Casa Zabala (Xixon)

Hai sitios que fain que t'escaezcas de males esperiencies. Un dellos ye Casa Zabala, ¿que'l dia anterior xintaste de pena o nun tuvisti agustu?, pues nada, tira al dia siuiente pa equi y ya nin t'alcordaras de la mala comida.
Hai qu'aprovechar los momentos de lliberta infantil pa salir un plizcu de nuechi y equi finamos, n'un clasicu de la hosteleria xixonesa.
Llocal clasicu, bien decorau con dalgo de piedra, paredes en tonos caldios y lluz tenue. Lo unico que choca n'estos tiempos ye l'uniforme tipu monxil que yos-obliguen a poner a les probes camareres, horrorosu, la verda, creo que deberien dir a ver delles charres de Ferran Adria agora que patrocina nun se que marca de ropa cocineril.
Al casu, atencion de lluxo que nun yera dificil si tenemos en cuenta qu'a les 22:00 de la nuechi nun habia mas que tres meses, eso si a les 23:00 tenien 3 o 4 meses mas, por cietu ¿soi yo que toi avieyando o cada dia la xente va mas tarde a cenar?.
La cena entamo de forma impresionante con un guisu de setes xabaces con viera (semeya un) que ya nos llevaron emplatau pa ca un y que taben pa rellambese y facer barquinos col pan. Cuidadin los hipertensos qu'esti platu tenia abondo sal. Tastu bien llograu ente la mar y la tierra que daben ganes de repetir.
N'un sitiu asina solo pue date por pedir pexe asina que pela mio parte tireme por un besuguin al fornu (semeya 3) que vino con unes pataquines cocies de compaña. Al besugu solo y-faltaba una pertiga pa saltar del platu. Tanto de frescu, como de puntu de cocion taba perfeutu, ensin embargu tengo de dicir que la salsina taba un poco floxa y nun taba a l'altura del productu y dexome completamente indiferente. Pero'l pexe, que pexe!!! uhmmm, que rico, amas de ser una racion contundente.
La muyer dio-y a una furagaña con güeves d'oricios que foi un platu absolutamente redondu. Ensin peros, de 10. Dos bonos llombos de furagaña (semeya dos), perfeutos de too (puntu y testura) con una salsa de morrer de gustu a la que los oricios y-daben personalida.
¡¡Lo mariñan invadianos!! asina que tomemos un Mar de Frades de 2009 de compaña. Un alabriñu comercial pero que tien un calter que me gusta munchu, polo menos esta collecha. Un par de cafes con xelu y una mini-botella d'agua por 51€/persona. La verda que xintamos estupendamente n'un sitiu perafayaizu, pa repetir.

El Regueral (Llugo - Llanera)

Prestame meter nel blogue esti chigrucu prestosu de Llugo. Hai restaurantes y sitios mas in, pero ya sabeis, un chigrucu, ye un chigrucu, tienen el so encantu y esti tamien tien parrila.
El chigre que yera piquiñin fai unos años medro considerablemente con una comedor añadiu. Los dueños siguen siendo los mesmos y la comida igual, eso si, con mas sitiu pa esparder anque perdiese parte del encantu.
La verda que a mi prestame pedir equi varies coses, una son les costielles (claro, una bona parrilla tien que tener costielles de gochu), otra ye'l pulpu (curioso, pero preparen el pulpu perbien), ota son los chopitos (mui ricos).
Na ultima visita nin prebemos la caza, nin los chopitos, nin el pulpu. Les costielles taben igual de bones y una racion curiosa (semeya un). Añadimos una ensalada cenciella d'eses de llechuga, tomate y cebolla (semeya dos) con un tamañu considerable y con productos decentes. Pa completar dimos-y a los champiñones a la sidre de la casa (semeya tres). Una racion potente, con una salsina rica na que echabase de menos que los champis nun fuesen de verda, sinon de bote. Dos botellines de sidra y un par de cafes con xelu por 15€ persona.
Ensin mas, comida cenciella y rica que te pue arreglar en un apuru o simplemente cuando t'apetez picar dalgo con garanties n'un dia cualisquiera.

