La Corte de Llugas (Llugas-Villaviciosa)

Dies tristayones de lluvia que tienen el so encantu, a la fin tamos na seronda, non?. El casu ye que con estos dies nun apetez dir mui lloñe de casa y a la vera hai un hotelin de turismu rural (de los que pertenecen a Casones Asturianes) del que sintieremos falar perbien y como lo qu'apetez con esti tiempu son sitios caldios y afayaizos, pues alla que fuimos. Sitiu perguapu pa pasar un fin de selmana y nel que ya vimos que tenia terracina pa tomar una botellina de sidre, en viniendo'l bon tiempu. Nun mos defraudo, baxando les escaleres atopais una barra, a la manzorda el chigre pa'l cafe y a la mandrecha'l restaurante. Puestu'n maera, piedra y pintadin con un color caldiu tenemos un restaurante tipicamente rural. Cuadros bien escoyios y contando histories de los reis asturianos (un tantu inventaes :-) ). Tal y como pensabemos, con esti tiempu habia dos meses ocupaes, una de xente agospiada elli y la otra la nuesa, lo cual resulto perfeutu pa que la nena caminase per tolos llaos ensin molestar a naide :-), por ciertu, si teneis nenos piquiñucos llevai la trona portatil qu'elli nun tienen. Enantes de xintar tomamos un vinin, primer detalle, pido un tinto y entrugame si quiero un 200 Monxes reserva, y gratis, sobro d'una cena del vienres y la botella taba pagada, asina que si m'apetecia tomar esi, convidabenme, quien diz que non?. A lo nueso, chigre de cocina asturiano, cenciella, ensin complicase, nin la vida, nin la tiesta, eso si, con productu casero de la zona. D'entamu tortos variaos, un con picadiellu per riba, otru con xamon fritu (la morciel.la, qu ye lo normal, finose-yos), otru con crema de cabrales y un de güevu. Tortos seles, ricos, el güevu de color naranxa (vamos...del super, h.e, h.e) cola yema pa moyar n'ella, el picadiellu ensin na de grasa con munchu tastu a chorizu, el xamon nun lu prebe y'l de crema cabrales perbono. La crema yera persele polo que tienen d'amestala na casa, nun conozco denguna crema de mercar asina, aciertu d'entamu. De segundos, per un llau esparragos rellenos de llangostinos con crema holandesa y pal mio llau entrecot de xata con pataquines. Yo soi de sollombu, pero nun habia güei, en cualisquier casu nun foi mala eleccion, bona racion con pataquines de verda, mas fechu de lo qu'a mi me gusta, pero que nun quita pa que tuviera mui rico. Los esparragos dixeronme que bien, yo solo prebe'l gratinau de quesu cola salsa holandesa (lleva mayonesa y nun sabria dicir que mas) y taben ricos. Cafetinos y La Montesa d'Herencia Remondo Crianza 2005, vinin sele pero con munchu tastu a pipa, prestosu, bien prestosu. La carta de vinos taba un poco curtia porque faltaben munchos de los llistaos, pero tando esti nun fai falta dir a la gueta de munchos mas. 39 €/persona, bien de RCP. Bon sitiu pa venir y disfrutar en dies como esti de una bona califacion y una bona comida n'un sitiu tranquilu y afayaizu (con musiquina per baxo). Besinos pa toos.

L'Alacena de les Monxes (Granada - Andalucia)

