Casa Mon's (Cerdeñu-Uvieu)

Casa Mon's ye un restaurante d'Uvieu que lleva mil años furrulando, pero que nun conocia. Nun lu conocia porque nun ta, precisamente, n'un sitiu afayaizu, ya que ta'n Cerdeñu, casi'n meta del poligonu y como nun trabayo elli, pues como que nun llama dir a xintar. Tampoco ye facil dir a un sitiu nel que los guah.es nun tienen onde esparder y amas fumase dientro. Asina que tienen que dase tolos condicionantes pa arimase perlli y'n San Mateo dieronse. Y direis, ¿con esa pinta tan poco afayaiza, pa que fuisteis?. Pues fuimos porque teniemos ganes de xintar como paisanos, comida tradicional, cenciella, ensin complicaciones mentales, con raciones abundantes y delles sorpreses. La cuestion, que ye un chigre recomendable y hai que dicir que dientro ye munchu mas afayaizu de lo que paez per fuera. Pa gustos hai colores y yo nun pondria eses llampares que vi, pero ta puestu'n lladrillu vistu y piedrina, les meses tan mas alloñaes de lo que esperes y tien mas sitiu del que paez. Tamien hai que dicir que fumar podra fumase, pero que nun dia nel que nun habia xente trabayando n'Uvieu, los que tabemos dientro nun fumabemos dengunu, asina que'l aire taba perfeutu.
Hasta equi llevonos la fama de les fabes con tropiezos y la fabada, y vamos y nun prebemos denguna de les dos coses. Val, val, nun me digais na, ya lo se, ye que taba abondo caldiu'l dia y nun m'entraben les fabes. Salva qu'en esta casa, lleva por inmigrantes de Bual, tienen otres cosines que tan de muerte. Entamamos con una sorpresina, llamonos l'atencion na carta y resulto ser una de les especialidaes del sitiu, carpachu de pulpu con pimenton y un plizcu d'aceite (semeya un). Mui rico, testura perfeuta, nin duru, nin persele, cortau finin, finin, con una mini-ensalada nel centru pa facer compaña. Mui prestosu.
De segundos, ya que nun me tire poles fabes, tireme pol cabritu a la bualesa. ¿Que que ye eso de la bualesa?, pues na, tan cenciellu como cabritu guisau con unos pataquinos y unes setines bien prestoses. Tienru, sele, desfaciese na boca, prestome pola vida (semeya 2).
Pel otru llau de la mesa llego un bacallau mui ricu, con pataquines cocies, unes gambes y un sustu inicial. Si, sustu porque enantes de prebalu vimos per riba del pexe una capa de salsa que paecia fecha con nata, pero non, yera una capina de salsa de pataca. El casu, ye que taba nel so puntu de testura y tastu. Prestosu.
Un avisu a navegantes, nosotros nun xintamos soso, precisamente, y'l sitiu taba pa nos, asina qu'aquellos con tendencies hipertensives, meyor nun vayan ;-).
Como siempre, nun llegamos a los postres (lo siento llambiones) anque cantaron unos cuantos caseros, tomamos dos cafes con xelu y fiximos la compaña de la xinta con Fuensanta y una botellina de Muga crianza 2004. La carta de vinos, digolo polos mas aficionaos, ye sota, caballu y rei, nacional y con poques sorpreses, magar qu'a mi valme.
Total de la cuenta, 33,33€/persona, una RCP perguapa, amas qu'a nos salnos gratis...paguen, por si interesa a otros, los de la semeya d'abaxu.

Bones nuechis!!