 Na cabera visita colos collacios repetimos les costielles (igual de riques), dalguién pidió morciella matachana que taba perbona y los demás dimosnos a los cachopos. Carne sele, bien rellenu y bien preparau, con setes de compaña. Un tamañau dignu de los amantes d'esta especialida (yo nun soi un d'ellos anque prestame xintalu como toos de vegada'n vegada)

Casa Anton (Cuerres - Ribeseya)

Entamo esti post con cierta sensacion d'amargor y, curiosamente, non pola cocina. Vais tener que perdoname si soi un pocu criticu, como voi selo, voi avisando de mano.
A lo que vamos, disponiemos a pasar un bon dia colo nenos y unos collacios pela zona de Ribeseya, asina que'l dia anterior acute n'un bon sitiu, recomendau por muncha xente. les dos llamesfeches, una de sabadu y otra de domingu puen resumise no siguiente: "hola, quiero acutar pa xintar mañana. Mira somos 11, pero 5 son nenos pequeños. ¿Teneis abierta la terraza?. Ye polos nenos, mas que na". La respuesta foi asina como que si, que la terraza taba abierta y tal y cual, pero igual taba mal tiempu....bono, yo nun conocia'l sitiu (solo referencies) asina que avisaos quedaben.
La cuestion ye que la mesa taba preparao nel comedor (ellos sabran el negociu que tienen) y'l comedor nun ye'l llugar mas apropiau pa tener neños y xente na terraza habia. los neños son neños y la verda que portaronse perbien, nin corrieron poles meses de los demas, nin se xubieron a na, nin rompieron na, pero son neños y glayen y xueguen y lo que nun pues ye afogalos, si a los probes hasta los teniemos metios n'una esquina ente la mesa y la pare xugando con unos coches, mentantu los mayores finabemos. Dicho esto, si atiendes una mesa con nenos ties que tener picardia. Ties que dir llevando-yos el panin, ties que dir poniendo coses de picar, etc...pa que vayan tando entretenios mentantu llega la xinta. Pero, servir a les meses que lleguen mas tarde primeru que la nuesa, nun danos nin les cartes (tuve que llevantame yo y repartiles a la xente) y tardar 35 minutos dende que nos mandaron sentanos hasta tomar nota, nun ye lo meyor.
Si lo mas importante ye enllenar un comedor ensin importate si ye'l sitiu pa que los nenos non molesten y que los pas nun temos incomodos tratando de que nun lo faigan (ya digo que na raro pa unos nenos d'ente 1 y 4 años) y tener una persona pal bar, pal comedor y de vegada'n vegada pala cocina...va ser que non, qu'eso nun ye llevar un negociu por bien que se xinte.
Dicho esto voi resumir la comida que casi se m'atraviesa:
Entamos pa toos y pa los nenos:
- ensalada de bonitu (semeya un). Rica, bien aliñada y con bonos trozos de bon bonitu de llata. Interesante entrada
- Crocretes. na de na, nin merez la pena comentales
- Ensalada d'otra cosa que nin m'alcuerdo (nun debi prebala, cometaron que taba bono)
- Escalopinos con pataques. Ricos, bon productu bien tratao
- Xamon...nun comentare porque lo que dixe primero aplica a tola atencion, nunca lu vimos pela mesa. Polo menos nun taba na cuenta tampoco.

De segundos, la xente comento que mui rico casi too. Lo que yo puedo dicir ye que'l xaragu a la plancha de la mio muyer nun valia pa na. Si llega tener mas ayu podiemos aprovechar pa sacar unes perres colos chinos que creo que-yos encanta (semeya 2), amas de tar mas pasau de la cuenta. La pieza yera bona, eso si.

El mio rau de toru enllenu de fua con pasta, taba perricu magar que'l fua habia que buscalu coles gafes de Rompetechos y'l tamañu del platu nun yera pa fartar a munchos (semeya tres).

