martes, 11 de febrero de 2014

Regueiro (Tox-Navia)

Estos fines de selmana de relax y SPA con guardería qu'aparecen casi tolos 6 de xineru nes zapatielles de la nuesa cá son impagables y, sabiendo que los Reis Magos son los pás, pues hai que yos-agradecer fonderamente los esfoutos que los fain posibles (y eso que quédame la dulda de si nun sedrá un chantaxe de tola vida pa quedase colos nietos ensin normes paternes, que ye lo que me temo).

Como vos digo fin de selmana tormetonsu, lluviosu pero prestosu nel que punximos les piles a furrular y nel que tamién hubo delles allegríes gastronómiques.Esta vegada voi contar el viaxe del revés, entamaré pela vuelta a casa en domingu y la parada en Regueiro, chigre que nos caberos tiempos ta dando munchu que falar. Parada prevista na cabeza dende que salió el viaxe pela zapatiella mia, pero qu'acutemos sobre la marcha.

Prestaríeme escribayar estes llínes en Eo-Naviego, pero como nun tengo nin puñetera idega faígolo como me vien en ganes, que pa eso mando yo anque seya equí namás, en virtual, en casa ya sabéis que non :-).

Regueiro ye un chigre situáu en Tox, a un kilómetru y mediu de Puertu Veiga, onde paremos primero a ver la fuercia de les foles (merecía la pena). Tengo que dicir que'l chigre ta penalizáu pela llocalización, nun porque te n'un pueblu, non, si non porque ta n'un hotel de estos que deben usase en branu namás y la llegada con lluvia, el aparcamientu nel prau en mediu d'un llamorgueru, la puerta col grafiti de "abiertu", que taba pesllada, y la entrada principal con un "pique pa entrar", dante la sensación de que va salir Norman Bates a recibite y, cuidadín, que equí se yos-presupón la tenencia de cuchiellos grandes y de bon corte. Nun ayuda nada tampoco que'l comedor te arriba y que los baños ten abaxu a l'altura de la barra'l chigre en sí, más que nada porque n'iviernu la diferencia de temperatura d'un y otru ye como de -25º , y como diría el mio güelu "pues coyer la muerte, fiu".

Al casu, menos mal que la sala del comedor ye diferente, minimalista, afayaíza en forma y con una chimenena nel fondu y una estufina a la entrada de gas que mantien la temperatura adecuada pa ponese a xintar. Vistes a la terracina, y detalles cuidaos na mesa (la xarra d'agua, los vasinos, la cristalería, les presentaciones). En fin, que pases de la nuechi a la mañana en unos 12 escalones (que nun los conté, ¡eh!, por dicir 12), si llegare a ser al revés taría incómodu esperando por la musiquina esa de "chin chin chin".




Tratu amigable y profesional que nos informa qu'ellos suelen trabayar por menús, un degustación (por 42 € bebida a parte ),  otru con menos variedá (por unos 32€) y otru que yera como un mecer los dos anteriores con un preciu d'unos 39€. La verdá ye qu'en viaxe xintar un menú d'estos ye duro y nun poder acompañalu de vino (pola mio parte) más, pero tamién tienen una mini-carta na que había un par de coses fuera d'ella que foi a lo que nos tiremos.

Enantes de lo comandao llegó'l detalle de la casa, un platu pa ca un de nos en forma de fueya con una crocretina de xamón (rica, nada espectacular, pero bona), una mini-tortu con güevu de cogorniz y ente medies un embutidu ente chorizu y morciella que nun lleguemos a identificar bien porque yera persele de tastu. Lo último que xintemos foi un bombón de caza,  la sopresa gustativa, ya que taba fríu y camudábate la llingua del calor previu a un "coño, ta bono y frío" con un tastu a fuá perprestosu.





Ya cola nuestra comanda, pidimos unes amasueles que nos traxeron en dos partes pa que nun se yos-fuera'l calorín, a la semaya podíemosla llamar "Amasueles parte I" y da-yos el Goya a unes amasueles bien resueltes con un golpe de calor (ya dirán los espertos si de vapor o de fogón) pa que l'amasuela soltara llíquidu, abriera y nun perdiera nada del tastu a mar, casi crudes. El cebollín, el sal y l'AOVE puestos en como aliñu. Quedemos con ganes de seguir coles partes III y IV (tipo Star Wars) porque parecieronnes poques, polo demás impresionantes.