Toi entamando a quedame ensin sitios n'Asturies, eso ye broma, qu'entovia hai munchos y perbonos que prebar, pero si que cada vegada complicaseme mas dir, asina que, tando solu, entamo a conocer un monton de sitios perprestosos, a los qu'añadir los que ya conozco y, que si repito, entamare a bloguear. Quiero dicir con esto que queda naugurada la seccion "Restu l'Estau". Na meyor qu'entamar por un de los restaurantes de Granada qu'abrio esti añu con una estratexa pernidia de bona calida (paez ser que'l primer cocineru consiguio dos estrelles Michelin tando nel Atrium de Caceres). Sitiu perguapu que foi alacena d'un conventu de monxes tien una parte de vinateria y'l restaurante n'un sotanu con arcos en lladrillu y nun aptu pa xente mui alta :-). D'entamu la casa punxieronnos una crema de calabacinos mui rica, anque nun tanto como la del otru dia na Tabla de Fano. Pola nuesa parte pa compartir tiramos de tartar d'atun colorao d'almadraba con xenxibre y soya que taba perbono (semeya 1). Trozos mas grandes de lo normal pa un tartar pola cenciella razon de "que se vea que ye atun del bono", la salsina sentiase como una mostaza de Dijoun pero persele. Esto taba bono y sedra la especilida de la casa, pero si vais nun dexeis de prebar el segundu platu de compartir que se pidio, "alcachofes fresques con fua", madre mio, qu'alcachofes (o kokotxes como diria algun amigu nuesu ensin querer...). El cocineru y metre expliconos como les facia, nun lo apunte, pero algo asina como envasales al vaciu y cocinales casi'n frio durante munchu tiempu. El casu, amas del tastu de les alcachofes col amestu del fua, la preparacion dexaba que les alcachofes fixeren "crunch crunch" na boca, d'escandalu, la verda. De segundu sigui col atun, magar de tar en Granada y nun en Cadiz n'esti sitiu tienen un atun que se funde'l misteriu y asina xinte dos cachos de llombu mui poco fechos que se desfacien na boca, perxugosinos. De compaña anduvo perlli un Ribera del Duero, nun m'alcuedo'l nome (nun lu escoyi yo y dempues d'enseñalu llego a la mesa decantau, asina que...) bona eleccion, en cualisquier casu. Un PX, un GT y un cacharrin de Pampero pasaron pela mesa, pero nun m'etrugueis pola cuenta, tampoco paso poles mios manes. Gran sitiu si quereis sorprender en Granada.

La Tabla (Fano-Xixon)

Ya se, ya se, nun suelo repetir sitiu, pero ye que les coses bones bien merecen repetise. Dende'l RIP del Noceu, el sitiu de referencia cerquina de casa ye esti, y cuando güei nos propunxeron dir a la Tabla, dempues d'un tiempu ensin pasar perlli, los güeyinos chispeabennos. Acutamos na parte de la galeria (la de non fumadores), magar de ser un sitiu estrechin, ye'l que mas me presta poles vistes al prau y polo afayaizu, amas que güei permitianos tener llindada a la nena ente toos. De l'atencion y los detalles nun voi falar, porque como siempre, estupendos. De la xinta (teneis que disculpar les semeyes pero nun tenia'l movil a mano asina que podeis veles nel otru post del sitiu que teo), que vos voi dicir, impresionante too, productu, mano na cocina, en fin, too. D'entamu la casa punxieronnos una crema de calabacin con almendres, mira que los calabacinos nun me dan mas, pero taba pa morrese. Pa compartir ente nos xamon, perbono anque nun lu faigan ellos, escueyenlu. Dempues salteau de setes de temporada con güevos de cogorniz (por ciertu traxeronnosles emplataes por separau) que fueron una sorpresa mas que prestosa. Les setes nel so puntu de sal y saltu, sabroses y col güevu pa moyar (y mira que siendo tan piquiñucos ye dificil eso, vamos, polo menos facelo'n casa jeje). De segundu yo tome presa d'ibericu como a mi me presta, poco fecha cola compaña d'una salsina d'arandanos que redondeba'l platu, carne xugoso y que se desfacia na boca. Pela mesa tamien circularon un carre de corderu llechal que nun prebe pero que tenia una pinta increible y a la que punxieron realmente bien. Una furagaña al fornu con verdures y berberechos, que si que prebe y que sabia a pexe y mar, perbona, y un par de rodaballos, un con salsa de llampares y otru a la plancha. Yo prebe'l de les llampares, curiosu amestu que potenciaba'l tastu a mar del bichu, tolos pescaos frescos non, perfrescos. Por ciertu, alcordabame que les raciones yeren curioses, pero güei sorprendiome'l tamañu, relamente grandes. De postres circulo un bizcocho de chocolate con chocolate derretiu per dientro, que hai de pidir al entamar la xinta. Perbono y cola fartura correspondiente compartiose ente 4. Cafes, un par de misteles prietos y un cacharrin de Pampero foi'l restu. Tola compaña nos la fizo un Sierra Cantabria collecha privada 2006, un vinin perbono, mas bien coyonudu. La relacion calida/preciu tamien me sorprendio, siempre ye bona, pero güei, nun se si sedra la crisis o la competencia, foi estupenda. Teniendo'n cuenta que mas de 1/3 de la cuenta foi'l vinu, 62€/persona tan perbien, con un vinin mas baratu andariemos alrodiu de los 50€/persona. En fin, un gran sitiu al que nos sigue prestando venir. Off-topic total, espero contar con dos collaboradores en breve de vegada en vegada, la mio hermana y'l mio collaciu Xuanxo, que va metese pal llombu un viaxe'l xapon y prometio unviame croniques de xintaes xaponeses. Besinos pa toos/toes.