Agora calculai, dos botelles de sidra y 4 zumos enantes d'entrar, dos botelles de Sierra Cantabria 2006 y delles botelles d'agua, ensin cafes (y ya nin m'alcuerdo si hubo dalgun postre) por mas de 42€ por cabeza adulta. Caro.

En resumen, si nun ye'l sitiu pa ellos, nun m'acutes, dimelo, prefierolo, pero nun me lleves y dempues quieras echame pa que nun vuelva. De verda, prefiero nun dir y nun date a ganar 254€ pa que m'atiendas asina y encima "sufrir" polos demas.
Atencion, bona cocina en carne y de xuru que ensin nenos salis agustu...o non, porque si llega tocate una una mesa como la nuesa al llau, igual tampoco.

Llagar La Morena ( Viella -Siero)

Esti xineru de 2011 alcordaremosnos d'el por ser el del non preocupase onde vas colos neños a xintar ya que nun se fuma en dengun llau. Quitando eso, güei toca falar de la mio primer incursion gastronomica del añu; el llagar La Morena. Esti chigre de Viella ye, quiciabes un de los clasicos de la zona Llugones pa dir tomar unes sidres (marca propia, claro ta, que son llagar). Bien situau nel Altu Viella a un pasu del mayor Centru Comercial d'Asturies, el sitiu tien dos partes bien diferenciaes una vieya en piedra colos techos de maera que tien esi encantu especial de lo de siempre col vieyu llagar d'esposicion dominandolo too. La parte de tras ye la mas nueva y tampoco ta mal, pero ya nun ye tan afayaiza y ye toa de maera.

Venir equi un sabadu o un domingu ye alcontralu enllenu xente tomando unes botellines de sidre y picando, que tienen una bona cocina. N'estes feches de Reis y rebaxes andareis abondo per Parque Principau asina que si nun vos apetez prebar una de les multiples y satisfactories muestres de "comida" rapida del sitiu bien merez la pena facer un altu nel camin y xintar equi. Vamos, una bona escapada del maraballu consumista d'estos dies.

L'otru dia pidimos una ensalada cenciella (llechuga, tomate y cebolla) que vino bien aliñada de la cocina con un toque de vinagre carambelizao de modena per riba. Los bonos productos son lo que fain d'esto un bon platu de compaña. Mui ricos el tomate y la cebolla y nada mal la llechuga, perfeutu pa facer de compaña de los dos platinos principales. Que fueron un pedidu clavau a la cabera visitia que fiximos al "Pumarin" de La Pola (coincidio), parrochines con xamon (semeya 1) una bona racion bien prestosa anque con menos xamon del que me prestaria y unes molleh.es (semeya 2) de perfeutu puntu de cocina, seles de tastu, blandines y perprestoses. La salsa ye gran parte del platu y esta nun taba nada mal preparadina con tomate caserin y pimientu. Pal mio gustu sobraba-y un plizcu de piminetu y faltaba-y un toque guindilla, pero esto ya va'n gustos porque igual a otru la del Pumarin ye'n forma perconsistente y preferis una salsina mas sele. Ensin ser la cocina del Pumarin, xintase bien y vais quedar agustu. Tres botelles de sidre, dos cafetinos con xelu y 18€ por persona. Francamente merez la pena salir del barullu y xintar equi.

La Bolera (Anayo - Piloña)

Tres d'un di de relax per Torazu col consiguienti vermu, decidimosnos a prebar un bar de tola vida de la zona que nun conociemos. Asina que dende Torazu punximos el Tom-Tom a furrular y tiremos a esti pueblin de Piloña.
La verda que nun ta mal situau, ente la frontera de Villaviciosa y Piloña, pela caleya de Sietes, xustu nel altu ta Anayo y a la vera la carretera teneis La Bolera. Esto tan cenciello hai que lo esplicar al cacharru esi del GPS, que debia saber que soi un caleyeru empederniu y metiome per toles pistes forestales qu'alcontro (tamien venia de Torazu y non de La Villa, pero en fin). Al casu, que menos mal que taba'l dia perguapu y nun llovia porque sinon nun llegamos. El viaxe merecio la pena, dende'l altu podeis esfrutar d'unes vistes impresionantes de los Picos (semeya un) y si mirais pal otru llau veries la Mar. Lo dicho, impresionantes vistes.