Otru platu que nun taba na carta foi'l pescadín que pidió la mio muyer. Una ración de xargu con salsa de llámpares con un plizcu de cebolla y puré de pataquines. Que vos dicir, prebelu y tenía nun sólo un puntu perfeutu sinon un tastu a mar ensalzáu por eses llamparines, que taba perbono.

Pela mio parte, y esta vegada sí, pedí un de los platos que taba nos menús que lleí y que paecía un de los "platos estrella" del chigre. Tuve qu'esplicar que pal arroz nunca entamo compañeru de viaxe y a ver si podéin traeme una ración, y traxeronmela, arroz con pitu caleya.
De tastu nada que dicir, impresionantes dos coses, la calidad, la tienrrura del pitu y l'amestu d'esi tastu potente que dexa col arroz. Nada d'arroz per un llau y pitu per otru, non, un tastu de los que dexen alcordances. El pero, que más d'un, de dos y de tres granos podía ponelos na cervatana de boli bic del cole, pero lo dicho, nun y-quita méritu y esfrute al platu.


Un par de cafes con xelu con un par de caxigalines de compaña (una ñube llimón y una pastina), y un bote sacarina natrem y un sobre d'azucar na mesa...que yos-sobraba si merquen un par de azucareros y asina nun desentonen col restu. Pequeños detalles a ameyorar col tiempu.



Decir que ponen dos panes cola xintá que van reponiendo ensin problemes  y a ca un más ricu, un con aceitunes y otru de maíz con pipes.

Una botella d'agua (la DGT ye lo que tien) y esto habría que ponelo nos anales de la historia chigrera, como nun deben tener cubitera o nun debe querer usales el vinu blancu van sirviéndoltelo por "medies copes" pa que nun caliente (como les amasules) asina qu'al final paguemos 1,5 copes de vinu, cosa que nun viera en dengún lláu hasta el domingu pasáu :-)

Del preciu,  reconozco que toi mal acostumáu a pagalo too con tiques y que nun duela, pero ensin postres, esin vino na mesa y aún xintando bien y con perbona atención, pero valorando onde tas y pequeños detalles más, dame que ta un plizcu xubidín de preciu, del que falo neutralmente, porque la xintá prestonos, pero n'estos tiempos 65,75€ ensin alcohol na mesa ye pa comentar eso de "ta bien cobrao".

Un sitiu prestosu al que si los viaxes pela zona acompañen de xuru que volvemos.

8 comentarios:

pululante dijo...

Interesante. Este lo tengo en la lista de pendientes. A ver cuando sale un sábado o domingo soleado que apetezca ir por aquella zona.

¿Hay menú degustación o es a la carta?

Fartones dijo...

Coño guah.e!! Hai que lleer!!! Pa qu'escribo? XD.
Primer parrafu dempues de la primera semeya!!

Toni dijo...

¿El personal de servicio mejoró?. Fue de lo que más negativamente me sorprendió en mi visita.

pululante dijo...

jaja. Me he ganado una colleja por no prestar atención :-D

Fartones dijo...

Toni. Denguna quexa. Dos neñes atentes, una esplicaba el platu y la otra diba sirviendo. A mi dexaronme pedir una d'arroz y non dos, si bien ye ciertu que nes otres meses taben xintandolo y podien facelo, Tamién hay que lo dicir y foi un detalle.

Fartones dijo...

Fe d'errates: ya camudao nel testu, xargu, nun foi meru. El meru foi nel siguiente chigre que postee. Líome yo solu!!!

David Castañón dijo...

Ya oyera d'oyíes d'él cuantayá. Y la verdá ye qu'el occidente téngolo abondo escaecío caberamente.

Amás, si ya averáu a un de los pueblos más prestosos d'Asturies, entós perguapu. Apuntáu queda pa incursión occidental y/o día de playa pa Barayu.

Cómo presta esti blog!

Fartones dijo...

Munches gracies, ho!! Faise lo que se puede :-)