye un platu qu'a mí préstame a esgaya, nun m'entruguéis, ya sé que ye fácil de facer, pero esos calamares frescos con esi dulzor y nel puntu xustu de fritura matenme de gustu. Perbonos.


Otru más (qué familia de fartones que nun podéimos esperar al arroz ¡coño! ; y venga pedir entamos!!), agora fritos de pixín. Pues eso, otra vegada un productu frescu bien rematáu. Pa mi yos-faltaba sal, pero taben ricos y eso ye fácil d'arreglar (lo del sal, digo) :-)

Enantes de arroz entovía quedaben les amasueles plancha. Bua!! que pedazu d'amasueles fresques, platazu. La verdá que yeren pa xintales a lo ostra, con llimón y ensin "planchar" pero prestaron igual. Tastu a mar perbonu y otra semeya más que nun me dio tiempu a sacar ensin que d'alguien metiera la mano al platu primero, ¡si ye que hai qu'andar vivu  n'estes xintaes!

Y por fin, el platu contundente y estrella del día, l'arroz con bugre. Prefeutu de puntu y tastu, nun ye caldosu pa dellos que los prefiráis asina, pero ta perxugosu. Munchu arroz, munchu bugre enllenu y con güeves. Arroz nel so puntu, xugosu, sabrosu, que queréis que vos diga, taba coyonudu, tamién sedrá porque yo nunca alcuentru compañía pal arroz y facía la de Dios que nun me metía un pal butiellu.




Nun quedó na de na pela mesa y a mi tuvieron qu'aguantame y esperame polos postres, los que lu tomaben, porque dempués d'arroz tuve poniéndome a bugre hasta que nun quedaron nin restos na paellera; ye qu'a mí los bichos pierdenme :-)....

Terras Gauda pela mesa, cafés con xelu, dellos oruxos y la meyor de la compañía, en fin, que xintemos perbien y nun m'entruguéis pela cuenta, que nun tengo la más mínima idea :-)






9 comentarios:

Toni dijo...

Chigre con buena pinta.

Fartones dijo...

Merez una paradina en la visita de la zona

David López Castañón dijo...

Uno de mios sitios favoritos de la zona. Amás, conozlos bien la familia de la zona y dan fe qu'el productu ye de perbona calidá pescao por ellos mesmos.

Fartones dijo...

Ye un sitiu prestosu pa xintar bien, David. Sí señor.

Anónimo dijo...

A mi el que me gusta y mucho es el bar el café,un sitio de parada obligada.Si a esto le sumamos una parádita en el bar tienda de celsita en lamuño,hacemos una mañana perfecta.aloque

Fartones dijo...

Pues nel café paré delles vegaes a tomar dalgo, pero nunca a xintar. Si ta bien ye cuestión de prebalu.

Anónimo dijo...

Oviñana=Ouviñana n'ast

Fartones dijo...

gracies!!! como nun ta nel enllaz oficial... :-)

pululante dijo...

Otra crónica en El Confidencial