El chigrin ye perpequeñu (semeya dos), eso si, tien aparcamientu pa Andres y otros tres, nun se yo si querran ampliar pa fecer un de bodes y banquetes!.
Fuimos ensin acutar y con un comedir d'un masimu de 14 persones (tirando polo alto) tuvimos d'esperar un cuartin d'hora. Pa facer mas entretenia la espera tomemos el vermutin na terraza al solin y mirando pa los Picos (otra vegada la semeya dos).


Llegamos a lo que nos interesa, la parte de bar nun ye mui grande, pero la de comedor ye minima. Puesto abondo cuquin, bien llimpiu y con ventanes a la vista montañil. Carta cantada ensin complicaciones a base de guisos y arroz con coses, el que quiera pexes meyor marcha pa La Villa. Serviciu atentu y amable entren bones sensaciones dende que te sientes. Dos platos tradicionales cabritu guisadin (semeya tres) y pitu caleya (semeya cuatru).
Dos platos contundentes en racion, perbien cocinaos, con un guisu d'arbeyos y pimientinos. Tastos impresionantes, tienros, seles y cola compaña d'unes pataquines de verda frites. Yo diria, nun apostarie la manu n'ello, pero diria que'l pitu paso un plizcu pela sarten primero y dempues a guisar. Los dos platos pa amantes de los tastos de siempre o refalfiaos de la comida moderna. Perbonos, de lo meyor que xinte ultimamente.
La carta de vinos tamien ye "a capella" y nun espereis equi la guia Repsol de vinos. Nel nuesu casu, un mas que dignu Ramon Bilbao crianza 2007. Si quereis sidre el palu ye de Coro, anque supongo que nel comedor darante'l pitorru verde esi pa chala.
Un par de cafetinos con xelu, el vinu y'l vermu d'enantes d'entrar y un chupitin d'oruxo con miel por 19,90€/persona. Gran RCP y mas si pensais que les raciones valieron 12€ ca una. ¿Quien alcuentra un pitu prietu de verda y bien cocinau n'una racion asina de contundente por menos de 17-19€? pues creo que ya en pocos sitios. Volveremos, ensin dulda, anque nun ye sitiu pa nenos mui piquiñinos (nun tienen onde esparder)

Casa Rosina (Santana d'Abuli - Uvieu)

* Imaxe sacada de www.casarosina.es

Casa Rosina ye un chigrin prestosu de tola vida n'Uvieu. Diendo pal De Labra siguis la caleya un pucuñin mas y pegau a la pista elli lu alcontrais. Esti chigre o casa de comides tien dos comedores un pegau a la barra'l bar y l'otru, que ye como una ampliacion del chigre de tola vida, un pucuñin mas alla.
Esta vegada nun tome semeyes porque yera una comida de trabayu y nun yeren formes, h.e h.e. Al casu, la carta ye cantada asina que de memoria ye percomplicao dicivos que tenien. Gran varieda de comida dende pexes a carnes.

D'entamu toos nos decidimos peles alcachofes naturales salteaes con xamon. Nun ye facil alcontrales eso, naturales, asina que paecio que toos nos punxeremos d'alcuerdu.
Platu pa cuatru persones que dio pa repetir toos otra vegada. Alcachofines estupendes con un poco d'aceitin d'oliva virxen y trocinos de xamon del bono. Perbones.

De segundu paecio que nos punximos d'alcuerdu de dos en dos. Dos de fritos de pixin con perbona pinta que nun prebe pero que contaron cola aprebacion de los xintadores.
Pela mio parte calamarinos frescos encebollaos con pataquinos. Nun penseis en un platu color prieto, encebollaos si, pero na so tinta non. platu cenciellu pero mui conseguidu con unes pataquines de verda, unes cebollines pasaes lo xusto y casi de xuru que caseres y unos calamares perbonos en plan guisu con un tastu redondu y una testura sele y tienra. A mi prestaronme munchu.