El Barrigon de Bertin (Llastres-Colunga)

Pues si, El Barrigon. Sabeis eso de culo veo, culo quiero?, pues eso. A esti sitiu teniemos-y ganes dende l'aniversariu del añu pasau, onde decidimos ente Eutimio o esti, pero ya que'l Guah.e vino l'otru dia y, a la primera de cambiu, presentosenos la oportunida y equi que vinimos. Ya quixiera tener el problema que tien Llastres dende hai un tiempu, ye como'l entrenador de fubol que nun sabe si poner a Beckham o a Senna (ya se que nun xueguen nel mesmu equipu...entendeime!!), vamos, que si xuegues al ataque o defiendes un poco mas, pero col mesmu resultau (Barrigon-Eutimio). Al casu, güei que tabemos solos apetecianos pescau, La Casa'l Parque, Casa Nino y dempues de lo del Guah.e, el Barrigon. La eleicion foi estupenda. Sitiu modernin y afayau nel qu'hai una mesa que nun cumple los estandares (una de dos persones en meta de la sala), pero que si nun tas ehi, tas bien en cualisquier de los sitios que te pongan. Amables (un exemplu, decidimos parar 10 minutos antes de la hora d'acute, pa dicir que tomariemos perhi una botellina de sidre primero y nun tuvieron problemes en guardanos el sitiu unos minutinos mas) y con bon serviciu. D'entamu la casa mantega d'anchoes, mui rico, bona mantega con gran tastu a anchoes, punxeme como'l quicu porque tome lo mio y lo de Marta. D'entamu pa compartir ensala de foa con parmesanu. Esquisita (semeya 1), de lo meyor, l'aliñu con toques de frutos coloraos d'esos ensin escaecer lo del platanu fritu, o la cebollina frita'n tires o les pataquines a lo paya y, por supuestu, el foa en tires fines y'l parmesanu per riba la ensala. De segundu, pa mi pixin con llangostinos, im-presinonate (dos pallabres), pixin nel so puntu (y mira que'l pexe ye "gomosu") con una salsina y unes pataquines a la panadera que taben pa moyar y los llangostos perbonos (semeya 2). Pero la sorpresa fue'l rubiel al llombu de Marta, bufff, tremendu. Sal, aceite, un pelin d'ayu y pataquines a la panadera un bon cachu de llombu y a fartase, lo dicho, tremendo, notase la calida del productu. De compaña un Santiago Ruiz 2007 y de postre....de postre yo?....un McAllan 12 (bona carta güisquis, por ciertu) y nun conduzo a la vuelta, claro. 42€/ persona, perbien, la verda. Pues gran sitiu y gracies al Guah.e por danos l'impulsu de dir :-), ya digo qu'en Llastres hai onde escoyer.

El Palaciu les Ñeves (Llangreu)