Tres postre na mesa (dos tartes de quesu y una crema de requexon con figos). Nun prebe dengunu pero tenien bona pinta. Cafes, pan, una botellina de Fuensanta y otra de Muga crianza 2006 (abondo llograu esti vinin) por 36€/cabeza. Un preciu axustau pa Uvieu, n'un sitiu recomendable.

Au Cheval Gourmand (Limburgo-Valonia-Belxica)

Si, si, palos que sepais que dibemos a pasar el puente nel estranxeru, si, salimos dos hores enantes del plante de controladores y lleguemos un dia enantes del follon aereo del centru d'Europa :-). Asina que puedo postiar esti sitiu tan prestosu.
La razon de quedar nel Ducau de Limburgo foi la estupenda situacion na que ta pa visitar cola peque diversos mercaos de Navida de la zona, sobre too el d'Aquisgran a unos 25 km d'equi.
Limburgo ye un pueblin piquiñin y perguapu con un cascu historicu protexiu na Valonia y que merez una visita ensin dulda. Lo nuestro yera facil, la casa de turismu rural na que nos quedemos taba nel mesmu centru, enfrente d'un de los dos castiellos y delantre de la Ilesia (semeya un). Una esperiencia pa esfrutar d'un ratiquin d'una Navida diferente colos mas peques.
Belxica recibionos con ñeve abondo y despidionos de la mesma manera. El dia que lleguemos ya taben trancaes les tiendes, asina que fuimos cenar fuera. Nel centru historicu dos chigres y escoyimos la suxerencia del dueñu la casa.



Au Cheval Gourmand ye una Boulangerie (pasteleria)-restaurante con platos tipicos de la zona y tranquila. Puesta en maera, colos adornos de Navida y'l calorin de dientro ya nos prestaba tar elli enantes de xintar (semeya dos). Al llegar habia namas qu'otra pareya con dos nenos, pero nel ratu que pidimos ya quedemos solos. Normal si se tien en cuenta la ñeve y que a les 20:15 la nuechi nestos pueblos ya ceno tou'l mundiu (a les 21:00 trancaben).



Pela parte de la mio muyer, una de les suxerencies de la casa, ensalada de pechuga de pitu (semeya tres). Una racion mas que considerable con una ensaldina prestosa n'una salsa agridulce y pechuga reboza con pan, perrexil y mas especies estupendamente preparao. Esi rebozu yera la gracia'l platu. Perbonu.



Pela mio parte callo otra suxerencia. Una quiche con xamon, cebollina,verdures y por supuestu quesu y una base estupenda como solo puen facer n'una bona pasteleria (semeya cuatru). De compaña llevaba la mesma ensaladina que la del pitu, pero'n tamañu reduciu. Un bona sintonia de platu como ya indicaba la nota que me debuxaron con vinagre caramelizao.



A la peque (que'l peque ye mui piquiñin pa enterase d'esti viaxe y nun vino) antoxosei chocolate. Pues na, gofre con chocolate pal llombu porque la verda que llevaba xintao durante'l viaxe de too y estrañonos hasta que tuviera fame (semeya cincu). Na que ver esto colos gofres de les feries españoles, con chocolate fundio pa char enriba y un chocolatin templadin de compaña. Punxose les botes.



De compaña media botella de vinu blancu de la casa (rico, pero nun sabemos que yera. La carta de vinos yera asina como "1 botella, 1/2 botella, 1/4 de botella o un vasu" de vinu blancu, tintu o rosau) y'l mio Carlos V enantes de llegar a Tazones y volvese I, en vasu de Kwak (semeya seis). Un gustu esti pais pa los amantes de la cerveza, a eso si que me punxe ciegu. A destacar tamien el pan, fechu nel propiu restaurante y que taba pa rellambese.

Un bon sitiu en xeneral, tanto'l pueblu pa visitar la zona (tamien ta percerca de los cantones del Este pa dir al parque natural de los Hautes-Fagnes), como'l sitiu pa facer una paradina y too por 19€ por adultu (38€ de cuenta) :-)