Ya que taba pela zona del Nalon habia que pasar a xintar per esti hotel SPA de cuatro estrelles, que nun lleva munchu tiempu abiertu, a prebar el restaurante. El Palaciu les Ñeves ta n'un altu mirando pala Felguera y'l poligonu de Valnalon. Nun ye'l sitiu mas idilicu del mundiu, pero ta bien montau con un aire retro, que pue gustar mas o menos, pero que nun ta na mal, ye mas, a mi gustome. Les cortines corrides, pero que dexen pasar la lluz, y la musiquina sele per baxo dan-y un aire tranquilu a tola comida que permite tar relaxau. Serviciu profesional y atentu ensin agobiate, lo que ta perbien. Yendo a lo nueso, d'entamu de la casa punxieronnos una "cucharina" con un trocin de ventrisca de bonitu, un tomate cherry y too regao en salsa d'ostra (esta nun la note, pero too taba rico). D'entamu pa compartir (bien emplatao por separao) gambes endolcaes en panceta de "joselito" (el que cantaba non, homes!, l'otru, el de los gochos). Presentacion orixinal, platu rico, pa mi sobraba la cama de salsa rosa que diba per baxo les gambes, pero quites les gambes d'encima y puntu. Gambes grandes, gordes y poco feches pa disfrutar del tastu. De segundu, por conseyu del metre, tiramosnos pol pescau, pa mi meru con amasueles. Fresquin, mui fresquin, y les amasueles grandes y sabroses. La verda que rico, la racion nun taba mal (semeya 1), bon puntu de sal con una salsina d'ayu y aceitin perbono. Dicivos tamien que son de los que tienen varios panes a escoyer, detalle qu'a mi prestame abondo. La compaña agua (y eso qu'estropia los caminos, pero...) y una copina de San Campio 2007 (ye que solo agua..., una copina, que menos!). El sitiu prestosu y de bon productu. Por pone-y un par de peros a la comida (perinos mas bien, de los que siempre pongo cuando'l chigre ye de los "caros"), per un llau los segundos (entrugue-y al compañeru de mesa) llegaron los dos templados, tirando a frios (eso nun me presto munchu) y lo de siempre n'estos sitios (habra qu'avezase a ello!), pal mio gustu los pexes dexenlos siempre un pelin menos fechos de la cuenta. Ya sabemos que'l pescau nun pue tar pasau, pero si va tar tirando a crudu tien de venir como nos xaponeses, ye dicir, en cachinos piquiñinos, un llombu como'l de la semeya tien que tar mas fechu ensin tar pasau, polo menos pa mi, magar que tabaa bien rico. Un par de cafes y'l preciu tirando a altu, teniendo'n cuenta que nun teniemos vino (una copa), 37€/persona. En cualisquier casu ye una bona referencia pa prebar porque la RCP ta ehi, ehi :-)

De Floriana (Molinaseca-El Bierzu)

Creo que nun ye un mal momentu pa entamar con chigres de fuera d'Asturies, anque pa ser fiel al mesmu, creo que solo voi poneme con sitios d'onde, polo menos en parte, l'Asturianu tea presente, como ye'l casu'l Bierzu onde hai zones de fala astur-llionesa, gallega y castellan. Pa nun entretenme mas, paezme bien entamar con esti restaurante perguapu situau n'un hotelin de turismu rural en Molinaseca. El Floriana ye un hotelin qu'amesta lo rsutico y lo moderno y amas, dixeronnos que tenia fama de tenr una de les meyores cocines de la zona, y nun fallaron. Aconseyase acutar anque teas nel hotel, porque nos fines de selmana ta siempre enlleno. Tien dos zones de restaurante, la mas guapa y afayaiza ye la que ta na entra del hotel, una zona acristalada que da pal verdin que tien delantre, perguapo. D'entamu de la casa punxieronnos unos champiñones enteros con ayin perriba, mui ricos. D'entamu pa compartir escoyimos la ensala de perdiz n'escabeche, rica, pero normalina (semeya un), con esto quiero dicir, que hai vegaes que los nomes de los entrantes nun puen ser "ensalada de perdiz" (como comprobamos al dia siguienti cola "ensalada de ventrisca") mas bien ensalada con perdiz n'escabeche sedria meyor. Poca perdiz, rica, n'una ensalada "florette" perbien aliñada con bonos ingredientes y frutos del bosque alreor, rica, pero esperaba mas. Los segundos fueron otra cosa, meyoraron enormemente asina como la imaxen del sitiu. Un pixin a la brasa con trigueros que prebe y taba espectacular, tanto de tastu como de testura, na gomosu y con un tastu a mar perprestosu (semeya dos). Pola mio parte tireme a la carnona, sollombu de güe como me presta, vuelta y vuelta, perbien fechu con foa perriba y cola compaña de quesu de cabra con cebollina pasadina perriba. Solo teo dos pallabre, im-presionante, dexaronlu que podies cortalu col reves del cuchiellu y roxu por dientro, el foa nel so puntu y l'amestu col quesu de cabra y la cebolla taba perbono (semeya tres). De compaña, un vinin del Bierzu, Cepas Viejas 2005 (si vos aconseyen el Gotin de Roso diciendo que ye paecio, nun faigais casu, error del segundu dia ;-) ). En fin, bon sitiu pa cargar piles un fin de selmana y salir, amas, col butiellu bien fartucu por unos 44€ persona, evidentemente, nun ye pa tolos dies, pero presto munchu.

Casa Josefina (La Cuesta-Nava)

Chigre Pesllau dende hai polo menos 2 años.

Pa entamar y enantes de postear l'otru chigre de Cecea (qu'en verda ta en La Cuesta, ente Purnea y Cecea), voi autofelicitame por llegar al post 100 en menos d'un añu, lo cual tienme fonderamente preocupau, porque esti ritmu nun se pue caltener. Agora vayamos a lo nueso, que son les fartures. De Casa Xosefina ya nun poemos falar d'un chigre, tenemos que falar d'un restaurante bien puestu. Situau de forma estratexica mirando pal valle y los montes de la zona de Cecea (hasta puen vese los Picos al fondu) la casina na que ta montau'l restaurante ta perguapa. Tien un amestu ente moderno (la bodega de vinos de la entra acristalada, la pintura de les paredes, la decoracion de les meses...) y rusticu (les vigues del techu de maera, la piedra) que lu fain un llugar realmenti afayaizu. Tien varios comedores y solo trabayen con meses acutaes, anque yendo'n xueves a meudia garraronnos a cinco ensin problemes. Tuvimos nel comedor de fumaores, espaciosu, con vistes al valle y coles meses suficientemente dixebraes ente si pa nun oyer al vecin y tener el espaciu vital necesariu. Atencion profesional, bona presentacion de copes y llega'l momentu de facer la comanda. D'entamu, el platu especial de la casa, comen 5 y hasta 18 d'el. Un amestu ente mexillones a la vinagreta, hombrinos a la vinagre, calamares, chipirones, crocretes, boles de quesu, gambes a la plancha y gambes a la gabardina (nun se si me falta dalgo). Delles coses mui riques, delles coses normales, pero too n'un nivel mediu-altu. Ente les riques, pa mi destacaben les crocretes caserines-val, nun son les de Casa Marcial, pero nun tamos pa comparances ;-), les boles de quesu cabrales (mui riques) y les gambes a la plancha. Los hombrinos taben de mediu-altu y lo demas normal, rico ensin mas. Pero ay amigu! lleguen los segundos, yo decidime por un conseyu del camareru y acerte, cebolles enllenes de papos de gochu ibericu. Platu pa fartones, 4 cebolles perbien cocinaes con los papos nel so xustu puntu de cocion con una salsina casero fecha col xugu les cebolles y'l de la carne y unes pataquines a la panadera per baxo, que taben pa rellambese. Lo del pimientu en plan montera picona nun pasa del detalle de presentacion. La mayoria prefirio pidir el famosu filete de quesu d'esta zona. Platu enorme, bono, platu non, llargerau de maera con ensalada y pataques, que nun prebe pero tenien una pinta de tar cocies primero y frites un pelin dempues. A mi los cachopos y estes coses nun me dan munchu mas (ya, ya, Migue, Fran y agora Antonio Lopez vais reñime) pero prebelu y taba abondo rico, tienru col tastu sele del quesu, grande y carne de bona calida ensin nervios, como debe ser. Postres nun tomamos porque equi nun hubo naide que llegara. De compaña (dende que dixe que nun lu tenia mui vistu poles cartes asturianes paez que me persigue) Artadi Viñes de Gain 2000, esti vinu alaves nun falla. El preciu mui razonable (nun vi la cuenta, pero vi la carta y'l filete de quesu taba mas o menos polos 15€) eso si, lo unico que los precios de bodega tan abondo pasaos, una de les razones de güei pa escoyer el Viñes foi que'l preciu yera xustu, pero habia un monton d'ellos abondo pasadinos. En definitiva chigre peraconseyable, mas caru, en "netu" que Casa Colo, pero ye que son distintos, un ye una casa de comides de tola vida y esti ye, eso una casa de comides, pero puesta como un bon restaurante. Que vos preste!